އަލަށް އަށް ވަކީލަކު ގާނޫނީ ވަކީލު ކަމުގެ ހުވާކުރައްވައިފި

ގާނޫނީ ދާއިރާއަށް އަލަށް ގުޅިވަޑައިގެންނެވި 8 ވަކީލަކު ވަކީލުކަމުގެ ހުވާ ކުރައްވައި ވަކީލުގެ ހުއްދަ ހޯއްދަވައިފިއެވެ.

މިއަދު ބާ ކައުންސިލުން ބޭއްވި މި ރަސްމިއްޔާތުގައި ވަކީލުންނަށް ހުވާލައިދެއްވީ ދިވެހިރާއްޖޭގެ ހައި ކޯޓުގެ ފަނޑިޔާރު ހުސައިން މަޒީދެވެ. އަދި ވަކީލުކަމުގެ ހުއްދަ ހަވާލުކޮށްދެއްވީ ބާ ކައުންސިލްގެ ރައީސް ހުސައިން ސިރާޖެވެ.

ބާ ކައުންސިލްގެ ރައީސް ހުސައިން ސިރާޖް މިރަސްމިއްޔާތުގައި ވާހަކަފުޅު ދައްކަވަމުން ވިދާޅުވިގޮތުގައި، މިއަހަރުގެ މިހާތަނަށް 407 ބޭފުޅަކު ގާނޫނީ ދާއިރާއާ ގުޅި، ވަކީލުކަމުގެ ހުވާ ކުރައްވާފައިވާކަން ފާހަގަކުރެއްވިއެވެ.

"މިއީ ގާނޫނީ ދާއިރާއަށް އަންނަ ހެޔޮ ބަދަލުތަކުގެ ހެއްކެއް، އަދި މިއީ ރާއްޖޭގެ ޒުވާނުން ގާނޫނީ ދާއިރާއަށް ދޭ އަހައްމިއްޔަތުކަން ދައްކުވައިދޭ ކަމެއް،

ސިރާޖް ވިދާޅުވިއެވެ.

ދިވެހިރާއްޖޭގެ ހައި ކޯޓުގެ ފަނޑިޔާރު ހުސައިން މަޒީދު ވިދާޅުވި ގޮތުގައި، ގާނޫނީ ވަކީލުކަމަކީ ވަރަށް މުހިންމު އަދި ޒިންމާދާރު މަޤާމެކެވެ.

"ގާނޫނީ ވަކީލުކަން ކުރުމުގެ ޒިންމާއަކީ ކުޑަ ކަމެއް ނޫން. އެއީ ވަރަށް ބޮޑު މަސްއޫލިއްޔަތެއް,"

މަޒީދު ވިދާޅުވިއެވެ.

އަދި އެ ޒިންމާ އަދާކުރުމުގައި ފަރުވާކުޑަ ކުރެވިއްޖެނަމަ، އެކަމުގެ ސަބަބުން ވަރަށް ގިނަ ބަޔެއްގެ ޙައްޤުތައް ގެއްލި، އިޢާދަނުކުރެވޭ ވަރުގެ ބޮޑެތި ގެއްލުންތައް ކުރިމަތިވެދާނެ ކަމަށް އޭނާ އިންޒާރު ދެއްވިއެވެ.

ފަނޑިޔާރު މަޒީދު އިތުރަށް ފާހަގަކުރެއްވި ގޮތުގައި، ފަނޑިޔާރުންނަށް އަދުލު އިންސާފުން މައްސަލަތައް ނިންމުމުގައި ވަކީލުންގެ ދައުރު ވަރަށް މުހިންމެވެ.

"ގާނޫނީ ވަކީލުން ދިރާސާ ކުރައްވައިގެން، ތައްޔާރުވެވަޑައިގެން އެކުރައްވާ ވަކީލުކަމަކީ ނުވަތަ އެ ހުށަހަޅުއްވާ ހުށަހެޅުންތަކަކީ އަދުލު އިންސާފު ޤާއިމު ކުރުމަށް ފަނޑިޔާރުންނަށް ވެދެވޭ ވަރަށް ބޮޑު އެހީތެރިކަމެއް,"

މަޒީދު ވިދާޅުވިއެވެ.

ބާ ކައުންސިލްގެ ރައީސް ސިރާޖް އިތުރަށް ވިދާޅުވީ، ގާނޫނީ ދާއިރާއަކީ އަބަދުވެސް ބަދަލުތައް އަންނަ ދާއިރާއެއް ކަމަށާއި، ބަދަލުވަމުންދާ އިޤްތިޞާދީ، އިޖްތިމާޢީ އަދި ސިޔާސީ ޙާލަތްތަކާ ގުޅިގެން އާ ޤާނޫނުތައް ތަޢާރަފުކުރަމުން އަންނަ ކަމަށެވެ. "ރާއްޖޭގައި ތަޢާރަފުކުރާ ގިނަ ޤާނޫނުތަކަކީ ދުނިޔޭގެ ތަހުޒީބުވެފައިވާ މުޖުތަމަޢުތަކުގައި ހުރި ޤާނޫނުތަކާ ވަރަށް ގިނަ ގޮތްގޮތުން އެއްގޮތް ޤާނޫނުތަކެއް," ސިރާޖް ވިދާޅުވިއެވެ.

މި ބަދަލުތަކާ ގުޅިގެން، ސިރާޖް ވަކީލުންނަށް އިރުޝާދު ދެއްވީ އަބަދުވެސް އައު ކަންކަން ދަސްކުރަމުން ދިއުމުގެ މުހިންމުކަމަށެވެ.

"ވަކީލުކަމުގައި މަސައްކަތްކުރާއިރު، އަލަށް ދަސްކުރަންޖެހޭ ކަންތައްތަކާއި މުރާޖަޢާ ކުރަންޖެހޭ ކަންތައްތަކާއި ދިރާސާ ކުރަންޖެހޭ ކަންތައްތައް، މި ދާއިރާއިން ކިޔެވިއިރަށް ވުރެ ގިނައިން ކުރަން ޖެހޭނެ," އޭނާ ވިދާޅުވިއެވެ.

މި ރަސްމިއްޔާތަކީ ބާ ކައުންސިލުން ވަކީލުންނަށް ހުވާލައިދެއްވުމަށް މި އަހަރު ބޭއްވި ތިން ވަނަ ހަފްލާއެވެ.