ކުޑަކުދީންނަށް ޖިންސީ ގޯނާކުރި މީހުން ދޫކޮށްލުމަކީ ބަލައިގަނެވޭނެ ކަމެއްނޫން: ރައީސް ޑރ.މުއިއްޒު

ކުޑަކުދީންނަށް ޖިންސީ ގޯނާކުރި މީހުން ދޫކޮށްލުމަކީ ބަލައިގަނެވޭނެ ކަމެއްނޫންކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ރައީސް ޑރ.މުއިއްޒު މިފަދައިން ވިދާޅުވީ އެކްސްގައި ކުރެއްވި ޕޯސްޓެއްގައެވެ. މިގޮތުން ރައީސް ޑރ.މުއިއްޒު ވިދާޅުވީ، ކުޑަކުދިީންނަށް ޖިންސީ ގޯނާކުރިކަމުގެ ތުހުމަތުގައި ހައްޔަރުކޮށްފައިވާ ނުވަތަ ޙުކުމް ކޮށްފައިވާ މީހުންނަށް މަޢާފުދިނުމާއި ލުއިދީ ދޫކޮށްލުމަކީ އެއްގޮތަކަށްވެސް ބަލައިގަނެވޭނޭ ކަމެއްނޫން ކަމަށެވެ.

ރައީސް ޑރ.މުއިއްޒު ވިދާޅުވީ، މިފަދައިން ނިންމާ ނިންމުންތައް ލަސްނުކޮށް އިސްތިޢުނާފު ކުރުމަށް ސަރުކާރުން ޕްރޮސެކިއުޓަރ ޖެނެރަލް (ޕީޖީ) އޮފީހުގައި ދަންނަވަމުންދާ ކަމަށެވެ.

"ކުޑަކުދިީންނަށް ޖިންސީ ގޯނާކުރިކަމުގެ ތުހުމަތުގައި ހައްޔަރުކޮށް، ނުވަތަ ޙުކުމް ކޮށްފައިވާ މީހުންނަށް މަޢާފުދިނުން، ނުވަތަ ލުއިދީ ދޫކޮށްލުމަކީ އެއްގޮތަކަށްވެސް ބަލައިގަނެވޭނޭ ކަމެއްނޫން. މިގޮތަށް ނިންމާ ނިންމުންތައް ލަސްނުކޮށް އިސްތިޢުނާފު ކުރުމަށް ސަރުކާރުން ޕީޖީ ގައި މިދަނީ ދަންނަވަމުން. މި ދިވެހި މުޖުތަމަޢަކީ އެފަދަ ނުބައި ފަރާތްތަކުގެ ނުބައި ވަކިތަކުން ސަލާމަތްވެފައިވާ މުޖުތަމަޢަކަށް ހެދުމަށް އެންމެން އެކުގައި މަސަކަތް ކުރަމާތޯ!"

ރައީސް ޑރ.މުއިއްޒު ވިދާޅުވިއެވެ.

ރައީސް ޑރ.މުއިއްޒު މިފަދައިން ވިދާޅުވެފައިވާއިރު، ކުރީގެ ރައީސް އިބްރާހިމް މުޙައްމަދު ޞާލިޙްގެ ސަރުކާރުގެ ފަހު އަހަރުގައި, ގޭންގް މާރާމާރީ ތަކުގައްޔާއި ސީރިއަސް ވަޔަލެންޓް ކްރައިމްސް ކުށްތަކުގައި ހިމެނޭ ހިމެނޭ ގިނަ ބަޔަކު ދޫކޮށްލާފައިވާކަން ފާހަގަކޮށްލަން ޖެހެއެވެ.

ހޯމް މިނިސްޓްރީން ހާމަކުރި މައުލޫމާތުތަކުން ދައްކާގޮތުގައި ނިމިދިޔަ ސަރުކާރުން މިދިޔަ އަހަރުގެ ތެރޭގައި ޖުމްލަ 434 ކުށްވެރިން ދޫކޮށްލާފައިވާއިރު އޭގެތެރޭގައި ސީރިއަސް ވަޔަލެންޓް ކްރައިމްސް ކުށްތަކުގައި ހިމެނޭ 19 މީހުން ވެސް ހިމެނެއެވެ.