އައިއޭއީއޭގައި ރާއްޖެއިން ބައިވެރިވުމަށް މަޖިލީހުން ރުހުންދީފި

އިންޓަރނޭޝަނަލް އެޓޮމިކް އެނަރޖީ އޭޖެންސީ (އައިއޭއީއޭ) ގައި ރާއްޖެއިން ބައިވެރިވުމަށް ރައްޔިތުންގެ މަޖިލީހުން ރުހުން ދީފިއެވެ.

އައިއޭއީއޭގައި ބައިވެރިވުމަށް ވަޒީރުންގެ މަޖިލީހުގެ ނިންމެވުމާ ގުޅިގެން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު، މި މައްސަލައިގައި މަޖިލީހުގެ ރުހުން ހޯދުމަށް ހުށަހެޅުމަށް ނިންމަވާފައިވަނީ މިދިޔަ މަހުގެ 2 ވަނަ ދުވަހުއެވެ.

އެއާއިއެކު މި މައްސަލަ ދިރާސާ ކުރުމަށް މިމަހުގެ 14 ވަނަ ދުވަހު މަޖިލީހުން ޚާރިޖީ ގުޅުންތަކުގެ ކޮމިޓީއަށް ފޮނުވާފައިވާއިރު، އެ ކޮމިޓީން ދިރާސާކޮށް ނިންމި ގޮތުގެ ރިޕޯޓު މިއަދު ވަނީ ތަޅުމަށް ހުށަހަޅާފައެވެ.

އައިއޭއީއޭ ގައި ރާއްޖެއިން ބައިވެރިވުމަށް މަޖިލީހުން ރުހުން ދީފައިވަނީ ވޯޓުގައި ބައިވެރިވެވަޑައިގެންނެވި 61 މެންބަރުންގެ އިއްތިފާގުންނެވެ. ނުފެންނަ ކަމަށް އެއްވެސް މެންބަރަކު ވޯޓު ދެއްވާފައެއް ނުވެއެވެ.

މީގެ ކުރިން ސަރުކާރުން ވަނީ ނިއުކްލިއަރ މެޑިސިންގެ ދާއިރާއިން ބޭނުންވާ އެހީތެރިކަން ހޯދުމަށް އައިއޭއީއޭ އާއި ގުޅުމުގެ މަސައްކަތް ރާއްޖެއިން ފެށުމަށް ނިންމާފައިވާކަމަށް ހާމަކުރައްވާފައެވެ.

މީގެ ސަބަބުން ރައީސް ޑރ.މުޢިއްޒުގެ އެޖެންޑާގައިވާ ކެންސަރ ހޮސްޕިޓަލަށް އެޅުމަށް މަގުފަހި ވެގެންދާނެ ކަމަށާއި، އައިއޭއީއޭއާ ގުޅުމަށް ރާއްޖެއިން ކުރާ މަސައްކަތުގައި އިސްކޮށް ހަރަކާތްތެރިވާނީ ދިފާޢީ ވުޒާރާއިންކަމަށާއި، މިއީ ދިގު މުއްދަތެއްގެ ތެރެއިން ކުރެވޭނެ މަސައްކަތެއްކަމަށް ސަރުކާރުން ބުނެއެވެ.