އުމުރުން ދުވަސްވީ އަންހެނަކާ މާރާމާރީ ހިންގި މައްސަލަ ފުލުހުން ބަލަން ފަށައިފި

މާލޭގެ ގޯޅިގަނޑެއްގައި އުމުރުން ދުވަސްވީމީހަކާ ޒުވާން ފުރައިގެ މީހަކު މާރާމާރީ ހިންގި ވީޑިއޯއާ ގުޅޭ މައްސަލަ ފުލުހުން ބަލަން ފަށައިފިއެވެ.

މިކަމާ ގުޅޭގޮތުން ފުލުހުން މިރޭ ބުނެފައިވަނީ، މާލޭ ހަލަވެލި ގޯޅީގައި ހިނގި މާރާމާރީގެ މައްސަލަ ފުލުހުން ބަލަމުންދާކަމަށެވެ. ބަޔަކު ހަމަނުޖެހުން ހިންގައިގެން އުޅޭކަން ފުލުހުންނަށް ރިޕޯޓްކޮށްފައިވަނީ މިރޭގެ 20:59 ހާއިރުކަމަށް ފުލުހުން ބުންޏެވެ.

މި މައްސަލާގައި މީހަކު ހައްޔަރުކުރިކަމެއް ފުލުހުން ބުނެފައެއް ނުވެއެވެ.

ސޯޝަލް މީޑިއާގައި މިރޭ ދައުރުވި ވީޑިއޯއެއްގައި ފެނިގެންދަނީ ގޯޅިގަނޑެއްގައި ހިނގާދިޔަ މާރާމާރީއެއްގައި ދޮށީ އުމުރުގެ އަންހެނެއް ބޮލުގައި ޒުވާން ފުރައިގެ ފިރިހެނަކު ތަކުރާރުކޮށް ޖަހާ މަންޒަރެވެ. އޭރު އެހެން މީހަކު އެ ފިރިހެންމީހާ ދުރުކުރުމަށް މަސައްކަތްވެސް ކުރެއެވެ. ނަމަވެސް އެ ފިރިހެންމީހާ ތަކުރާރުކޮށް އަންހެންމީހާ ބޮލުގައި ޖެހުމަށްފަހު އެތަނުން ދެއެވެ.

މާލޭގައި ބައެއް ފަހަރު ހިންގާ މާރާމާރީތަކުގައި އާއްމުކޮށް މިކަހަލަ މަންޒަރުތައް ފެނިގެން ގޮސްފައިވަނީ އާއިލީ މައްސަލަތަކުގެ ތެރެއިން އުފެދިގެންދާ ހަމަނުޖެހުންތަކުގައެވެ. މިފަދަ ބައެއް މައްސަލަ ތަކުގައި މީގެ ކުރިން ތޫނު އެއްޗެހިންވެސް ހަމަލާދީފައި އެބަހުއްޓެވެ. އަދި މިފަދަ ގިނަ މައްސަލަތައް އެންމެފަހުން ގޮސް ގުޅިފައި ހުންނަނީ މަސްތުވާތަކެއްޗާކަމަށް ފުލުހުން ހާމަކުރާ މައުލޫމާތުތަކުން އެނގެއެވެ.