ތިނަދޫން ދޫކުރި ބިންތަކަށް ކުލި ނުދައްކާތީ ފިޔަވަޅު އަޅަންފަށައިފި

ތިނަދޫ ސިޓީ ކައުންސިލުން އެކި ފަރާތްތަކަށް ދޫކޮށްފައިވާ ބިންތަކުގެ ތެރެއިން ކުލި ދައްކަމުންނުދާ ފަރާތްތަކަށް ފިޔަވަޅު އެޅުމުގެ މަސައްކަތް ކައުންސިލުން ފަށައިފިއެވެ.

ތިނަދޫ ސިޓީ ކައުންސިލްގެ އިދާރާއިން ނެރުނު އިއުލާނެއްގައި ބުނެފައިވަނީ، ކުއްޔަށް ދޫކޮށްފައިވާ ބިންތަކުން ކުލި ނުލިބޭ މައްސަލާގައި ބިންތައް ނެގި ފަރާތްތަކަށް ގާނޫނީގޮތުން ފިޔަވަޅު އަޅަން ފަށާފައިވާކަމަށެވެ.

ތިނަދޫ ސިޓީ ކައުންސިލުން ބުނީ އެކި ފަރާތްތަކަށް ދޫކޮށްފައިވާ ބިންތަކުން ކުލީގެ ގޮތުގައި 29 މިލިއަނަށްވުރެ ގިނަ ރުފިޔާ ލިބެންޖެހޭ ކަމަށެވެ. ކައުންސިލުން ވަނީ ބިންތަކަށް ކުލި ނުދައްކާ ފަރާތްތަކުގެ ލިސްޓް އާއްމުކޮށްފައެވެ. ބިމުކުލި ނުދައްކާ މި ލިސްޓްގައި ޖުމްލަ 50 ފަރާތެއް ހިމެނެއެވެ. މީގެ ތެރޭގައި ކުންފުނިތަކާއި އަމިއްލަ ފަރުދުން ހިމެނެއެވެ.

ބިމުކުލި ނުދައްކާ ފަރާތްތަކުގެ ތެރޭގައި ސަރުކާރުގެ މަޝްހޫރު ކުންފުނިތަކުގެ އިތުރުން މަޝްހޫރު އަމިއްލަ ކުންފުނިތައް ހިމެނެއެވެ.

ތިނަދޫއަކީ ރާއްޖޭގެ ދެކުނުގައި މީހުން އުޅޭ ރަށްތަކުގެ ތެރެއިން އެންމެގިނައިން މީހުން ދިރިއުޅެމުން އަންނަ އެއް ރަށެވެ. މައުލޫމާތު ލިބިފައިވާ ގޮތުގައި ތިނަދޫގައި 12،000 ހާހަށްވުރެ ގިނަ މީހުން ދިރިއުޅެއެވެ. ތިނަދޫއަކީ ދިރިއުޅުމުގެ ވަސީލަތްތައް ލިބެންހުރި ރަށެކެވެ. މިގޮތުން ޓާޝިއަރީ ފެންވަރުގެ ހޮސްޕިޓަލަކާއި ޔުނިވަރސިޓީ ލެވެލްގެ ކޯސްތައް އެރަށުގައި ހިންގަމުންދާއިރު، ރާއްޖޭގެ އެހެން ރަށްރަށާ އަލާބަލާއިރު، އެރަށުގައި އިގްތިސާދީ ވަސީލަތްތައްވެސް ޤާއިމްވެފައި ހުރިކަން ފާހަގަކޮށްލެވެއެވެ