އޮގަސްޓު މަހުގައި ލިބުނު ޖަވާބަކާއި ގުޅިގެން ފިޔަވަޅުއަޅާނީ ރޭގައެއް ނޫން؛ އެ ސިޓީ ލިބުނު ދުވަހު: އެމްޑީޕީ

ބިންވެރިޔާ ސްކީމުގެ ދަށުން ގޯތި ނުލިބޭ ބަޔަކު ގޯތި ހޯދުމަށް ފޯޖް ކޮށްފައު ހުރި ލިޔެކިޔުންތަކެއް ހުށަހެޅިކަން އޮގަސްޓް މަހުގައި ހާމަވުމުންވެސް، އެ މައްސަލައިގައި އެއްވެސް ފިޔަވަޅެއް ނާޅައި ލަސްކުރުމުން އިދިކޮޅު އެމްޑީޕީން ކަންބޮޑުވުންފާޅުކޮށްފިއެވެ.

އެޗްޑީސީގެ މެނޭޖިންގ ޑިރެކްޓަރ ފަޒުލް ރަޝީދުގެ އެއްބަނޑު އެއްބަފާ ބޭބެ އަދި އެމްޑަބްލިޔުއެސްސީގެ ޑެޕިޔުޓީ މެނޭޖިން ޑިރެކްޓަރ ފަޒީލް ރަޝީދު ހިމެނޭ ގޮތަށް ބަޔަކަށް ބިންވެރިޔާ ސްކީމްގެ ބޭރުން ހުޅުމާލެއިން ގޯތިތަކެއް ދޫކުރި މައްސަލައިގެ ޖިނާޢީ ތަހުގީގެއް ފުލުހުން ވަނީ ފަށާފައެވެ.

އެ މައްސަލައާއި ގުޅިގެން ރޭ ބޭއްވި ނޫސްވެރިންގެ ބައްދަލުވުމުގައި ފަޒުލް ވިދާޅުވީ، އެއް ޕްލޮޓަކަށް ދެފަރާތަކުން އެދުމުން، އެކަން ވެރިފައި ކުރުމަށް ހައުސިން މިނިސްޓްރީއަށް ފޮނުއްވާ ކަމަށާ، އެގޮތުން، މައްސަލަ ޖެހިގެން އުޅޭ އެއް ބިން ކަމުގައިވާ ޕްލޮޓް ނަންބަރު 20768 އިމާރާތް ކުރުމުގެ ހުއްދަ އަށް އެދުނީ މިދިޔަ ޖޫން މަހުގެ 30 ވަނަ ދުވަހު ކަމަށެވެ. އަދި ދެވަނަ ބިން (20821) އިމާރާތް ކުރުމުގެ ހުއްދައަށް އެދުނީ މިދިޔަ ޖޫން މަހުގެ 29 ވަނަ ދުވަހު ކަމަށެވެ.

އެ ދެ ބިމަށް ވެސް ދެ ފަހަރެއްގެ މަތިން ހުއްދައަށް އެދުނު އިރު، ބިންތަކާ ގުޅޭ ކަންކަން ވެރިފައި ކުރުމަށް ހައުސިން މިނިސްޓްރީ އަށް އެޗްޑީސީން ސިޓީ ފޮނުވީ މިދިޔަ ޖުލައި މަހުގެ 22 ވަނަ ދުވަހު ކަމަށް ފަޒުލް ވިދާޅުވިއެވެ. ފަޒުލް ވިދާޅުވި ގޮތުގައި މިނިސްޓްރީން ޖަވާބު ދިނީ އޮގަސްޓް 15 ވަނަ ދުވަހުއެވެ. ފަޒުލް ވިދާޅުވީ ހައުސިން މިނިސްޓްރީގެ ޖަވާބާ ގުޅިގެން އެ ދެ ގޯތީގެ "ޕާމިޓް" އެޗްޑީސީން ކެންސަލްކުރި ކަމަށެވެ.

އަދި އެ މައްސަލާގައި ފުލުހުން އިއްޔެ ފެށި ތަހުގީގަށް ފުރިހަމަ އެއްބާރުލުން ދެއްވާ ކަމަށްވެސް ވިދާޅުވިއެވެ. ނަމަވެސް އެ މައްސަލަ ފުލުހަށް ހުށަނާޅައި އޮތް ސަބަބާ ގުޅޭ ގޮތުން ސާފުކޮށް ޖަވާބު ނުދެއްވައެވެ.

އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމުގައި، ފަޒުލްގެ އެ ވާހަކަތަކަށް ރައްދު ދެއްވަމުން، އެމްޑީޕީގެ ތަރުޖަމާނު އަނަސް އަބްދުއްސައްތާރު ވިދާޅުވީ، ގޯތި ނުލިބޭ ފަރާތަކުން އެފަދަ ލިޔުމެއް ހުށަހަޅައި އޮގަސްޓް މަހުގައި، އޭގެ ޖަވާބު ލިބިފައިވާއިރު، އެކަމުގައި އެއްވެސް ފިޔަވަޅެއް ނޭޅުމަކީ ކަންބޮޑުވާ ކަމެއް ކަމަށެވެ.

އޮގަސްޓްމަހު ލިބިފައި އޮތް ޖަވާބެއްގެ މައްޗަށް ބިނާކޮށް ފިޔަވަޅެއް އަޅުއްވާނަމަ އަޅުއްވާނީ ރޭގެ ވަގުތެއްގައެއް ނޫން. މިއީ ޑިސެމްބަރު މަސް. އެ ފިޔަވަޅު އަޅަންޖެހޭނީ، އެ ސިޓީ މިނިސްޓްރީން އެޗްޑީސީއަށް ފޮނުވާ ދުވަހު ނޫނީ އޭގެ އަނެއް ދުވަހު.

އަނަސް އަބްދުއްސައްތާރު

މީގެ އިތުރުން އަނަސް ވަނީ، ގޯތި ލިސްޓުގައި ނަން ނެތް އިރުވެސް، ފަޒުލްގެ ބޭބެ އަށް ލިބުނު ކަމަށް ބުނާ ބިމުގައި އިންފާރު ރާނާފައިވާކަން ވެސް ފާހަގަކުރައްވާފައެވެ.