ޓެކްސްއަށް މަކަރު ހަދާތީ، ކާނި ހޮޓެލްސް އަށް ދައުވާކުރަނީ

ޓެކްސްއަށް މަކަރުހަދާތީވެ، ކާނި ހޮޓެލްސް އާ ދެކޮޅަށް ދައުވާކުރުމަށް ދައުލަތުގެ ޓެކްސް އިދާރާ، މޯލްޑިވްސް އިންލަންޑް ރެވެނިއު އޮތޯރިޓީން ނިންމައިފިއެވެ.

މިކަމާ ގުޅޭގޮތުން ދައުލަތުގެ ޓެކްސް އިދާރާ، މީރާއިން ބުނީ، ކާނި ހޮޓެލްސް އިން ޓެކްސްއަށް ގަސްތުގައި މަކަރު ހަދާކަމަށް ތުހުމަތު ކުރެވޭތީވެ، ޖިނާއީ މައްސަލައެއްގެ ގޮތުގައި އެ މައްސަލަ ތަހުގީގުކޮށްދިނުމަށް ޕްރޮސެކިއުޓަރ ޖެނެރަލް އޮފީހުގައި އެދިފައިވާނޭ ކަމަށެވެ. މީރާއިން ވަނީ ކާނި ހޮޓެލްސްއިން ޓެކްސް ދެއްކުމުގައި މަކަރުހަދާކަން ފާހަގަކުރެވިގެން އެ މައްސަލަ ތަހުގީގުކޮށްފައެވެ.

މީރާއިން ވަނީ ކާނި ހޮޓެލްސް އިން ހިންގަމުން އަންނަ ކާނި ޕާމްބީޗް، ކާނި ގްރޭންޑް ސީވިއު، ކާނިވިލެޖް، އަދި ކާނި ބީޗް ހޮޓެލްސްގެ ވިޔަފާރިތައް ބަލާފާސްކޮށްފައެވެ. ފާސްކުރިކުރުމުން 2019 ވަނަ އަހަރުން ފެށިގެން 2022 ވަނަ އަހަރުގެ ސެޕްޓެމްބަރުމަހުގެ ނިޔަލަށް އެ ހޮޓާތަކުން މީރާއަށް ހުށަހަޅާފައިވާ ގްރީންޓެކްސް، ޖީއެސްޓީ، ބީޕީޓީ އަދި އިންކަމް ޓެކްސް ބަޔާންތައް ސައްހަނޫންކަން ޓެކްސް އިދާރާއިން ބުނެއެވެ. މީރާއިން ވަނީ އެއީ ގަސްތުގައި ޓެކްސް ދެއްކުމުން އެއްކިބާވުމުގެ ނިޔަތުގައި ކޮށްފައިވާ ކަމެއްކަމަށް ފާހަގަކޮށްފައެވެ.

ފާހަގަކުރެވުނު ކަންކަން

- ރެސްޓޯރެންޓް/އެއާޕޯޓް ޓްރާންސްފާ އަދި ސްޕާގެ ހިދުމަތްތަކުން ލިބޭ އާމްދަނީގެ ބޮޑުބައި ހިމަނާފައިނުވުން.

- ޓްއާ އޮޕަރޭޓަރުން މެދުވެރިކޮށް އަދި އަމިއްލައަށް އަންނަ ފަތުރުވެރިންގެ މައުލޫމާތާއި އާމްދަނީ ރިޕޯޓްކޮށްފައިނުވުން.

- ހޮޓެލްސްއަށް އަންނަ ފަތުރުވެރިންގެ މައުލޫމާތު މީރާއަށް ހުށަހަޅާ ޓެކްސް ބަޔާންތަކުގައި ހިމަނާފައިނުވުން.

މީރާއިން ވަނީ އެ މައްސަލާގައި ކާނިހޮޓަލުގެ ވިޔަފާރިއާ ގުޅޭ ލިޔެކިއުންތައް ބަލައި ކަމާގުޅޭ މީޙުންގެ ބަޔާންތައް ނަގާފައެވެ. މީގެ އިތުރުން މީރާއިން ވަނީ ކާނި ހޮޓެލްސް އެންޑް ޓުއާސް އާއި އަސްނާ އިންވެސްޓްމަންޓްސްގެ ދެ ޑިރެކްޓަރުންކަމަށްވާ  ޢަބްދުﷲ ނަޝީދު އާއި އާމިނަތު އާސިމާގެ އިތުރުން އެކައުންޓަންޓް އާއިޝަތު ރަޒުނާގެ މައްޗަށް ދައުވާކޮށްދިނުމަށްވެސް އެދިފައެވެ.

މީރާއިން ވަނީ ކުރެވުނު އޮޑިޓްތަކުން ކާނި ހޮޓަލުން 8 ލައްކައަށްވުރެ ގިނަ ޑޮލަރު، ނުވަތަ ދިވެހި ފައިސާއިން ބަލާނަމަ 13.3 މިލިއަނަށްވުރެ ގިނަ ރުފިޔާ އިތުރަށް ދައްކަންޖެހޭކަން ފާހަގަކުރެވޭތީވެ، އެފައިސާ ދެއްކުމަށް ކާނި ހޮޓެލްސްއަށް އަންގާފައެވެ.