މިހާތަނަށް 82 ރަށުގައި އޭޓީއެމް، 122000 މުއާމަލާތް ހިންގައިފި

މި އަހަރުގެ މިހާތަނަށް 82 ރަށެއްގައި އޭޓީއެމް ބަހައްޓާ ހިދުމަތް ފަށާފައިވާ ކަމަށް ބެންކު އޮފް މޯލްޑިވްސް އިން ބުނެފި އެވެ.

ބެންކުން އާންމުން ކުރި ތަފާސް ހިސާބު ދައްކާގޮތުން އިއްޔެގެ ނިޔަލަށް މި އަހަރުގެ މިހާތަނަށް 82 ރަށެއްގައި ވަނީ އޭޓީއެމް ހުޅުވާފަ އެވެ. މި ރަށްތަކުގައި ބެހެއްޓުނު އޭޓީއެމް މެދުވެރިކޮށް ކުރި މުއާމަލާތަތަކުގެ އަދަދު ވަނީ 122,000 ވުރެ މަތީގަ އެވެ.

އަދި މި މުއާމަލާތްތަކުގެ ފައިސާގެ ޖުމްލަ އަދަދު ހުރީ 313 މިލިއަން ރުފިޔާއަށް ވުރެ މަތީގަ އެެވެ. އަދި ޖަމާކޮށްފައިވާ ފައިސާގެ ޖުމްލަ އަދަދަކީ 145 މިލިއަން ރުފިޔާ އެވެ.

ބީއެމްއެލް އޭޓީއެމް ވިއުގަ މެދުވެރިކޮށް ދުވާލެއްގެ މައްޗަށް އެވްރެޖްކޮށް ބޭނުންކުރާ މިންވަރު ހުރީ މާލެ ސިޓީގައި 14,000 މުއާމަލާތުން މަތީގަ އެވެ. އެއީ ޖުމްލަ 78 މިލިއަން ރުފިޔާ އެވެ. އަތޮޅުތަކަށް ބަލާއިރު އެ މިންވަރު ހުރީ 9,000 ވުރެ މަތީގަ އެވެ. އެ މުއާމަލާތްތަކުގެ އެވްރެޖް 25 މިލިއަން ރުފިޔާއަށް ވުރެ މައްޗެވެ.

މީހުން ދިރިއުޅޭ ހުރިހާ ރަށެއްގައި އޭޓީއެމް ހިދުމަތް ފެށުމަކީ ރައީސް މުޢިއްޒުގެ ވައުދެކެވެ. މި އަހަރު ނިމުމުގެ ކުރީން އެ ވައުދު ފުއްދުމަށް ވަނީ އަމާޒު ހިފާފަ އެވެ.