ރާއްޖެއަށް އުޅަނދެއް އެތެރެކުރުމުގެ ކުރީން ޚާއްސަ ހުއްދައެއް ނަގަންޖެހޭ ގޮތް ހަދަނީ!

ކުރިއަށް އޮތް ތަނުގައި ރާއްޖެއަށް އުޅަނދެއް އެތެރެ ކުރާ ނަމަ ޚާއްސަ ހުއްދައެއް ނަގައި، އެ އުޅަނދު ތަނެއްގައި ރެޖިސްޓަރ ކުރަންޖެހޭނެ ކަމަށް ދަތުރުފަތުރާ ބެހޭ ވަޒީރު މުޙައްމަދު އަމީން ވިދާޅުވެއްޖެއެވެ.

ޕީއެސްއެމްގެ ރާއްޖެމިއަދު ޕްރޮގްރާމްގައި ވާހަކަ ދައްކަވަމުން، ވަޒީރު އަމީން ވިދާޅުވީ، މަގުތަކުގައި ތޮއްޖެހި، އުޅަނދު ދުއްވުމަށް ދަތިވާ މައްސަލަ ހައްލު ކުރުމަށް ގަވާއިދާ ޚިލާފަށް މަގުތަކުގައި ރައްޔިތުން ބޭނުންވާ މިންވަރަށް މަގުތަކަށް ލުއި ނުލިބޭކަން ފާހަގަކުރައްވައި ވަޒީރު ވިދާޅުވީ، އެ ލުއި ނުލިބެނީ އެ މައްސަލަ ގޯސްވެފައި އޮތް މިންވަރު ބޮޑުކަމުން ކަމަށެވެ.

މިއީ އެތައް ޒަމާނުއްސުރެ، ގާނޫނާ ޤަވައިދާ ޚިލާފަށް ތަންތާ ވެހިކަލް ރެޖިސްޓަރ ކުރުމާއި، އަދި ކޮންޓްރޯލެއްނެތި ވެހިކަލްތައް އިތުރު ކުރުމާއި، މި މައްސަލަތައް ދެމިގެން ގޮއްސަ އޮތް ވަރުން ހިނގާފައި އޮތް ކަމެއް

ދަތުރުފަތުރާ ބެހޭ ވަޒީރު މުޙައްމަދު އަމީން

އެ މައްސަލަތައް ހައްލު ކުރުމަށް މިހާރު ގަވާއިދެއް އެކުލަވާލެވިފައިވާ ކަމަށާ، އެ ޤަވައިދު ދެތިން ދުވަހުގެ ތެރޭގައި ގެޒެޓް ކުރެވިގެންދާނެކަމަށް ވަޒީރު ވިދާޅުވިއެވެ. އަދި އެ ޤަވައިދާއެކު، ދެން އެތެރެކުރެވޭ ވެހިކަލްތައް އެތެރެ ކުރެވޭނީވެސް ރެޖިސްޓަރ ކުރާނެ ގަރާޖެއް އޮވެގެން ކަމަށާ، ނުވަތަ ވިޔަފާރި އުސޫލުންވެސް އެކަން ކުރާ ފަރާތްތަކަށް ވެސް އެ އުޅަނދު ބަހައްޓާނެ ތަނެއްނެތި އުޅަނދު އެތެރެ ނުކުރެވޭނެ ކަމަށް ވަޒީރު ވިދާޅުވިއެވެ.

ކުރިއަށް އޮތް ދެތިން ދުވަހު މި ގަވާއިދު ގެޒެޓް ކުރެވިގެންދާނެ. 90 ދުވަސް ދިނުމަށްފަހު، ދެން ވެހިކަލް އެއް ރާއްޖެ އެތެރެކުރާ ކަމަށް ވަންޏާ ހުއްދަ ނަގައިގެން، ހުއްދައޭ މި ދެންނެވީ، އަމިއްލަ ބޭނުމަށް ނޫނީ، އެހެން ބޭނުމަކަށްވެސް ގެންނަ ކަމަށް ވަންޏާ، އެ ވެހިކަލް ރެޖިސްޓަރ ކުރާނެ ތަނެއް އޮންނަންޖެހޭނެ. އެ ހުއްދަ އޮންނަން ވާނެ. ނޫނީ ވިޔަފާރި އުސޫލުން އެކަން ކުރާ ކަމަށް ވަންޏާ، އެ ގެނެސް ސްޓޯ ކުރާނެ ތަނެއް އޮންނަން ވާނެ. އެތަން ރެޖިސްޓްރީ ކޮށްފައި އެތަން އޮންނަންވާނެ.

ދަތުރުފަތުރާ ބެހޭ ވަޒީރު މުޙައްމަދު އަމީން

ވަޒީރު ވިދާޅުވީ، ވެހިކަލްގެ ސަބަބުން އެހެން މީހުންނަށްވާ އުނދަގުލުން ސަލާމަތް ކުރެވޭނީ ވެހިކަލް ތަނަކަށް ރެޖިސްޓަރ ކޮށް، ވެހިކަލް ޕާކު ކުރާނެ ތަނެއް ކަނޑައެޅިފައި އޮވެގެން ކަމަށެވެ.