އަލް ޢަސްރުގެ "ލޯތަކުގެ ފިނިކަން" ވޯކްޝޮޕް ކާމިޔާބު ކަމާއި އެކުު ނިންމާލައިފި!

އަލް ޢަސްރު ގެ ފަރާތުން އާންމުންނަށް ހުޅުވާލައިގެން ކުރިއަށް ގެންދިޔަ "ލޯތަކުގެ ފިނިކަން" ވޯކްޝޮޕް ކާމިޔާބު ކަމާއި އެކުު ނިންމާލައިފިއެވެ.

މި މަހުގެ 4 އަދި 5 ގައި ކުރިއަށް ގެންދިޔަ މި ޕްރޮގްރާމަކީ ރަމަޟާން މަސް ފެށުމުގެ ކުރިން ނަމާދުގެ ފިޤުހު ހަނދާންކޮށް އާލާ ކުރުމަށާއި ނަމާދާމެދު ހިތުގައި އުފެދިފައިވާ ސުވާލުތަކަށް ޖަވާބު ހޯދުމުގެ ފުރުސަތު އާންމުންނަށް މަގުފަހި ކޮޮށްދިނުމަށް ކަމަށް އަލް ޢަސްރުން ބުނެއެވެ.

މި ޖަމިއްޔާ އިން މި ފަދަ ވޯކްޝޮޕް ތައް ކުރިއަށް ގެންދާއިރު މީގެ ކުރިން 100 މީހުންގެ ޖާގަ އަކަށް ހުޅުވާލި ކަމުގައި ވިޔަސް މި ފަހަރު ޖާގައިގެ ދަތި ކަމާއި ހުރެ އެ ޖަމިއްޔާ އިން ހުޅުވާލީ 80 މީހުނަށް ބައިވެރިވެވޭ ގޮތަށެވެ.

މި ވޯރކްޝޮޕް ގައި ނަމާދުގެ މަޤާމް، ޘަހާރަތާއި، ވުޟޫ އަދި ނަމާދު ތަކްބީރުން ފެށިގެން ސަލާމް ދިނުމާ ދެމެދުގައިވާ ޛިކުރުތަކާއި ހަރަކާތްތައް ވެސް މި ވޯކްޝޮޕް ގައި ކިޔަވާ ދީފައިވާކަމަށް އަލް އަސްރުން ބުނެއެެވެ.

ނަމާދާއި ބެހޭގޮތުން ކުރިއަށް ދާ މި ވޯކްޝޮޕްގައި ކިޔަވައިދިނީ ފުންނާބު އުސް ދީނީ ޢިލްމުވެރިޔާ ޑރ.އާދަމް ޝަމީމެވެ.

ވޯކްޝޮޕް ނިންމާލުމަށް ފަހު "ވޮއިސް" އަށް ދިން ބަސްދީގަތުމެއްގައި އެބޭފުޅާ ވިދާޅުވީ މި ވޯކްޝޮޕް ފެށުނީއްސުރެ ވެސް މިއީ އެންމެ ރަނގަޅު ހާޒިރީއެއް ލިބޭ ވޯކްޝޮޕް ކަމަށެވެ.

"އާންމުކޮށް އެންމެނަށް ވެސް އިނގޭނެ ނަމާދުކުރަން. ނަމަވެސް ނަމާދު ގައި އެބަހުރި ވަރަށް މުހިންމު ސުންނަތް ތަކާއި ވާޖިބުތައް ރުކުންތަކެއް އޭގެ ތަފްސީލު ރަސޫލާ ދަސްކޮށްދެއްވި ގޮތަށް ވަރަށް ގިނަ މީހުންނަށް ނޭނގޭ. ނޫނީ ނަމާދު ގައި ފަރުވާ ކުޑަ ކޮށްލެވިގެން ނޫނީ މައުލޫމާތު ނެތުމުގެ ސަބަބުން ކުށް ކުރެވޭ އެބަ. ވަރަށް ބޮޑެތި ކުށްވެސް އެބަ ކުރެވޭ."

ޑރ.އާދަމް ޝަމީމް ވިދާޅުވި އެވެ.

މީގެ އިތުރުންވެސް ޑރ.އާދަމް ޝަމީމް ވިދާޅުވީ އެއްފަހަރު މި ވޯކްޝޮޕް ގައި ބައިވެރިވާ ފަރާތަކުގެ ސަބަބުން ވެސް ވަރަށް ބޮޑަށް ވޯކްޝޮޕް އިސްތިހާރު ވެގެން ދާކަމަށާއި ފަހަރަކަށް ވުރެ ފަހަރެއް ހުރިހާ އުމުރުފުރާގެ ފަރާތްތަކުގެ ފަރާތުން ލިބޭ ޝައުގުވެރިކަން ބޮޑުވަމުން އަންނަ ކަމަށެވެ.

މި ވޯކްޝޮޕަކީ ލެކްޗާ އުސޫލަށް ކުރިއަށް ގެންދާ ވޯކްޝޮޕެއް ނޫން ކަމަށާއި ނަމާދު ގެ ކޮންމެ ރަކުއަތެއް ވަކިން އޭގެ ސަބަބުތަކާއި ދަލީލު ތަކާއި އެކު ކޮންމެ މައްސަލައެއް ކިޔަވައިދީ ނިމުމުން ބައިވެރިންނަށް ސުވާލު ކުރުމުގެ ފުރުސަތު ވެސް ލިބިގެންދިޔަ ކަން އެ ބޭފުޅާ ފާހަގަ ކުރެއްވިއެވެ.

މިއީ އަހަރަކު އެއްފަހަރު އަލް އަސްރުން ބާއްވާ ވޯކްޝޮޕެއް ނަމަވެސް އެ ޖަމިއްޔާއަށް ރިކުއެސްޓް ކުރުމުން ރަށްރަށުގަ އާއި އޮފީސްތަކުގެ ގައި ވެސް މި ވޯކްޝޮޕް ބާއްވައިދޭ ކަމަށް އެ ޖަމިއްޔާ އިން މައުލޫމާތު ދެއެވެ.