އަންނަ ހަފްތާގައި ޣައްޒާގައި ހިނގަމުންދާ ހަނގުރާމަ ހުއްޓާލާނެ ކަމުގެ އުންމީދު އެބައޮތް: ޖޯ ބައިޑަން

އަންނަ ހަފްތާގެ ތެރޭގައި، ޣައްޒާއަށް ދެމުންދާ އުދުވާނީ ހަމަލާތައް ހުއްޓުމަކަށް އަންނާނެ ކަމުގެ ވަރަށް ބޮޑު އުންމީދެއް އެބަ އޮތް ކަމަށް އެމެރިކާގެ ރައީސް ޖޯ ބައިޑަން ވިދާޅުވެއްޖެއެވެ.

ޖޯ ބައިޑެން ވިދާޅުވީ ޔަހޫދީ ފައުޖުން ފަލަސްޠީނުގެ ޣައްޒާގެ މުސްލިމުންނާ ދެކޮޅަށް ހިންގަމުންދާ ލާއިންސާނީ ޢުދުވާންތައް ހުއްޓާލުމަކާއި ގާތް ވެއްޖެ ކަމަށާއި، އަންނަ ހޯމަ ދުވަހުގެ ނިޔަލަށް ހަނގުރާމަ ހުއްޓާލާނެ ކަމުގެ އުންމީދު އެބަ އޮތް ކަމަށެވެ.

"އަޅުގަނޑަށް މަޢުލޫމާތު ލިބިފައިވާ ގޮތުގައި މަޝްވަރާތަކުގައި ބޮޑެތި ކުރިއެރުންތަކެއް ވަނީ ހޯދިފައި. އެއްބަސްވުމެއް އެކުލަވައިލުން އޮތީ ވަރަށް ގާތްވެފައި. ނަމަވެސް, އަދިވެސް ކުރަން ޖެހޭ ގިނަ މަސައްކަތްތަކެއް އެބަހުރި. އަޅުގަނޑުގެ އުންމީދަކީ, އަންނަ ހަފުތާގެ ހޯމަ ދުވަހުގެ ކުރިން އެއްބަސްވުމެއް އެކުލަވައިލާ ސޮއި ކުރުން،"

ބައިޑެން ވިދާޅުވިއެވެ.

ބައިޑެން މިފަދައިން ވިދާޅުވެފައިވާއިރު، ހަ ހަފްތާ ވަންދެން ހަނގުރާމަ ހުއްޓާލުމަށް އަންނަނީ މަޝްވަރާތައް ކުރެވެމުންނެވެ. މިސްރާއި ގަތަރާއި އެމެރިކާ މެދުވެރިވެގެން ކުރިއަށް ގެންދާ މި މަޝްވަރާތަކަށް ޔަހޫދީންނާއި ޙަމާސްގެ މުޖާހިދުން ދޯހާ ގައި ތިބި ނަމަވެސް ދެ ބައި މީހުން ބައްދަލުކޮށްފައެއް ނުވެއެވެ. މި އެއްބަސްވުމުގެ ތެރެއިން، ރަހީނު ކޮށްފައިވާ އަސީރުން މިނިވަން ކުރުމާ ގުޅޭ ގޮތުންވެސް ދަނީ މަޝްވަރާތައް ކުރެވެމުންނެވެ.

ކުރިއަށް އޮތް ބަރަކާތްތެރި ރަމަޟާން މަސް ފެށުމުގެ ކުރިން އެއްބަސްވުމެއް އެކުލަވައިލައި ޢުދުވާންތަކަށް ހުއްޓުމެއް ގެނެސް އަސީރުން މިނިވަން ކުރުމުގެ މަސައްކަތް ފެށުމަށް ބާރު އަޅަމުން ދިޔަ ނަމަވެސް ޔަހޫދީންނާއި ޙަމާސްގެ މުޖާހިދުން ދަނީ ދެ ފަރާތުގެ ދެމެދުގައި ބަހުގެ ޙަމަލާތައް ބަދަލު ކުރަމުންނެވެ.

މަޝްވަރާތައް ކުރިއަށް ދިޔަ ނަމަވެސް، މެދުކެނޑުމެއް ނެތި އަދިވެސް އަނިޔާވެރި ޔަހޫދީން ދަނީ ޣައްޒާގެ ގެތަކަށް ބޮން އަޅާ ސުންނާފަތި ކުރަމުންނެވެ. އޮކްޓޫބަރު މަހުގެ 7 ވަނަ ދުވަހުން ފެށިގެން ކުރިއަށްދާ މި ގަތުލުއާއްމަށް 6 މަސްވުމާއި ގާތްވެފައިވާއިރު، އަނިޔާވެރި އިސްރާއީލުން ދިން ހަމަލާތަކުގައި މިހާތަނަށް ގާތްގަނޑަކަށް 30،000 ފަލަސްތީން ރައްޔިތުން ޝަހީދުވެ، 70,000 އާއި ގާތްކުރާ އަދަދަކަށް މީހުން ވަނީ ޒަހަމްވެފައެވެ.