ރައީސް ޔާމީން މިނިވަންކުރެއްވުމަށް، އެމްޑީޕީން ޖޭއެސްސީއަށް މައްސަލަ ހުށަހެޅުއްވުމަކީ ބޮޑު ޖޯކެއް: ހީނާ

ކުރީގެ ރައީސް އަބްދުالله ޔާމީން އަބްދުލް ގައްޔޫމް މިނިވަން ނުވެގެން ޖުޑީޝަލް ސާވިސް ކޮމިޝަން، ޖޭއެސްސީއަށް އެމްޑީޕީގެ ފަރާތުން މައްސަލަ ހުށަހެޅުމަކީ “ބޮޑު ޖޯކެއް” ކަމަށް ޕީއެންސީގެ މަޖިލިސް އިންތިޚާބުގެ އިސް ތަރުޖަމާނު، އަދި އެންސްޕާގެ ސީއީއޯ ހީނާ ވަލީދު ވިދާޅުވެއްޖެއެވެ.

ރައީސް ޔާމީންގެ ޝަރީއަތް މަޑުޖެހިފައިވަނީ ސަރުކާރުން ނުފޫޒު ފޯރުވައިގެން ކަމަށް ހިތަދޫ އުތުރު ދާއިރާއަށް ފަސްވަނަ ދައުރަކަށް ވާދަކުރައްވާ، ރައްޔިތުންގެ މަޖިލީހުގެ ރައީސްގެ އަދި ޖޭއެސްސީގެ މެންބަރު މުހައްމަދުގެ އަސްލަމު ދާދިފަހުން ވަނީ ވިދާޅުވެފައެވެ. އަދި އެ މައްސަލަ ޖޭއެސްސީއަށް ހުށަހަޅުއްވާނެ ކަމަށް ވެސް އޭނާ ވިދާޅުވިއެވެ.

އަސްލަމްގެ އެ ވާހަކަތަކަށް ރައްދު ދެއްވަމުން، ޕީޕީއެމް/ޕީއެންސީގެ މަޖިލިސް އިންތިހާބުގެ ތަރުޖަމާނުގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ހީނާ ވަނީ، އެއީ ބޮޑު ޖޯކެއްގެ ގޮތަށް ސިފަ ކުރައްވާފައެވެ.

ރައީސް ޔާމިން މިނިވަންކުރުމަށްޓަކައި އެބޭފުޅުން ޖޭއެސްސީއަށް މައްސަލަ ހުށަހަޅާ ވާހަކަ. ދެން މިވެސް ވަރަށް ބޮޑު ޖޯކަކަށް ހަގީގަތުގައި އަޅުގަނޑުމެންނަށް މިވަނީ. މައްސަލަ ބަލަން ހައިކޯޓުގައި ތިއްބެވި ތިން ފަނޑިޔާރުންނަކީވެސް އެމްޑީޕިގެ ސަރުކާރުން އައްޔަނު ކުރެއްވި ފަނޑިޔާރުން. މަޖިލީހުގެ ރައީސް (އަސްލަމް) އަކީ ޖޭއެސްސީގައި އިންނަވާ ބޭފުލެއް. އެއީ އެމްޑީޕީގެ ބޭފުޅެއް. ދެން ޖޭއެސްސީގައި ތިބީވެސް ހުސް އެމްޑީޕީ ބޭފުޅުން. ދެން މަޖިލިސް ރައީސް މި ވަޑައިގަންނަވަނީ އެމްޑީޕީގެ މެޖޯރިޓީ އޮތް މަޖިލީހަށް މި މައްސަލަ ބަލަން. އެހެންވީމާ މިވެސް ވަރަށް ބޮޑު ޖޯކަކަށް އަޅުގަނޑުމެންނަށް މިވަނީ.

ހީނާ ވަލީދު

ހީނާ ވިދާޅުވީ، އެމްޑީޕިގެ ވެރިކަމުގައި، އެ ޕާޓީއަށް މަޖިލީހުގެ ސުޕަމެޖޯރިޓީ އޮވެގެން ނުކުރެވުނު ކަމެއް، އަލުން އެ މެޖޯރިޓީ ދީގެންވެސް ނުކުރެވޭނެ ކަމަށެވެ.

މީގެ އިތުރުން، ހީނާ ވަނީ، 19 ވަނަ ރައްޔިތުންގެ މަޖިލީހުގެ އިންތިޚާބު އައި އިރު، އޭރުގެ އިދިކޮޅު ލީޑަރ ހުންނެވީ ޖަލުގައި ކަމަށާ، އެހެންކަމުން އިދިކޮޅު ފަރާތްތަކަށް ކެންޕެއިން ކުރުމުގެ ފުރުސަތުވެސް ހަނިވެގެން ދިޔަ ކަމަށެވެ.

އެހެން ނަމަވެސް، މިފަހަރުގެ މަޖިލީހުގެ އިންތިޚާބުގައި އިދިކޮޅުގެ ހުރިހާ ލީޑަރުންވެސް ތިބީ މިނިވަންކަމާއި އެކު ކެންޕެއިން ކުރަން ދޫކޮށްލެވިފައި ކަންވެސް އޭނާ ފާހަގަކުރެއްވިއެވެ.