ތިން ކިލޯގެ ޑްރަގާއެކުު ހައްޔަރުކުރުން: ޑްރަގް ފެނުނު ތަން ކުއްޔަށް ހިފާފައިވަނީ އަންހެންމީހާގެ ނަމުގައި

ތިން ކިލޯއަށް ވުރެ ގިނަ މަސްތުވާތަކެއްޗާއެކު ދެ ޒުވާނުން ހައްޔަރުކުރި ތަން ކުއްޔަށް ހިފާފައިވަނީ މައްސަލާގައި ހައްޔަރުކުރި އަންހެންމީހާގެ ނަމުގައިކަން ހާމަވެއްޖެއެވެ.

ފުލުހުންގެ ޑްރަގް އެންފޯސްމަންޓާއި ކައުންޓާ ނާކޮޓިކްސް އިންޓެލިޖެންސް ގުޅިގެން ހިންގި އޮޕަރޭޝަނެއްގައި، މި މައްސަލައާ ގުޅިގެން ހައްޔަރުކޮށްފައިވަނީ ޅ. ނައިފަރު، ފަލަކް، ޝާއިން އަލީ (27އ) އާއި، އއ. ފެރިދޫ، އިޙްރާމްގެ، އާއިޝަތު މާޝާ އަހްމަދު (20އ) އެވެ. އެ ދެ މީހުން ހައްޔަރުކުރީ މިމަހުގެ ހަތަރު ވަނަ ދުވަހު އެވެ.

މި އޮޮޕަރޭޝަންގައި ކޯޓު އަމުރެއްގެ ދަށުން ހެންވޭރު ގެއެއް ގެ އެޕާޓްމަންޓެއް ބަލައި ފާސްކޮށްފައިވާއިރު އެއެޕާޓްމަންޓުން 3 ކިލޯއަށް ވުރެ ގިނަ މަސްތުވާތަކެތި ފެނުނު ކަމަށް ފުލުހުން މައުލޫމާތު ދީފައިވެ އެވެ.

އެ ދެ މީހުންގެ ބަންދަށް ކޯޓުން އެންމެ ފުރަތަމަ ޖެހީ ފަސް ދުވަހެވެ. އެ މުއްދަތު ހަމަވުމުން އެމީހުންގެ ބަންދާމެދު ގޮތެއް ނިންމުމަށް އިއްޔެ ކްރިމިނަލް ކޯޓަށް ވަނީ ހާޒިރުކޮށްފައެވެ.

އަދި އެކޯޓުންވަނީ ދެ މީހުން 30 ދުވަހަށް ބަންދުގައި ބެހެއްޓުމަށް އަމުރުކޮށްފަ އެވެ.

މި ދެމީހުންގެ ބަންދު އަމުރުގަައިވާގޮތުން މަސްތުވާތަކެތި ފެނުނު އެޕާޓްނަންޓް ކުއްޔަށް ނަގާފައިވަނީ އަންހެން މީހާގެ ނަމުގައެވެ.

އަދި އެ ދެމީހުން ތިބި ތަނުން ހާމައަށް ބަހައްޓާފައިހުރި މަސްތުވާތަކެތި ފެންނަން ހުރިކަން އެނގޭ ކަމަށާއި މަސްތުވާތަކެތި ފެނުނު ތަނުން މަސްތުވާތަކެތި ބަންދުކުރަން ބޭނުންކުރާ އާލާތްތައްވެސް ފެނިފައިވާ ކަމަށް ކޯޓު އަމުރުގައި ބުނެފައިވެ އެވެ.

މީގެ އިތުރުން މައްސަލާގައި ހައްޔަރުކުރި ފިރިހެން މީހާ އަކީ ކުށުގެ ރިކޯޑް އޮތް ފަރާތެއްކަން އަމުރުގައި ފާހަގަކޮށްފައިވެއެވެ.