އަޅުގަނޑުމެންގެ މުޅި ޤައުމު މިއޮތީ މަސްތުވާތަކެތީގެ ވަބާގައި ޖެހި ހަނާވެފައި: އާދަމް ޝަރީފް

އަޅުގަނޑުމެންގެ މުޅި ޤައުމު މިއޮތީ މަސްތުވާތަކެތީގެ ވަބާގައި ޖެހި ހަނާވެފައި ކަމަށާއި އެކަމުން ސަލާމަތް ވުމަށް އެންމެން ގުޅިގެން މަސައްކަތްތަކެއް ކުރަންޖެހިފައިވާ ކަމަށް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވަޒީރު އާދަމް ޝަރީފް އުމަރު ވިދާޅުވެއްޖެއެވެ.

ވަޒީރު އާދަމް ޝަރީފް މިފަދައިން ވިދާޅުވެފައިވަނީ ޖަމިއްޔަތުއްސަލަފުން އިސްނަގައިގެން އއ.މަތިވެރީގައި ކުރިއަށްގެންދާ މަދަނީ ޖަމުޢިއްޔާތަކުގެ މަހާސިންތާ ހުޅުވުމުގެ ރަސްމިއްޔާތުގައި ވާހަކަ ދައްކަވަމުންނެވެ.

އެ ރަސްމިއްޔާރުގައި ވަޒީރު ވިދާޅުވީ މަސްތުވާތަކެތީގެ މައްސަލައަކީ ރާއްޖެއަށް ދިމާވެފައިވާ އެންމެ ބޮޑުއެއް މަސަލަކަމަށާއި އެކަމާއި ގުޅިގެން ރާއްޖޭގައި ދިމާވާ އިޖުތިމާއީ މައްސަލަތަކާއި ، އެކަމާއި ގުޅިގެން ހެދިފައިވާ ޤާނޫނުތަކުގެ ސަބަބުން އަނިޔާ ލިބެމުންދާ ފަރާތްތަކުގެ މައްސަލަ އަކީ ޤައުމީ ބޮޑުބައްސަލައެއް ކަމަށެވެ.

އޭގެ އިތުރުން ޤާނޫނުތަކުގެ ސަބަބުން އަނިޔާ ލިބެމުންދާ ފަރާތްތަކުގެ އަނިޔާ އާއި ގުޅިގެން ވޭންތައް ތަހައްމަލު ކުރަމުން ގެންދާ ފަރާތްތަކުގެ މައްސަލަ އާއި ، އެކަންތަކާއި ގުޅިގެން ވީރާނާ ވަމުންދާ ތުއްތު ކުދިންގެ މުސްތަޤްބަލާއި އެކުދިންގެ ހަޔާތަކީ އަޅުގަނޑުމެންގެ ތެރެއިން އެކަކަށް ވެސް ދެބަސްވެވެން ނެތް މައްސަލައެއް ކަމަށްވެސް ވަޒީރު ވިދާޅުވިއެވެ.

"އަޅުގަނޑުމެންގެ މުޅިޤައުމު މިއޮތީ މަސްތުވާ ތަކެތީގެ ވަބާގައި ޖެހި ހަނާވެފައި."

ވަޒީރު ވިދާލުވިއެވެ.

މި ރަސްމިއްޔާތުގައި ވާހަކަ ދައްކަވަމުން ވަޒީރު އިތުރަށް ވިދާޅުވީ ޤައުމަށް ދިމާވެފައިވާ މިފަދަ މައްސަލަތައް ހައްލުކުރުމުގައި އަޅުގަނޑުމެން އެންމެންވެސް މަސައްކަތް ކުރަން ޖެހޭ ކަމަށާއި އަދި މިކަމުގައި އެންމެ މުހިއްމު ހިއްސާއެއް އަދާކުރެވޭނެ އެއްބަޔަކީ ރާއްޖޭގައި އޮތް މަދަނީ ޖަމާއަތްތައް ކަމަށެވެ.

"ގައުމުގެ މިއަދުގެ ހާލަތް ބަދަލްކުރުމުގައި ކޮންމެ މީހެއްގެވެސް ހިއްސާ އެބަ އިތުރުކުރަންޖެހޭ. މިހާލަތް ބަދަލްކުރުމަށް އަޅުގަނޑުމެން މިއަދު މަސައްކަތް ނުކޮއްފިނަމަ ދެން ކުރިމަތިލާން ޖެހޭނީ ކޮންފަދަ ހާލަތަކާކަން މިއަދު ދަންނަވާކަށް ފަސޭހައެއްނޫން."

ވަޒީރު ވިދާޅުވިއެވެ.

މައުލޫމާތު ލިބިފައިވާ ގޮތުގައި މި މަހާސިންތާއަކީ ރާއްޖޭގެ ހުރިހާ އަތޮޅެއް ތަމްސީލްވާނެހެން ކޮންމެ އަތޮޅަކުން ޖަމްއިއްޔާއެއް ހިމަނައިގެން ކުރިއަށް ގެންދާ މަހާސިންތާއެކެވެ. މި މަހާސިންތާއަކީ މަދަނީ ޖަމްއިއްޔާތަކަށް ދިމާވާ މައްސަލަތަކާއި އެ މައްސަލަތައް ހައްލުކުރާނެ ގޮތްތަކާއި ބެހޭގޮތުން މަޝްވަރާކުރުމަށް ބޭއްވޭ ބައްދަލުވުމެކެވެ.