މަންމާފުޅު އެދިލެއްވުމުން ރައީސް މައުމޫންގެ ދަރަނި މާފުކޮށްދީފިން: ޖާބިރު

ޑީއާރްޕީގެ ލީޑަރ އަދި ކާށިދޫ ދާއިރާގެ މެންބަރު އަބްދުﷲ ޖާބިރަށް ކުރީގެ ރައީސުލްޖުމްހޫރިއްޔާ އަލްއުސްތާޛު މައުމޫން އަބްދުލްގައްޔޫމް ދައްކަވަން އޮތްކަަމަށް ބުނާ ފައިސާތައް މާފުކޮށްދެއްވައިފިކަމަށް ޖާބިރު ވިދާޅުވެއްޖެއެވެ.

ރާއްޖޭގެ އޮންލައިން ނޫހެއްކަމުގައިވާ "ވަގުތު"އަށް މައުލޫމާތު ދެއްވަމުން ޖާބިރު ވިދާޅުވީ ރައީސް މައުމޫންގެ ދަރަނި މާފުކުރުމަށް ނިންމީ، އެކަން ކުރުމަށް ޖާބިރުގެ މަންމާފުޅު އެދިލެއްވުމުންކަމަށެވެ. އެގޮތުން ރައީސް މައުމޫން އިތުރަށް ތަންތަަނަށް ނުދެމުމަށް ޖާބިރުގެ މަންމާފުޅު ވިދާޅުވިކަމަށް އެބޭފުޅާ ވިދާޅުވިއެވެ.

ޖާބިރު އިތުރަށް ވަނީ ރައީސް މައުމޫނާއި ޖާބިރަކީވެސް ހުވަދު އަތޮޅަށް ނިސްބަތްވާ ދެފަރާތްކަމުން ދެބޭފުޅުން ތިމާގެވެސް ވާނެކަމަށް ވިދާޅުވެފައެވެ.

ޖާާބިރު މީގެ ކުރިން ވިދާޅުވެފައިވާ ގޮތުގައި ރިޔާސީ އިންތިޚާބުގެ ދުވަސްވަރުގައި ރައީސް މައުމޫންވަނީ އެބޭފުޅާގެ އަމިއްލަ ގެކޮޅުކަމުގައިވާ ކިނބިގަސްދޮށުގެ ރަހުނުގައި ބެހެއްޓެވުމަށްފަހު ޖާބިރުގެ އަތުން ދަަރަންޏަށް ފައިސާ ނަންގަވާފައެވެ. މި ފައިސާގެ ޖުމްލަ އަދަދު 29މިިލިޔަން ރުފިޔާއަށް އަރާނެކަމަށް ޖާބިރު ވިދާޅުވިއެވެ.

"29 މިލިއަން ރުފިޔާ މައުމޫނަށް ދިނީ ލޯނެއްގެ ގޮތުގައި އަނބުރާ ދައްކާ ގޮތަށް އިންޓަރެސްޓް ވެސް އަރާ ގޮތަށް. އަދި ފައިސާ ދިނުމާ ގުޅޭ މަޝްވަރާތައް ބޭއްވީ މެލޭޝިއާގެ ވެރިރަށް ކުއާލަލަމްޕޫރުގައި ހުންނަ ހޮޓަލެއްގައި"،އެބޭފުޅާ ވިދާޅުވިއެވެ.

މި މައްސަލަ ޖާބިރު ވަނީ ދެފަހަރެއްގެ މަތިން ފުލުހުންނަށްވެސް ހުށައަޅުއްވާފައެވެ.