ވީއައިއޭއަކީ ދިވެހިންގެ ފަހުރެއް. އެކަން ދަމަހައްޓަންޖެހޭ: ޝަރީފް

ވެލާނާ އިންޓަރނޭޝަނަލް އެއާޕޯޓަކީ ދިވެހިންގެ ފަހުރެއްކަމަށާއި، އެކަން އެގޮތުގައި ދަމަހައްޓަންޖެހޭކަަށް ވެލާނާ އިންތަރނޭޝަނަލް އެއާޕޯޓް ހިންގާ ކުންފުނި، މޯލްޑިވްސް އެއާޕޯޓްސް ލިމިޓެޑްގެ ސީއީއޯ އަދި މެނޭޖިންގ ޑިރެކްޓަރު އިބްރާހިމް ޝަރީފް މުޙައްމަދު ވިދާޅުވެއްޖެއެވެ.

ދިވެހިންގެ މުސްތަގްބަލުގެ މުޅިން އައު ބާބެއް މިރޭ ފެށިގެންދިޔަކަން ފާހަގަކުރައްވަމުން ޝަރީފް ވިދާޅުވީ، އަޅުގަނޑުމެން މިރޭ މިސްރާބް ޖަހަނީ އަންނަން އޮތް ޖީލްތަކަށް ޤައުމީ މި އެއާޕޯޓް ހަވާލުކޮށްދިނުމަށްކަމަށެވެ. ޝަރީފް ވިދާޅުވީ އައު ޓާމިނަލްގެ މަސައްކަތް ނިންމާލެވުނީ ގޮންޖެހުންތަކާއެކު ކަމަށާއި، އައު ޓާމިނަލްގެ މަސައްކަތް ފަށައިގަނެވުނީ ކުރިން ހީކުރެވިފައިނެތް ވަރަށްބޮޑު މަސައްކަތްތަކެއްގެ ތެރެއިންކަމަށެވެ.

އަދުގެ ސަރުކާރުން ޓާމިނަލާ ހަވާލުވިއިރު ނިމިފައިވަނީ 30 އިންސައްތަ މަސައްކަތްކަން ފާހަގަކުރައްވަމުން ޝަރީފް ވިދާޅުވީ އަނެއް 70 އިންސައްތައިގެ މަސައްކަތާއެކު އައު ޓާމިނަލްގެ މަސައްކަތް ނިމިގެންދިޔައިރު، ކުރިން ނުކޮށްހުރި މުހިންމު އެތައްކަމެއް ނިންމާލެވުނުކަމަށެވެ. އެގޮތުން އައު ޓާމިނަލަށް ކަރަންޓް ދެވޭނެ ގޮތާއި، ފެން ހިންދާ ނިޒާމްފަދަ މުހިއްމު މަސައްކަތްތައް އެއަޕޯޓް މުއައްޒަފުންގެ ބުރަ މަސައްކަތްތަކާއެކު ނިންމާލެވުނުކަން ޝަރީފް ފާހަގަކުރެއްވިއެވެ.

"ދިވެހިދިދަ ހިފައިގެން އަންނަ ބޯޓުތަކާއި ބޭރުގެ އެކި ކަރަކަރައިގެ ބޯޓުތަކުން މިތަން ޒީނަތްތެރިވެގެންދާނެ.ނަމަވެސް ހަނދުމަނެތި ނުކުރައްވާތި. މިއީ ދިވެހިްނގެ ފަހްރު. އެންމެންގެ ޝަރަފް. މަރުހަބާ ޝުކުރު ހައްގުވެގެންވަނީ އަޅުގަނޑުމެން އެންމެނަށް. ފަސްވެދިޔަ ކާބަފައިންނާއި، އިސްވާންތިބި ދަރިންނާ، އަދި މިތަނުގައި ހިދުމަތަށް ނިކުންނަންތިބި މީހުންނާ މުއައްޒަފަކާ އިހްލާސްތެރި ހިދުމަތުގައި ދެމިތިބޭ ކޮންމެ ދަރިއަކާ، ތެދުވެރިވެ އިހްލާސްތެރިކަމާއެކު ހެޔޮގޮުގައި މި ފަހްރާ ޝަރަފް ދަމަހައްޓަވާތި" ވާހަކަފުޅު ނިންމަވާލައްވަމުން ޝަރީފް ވިދާޅުވިއެވެ.

ވީއައިއޭގެ އައު ޓަރމިނަލަކީ ޒަމާނީ ގިނަ ވަސީލަތްތަކާއެކު، އާ ޚިދުމަތްތައް ވެސް ހިމެނޭގޮތަށް ހުޅުވާ ޓަރމިނަލެކެވެ. މި ޓާމިނަލާއެކު ވީއައިއޭގެ ހިދުމަތް އެތައް ތަނަކުން ކުރިއަރައިގެންގޮސް ދިވެހިރާއްޖެ އަންނަ ފަތުރުވެރިންނަށް ވަރަށްބޮޑު ލުއިފަސޭހަކަމެއް ލިބިގެންދާނޭކަމަށް އެމްއޭސީއެލުން ފާހަގަކުރެއެވެ.

އައު ޓާމިނަލްގެ ފާހަގަކޮށްލެވޭ ބައެއް ހިދުމަތްތައް:

- ފުރާ މީހުން އަމިއްލައަށް ޗެކިންވުމަށް 47 ކައުންޓަރު

- ސެލްފް ޗެކިން ހަ ކިއޯސްކް

- އިމިގްރޭޝަން ކްލިއަރ ކުރުމަށް 20 ކައުންޓަރު

- 28 އެރައިވަލް އިމިގްރޭޝަން ކައުންޓަރު

- ފަސް ބެގޭޖް ކްލެއިމް ބެލްޓް

- 6 ފަސެންޖަރ ބޯޑިން ގޭޓް

އައު ޓާމިނަލް ތަރައްޤީކުރުމުގެ މަސައްކަތް ފަށާފައިވަނީ ކުރީގެ ރައީސް ޢަބްދުﷲ ޔާމީނުގެ ވެރިކަމުގައެވެ. އެއަށްފަހު ރައީސް ސޯލިހުގެ ވެރިކަމުގައިވެސް ވަނީ ޓާމިނަލްގެ މަސައްކަތް ކުރިއަށްގެންގޮސްފައެވެ.

ސައުދީގެ ބިންލާދިން ގްރޫއްޕާ ހަވާލުކޮށްގެން ތަރައްޤީކުރި އައު ޓާމިނަލަށް 5 ބިިލިއަނަށްވުރެ ގިނަ ރުފިޔާ ހޭދަވާނޭކަމަށް ސަރުކާރުން ވަނީ ބުނެފައެވެ. އެމްއޭސީއެލުން ބުނީ އައު މި ޓާމިނަލުން އަހަރެއްގެ ތެރޭގައި 7.5 މިލިއަން ފަސެންޖަރުންނަށް ހިދުމަތް ދެވޭނޭކަމަށެވެ.