ޑެންގީ ކޮންޓްރޯލް ކުރަން ފޮނަދޫގައި ހޮނިހިރު ދުވަހު ބޮޑު ހަރަކާތެއް

ލ،ފޮނަދޫގައި ހަލުވިކަމާއެކު ޑެންގީ ފެތުރެމުންދާތީ އެކަން ކޮންޓްރޯލް ކުރުމުގެ ގޮތުން، ރަށުތެރޭގައި ހުރި މަދިރި އާލާވާތަންތަން ނައްތާލުމަށް ޚާއްސަ އިވެންޓެއް، ލ.ފޮނަދޫ ކައުންސިލްއާއި ލ.ފޮނަދޫ ސިއްޙީ މަރުކަޒާއި ލާމު އަތޮޅުގައި ހަރަކާތްތެރިވާ ޖަމިއްޔާއެއް ކަމަށްވާ، "ލާމު" އުން އިސްނަގައިގެން ކުރިޔަށް ގެންދިއުމަށް ހަމަޖައްސައިފިއެވެ.

"ވޮއިސް" އަށް މަޢުލޫމާތު ދެމުން، ލ.ފޮނަދޫ ކައުންސިލް މެންބަރު އަޙްމަދު ރާމިޒު (ތޯހާ) ވިދާޅުވީ، މި އިވެންޓަކީ ލ.ފޮނަދޫގައި ހަލުވި ކަމާއެކު ޑެންގީ ފެތުރެމުންދާތީ އެކަން ދާމިއީކޮށް ހައްލު ކުރެވޭނީ މަދިރި އާލާވާ ކަހަލަ ތަންތަން ނައްތާލެވިގެން ކަމަށްވާތީ ކުރިޔަށް ގެންދިއުމަށް ހަމަޖެހިފައިވާ އިވެންޓެއް ކަމަށެވެ.

"ވަރަށް ހަލުވި ކަމާއެކު އަދިވެސް ފޮނަދޫގައި ޑެންގީ ދަނީ ފެތުރެމުން، މިބަލަނީ ވީހާވެސް އަވަހަކަށް މިކަން ކޮންޓްރޯލް ވާނެ ގޮތެއް ވޭތޯ. ފޮގް ކުރުމުގެ މަސައްކަތެއްވެސް މާދަމާ ކުރިޔަށްދާނެ ފޮނަދޫގައި. އޭގެ އިތުރުން ހޮނިހިރު ދުވަހު ރޭވިފައި މިއޮތީ މުޅި ރަށް ސާފު ކުރުމުގެ އިވެންޓެއް." ތޯހާ ވިދާޅުވިއެވެ.

"ނޯ މޮސްކިޓޯ ޗެލެންޖް" ގެ ނަމުގައި ކުރިޔަށް ގެންދިއުމަށް ހަމަޖެހިފައިވާ މި އިވެންޓްގައި ވީހާވެސް ގިނަ ފަރާތްތަކަކުން ބައިވެރިވުމަށް އިވެންޓް އިންތިޒާމް ކުރާ ފަރާތުން އެދެއެވެ. އިވެންޓްގައި ބައިވެރިވާން ބޭނުންފުޅުވާ ފަރާތްތަކުން 9917874 އަށް ނަމާއި ގުޅޭނެ ނަންބަރެއް އެސްއެމްއެސް ކޮށް ދިނުމަށް އިވެންޓް އިންތިޒާމް ކުރާ ފަރާތުން އެދެއެވެ.

ހޮނިހިރު ދުވަހު ހެނދުނު 8 ކުން 11 އަށް އޮންނަ މިއިވެންޓްގެ ތެރެއިން ގޭގެއަށް ޒިޔާރަތް ކުރެވި، ގޭގޭގައި ހުންނަ މަދިރި އާލާވާ ތަންތަން ނައްތާލެވޭނެއެވެ. އަދި މަދިރި އުފެދޭ ގޮތަށް ހުންނަ ވަޅު ފަދަ ތަންތަނަށް ދިރޭ މަސް ލުމުގެ ހަރަކާތެއްވެސް ކުރިޔަށް ދާނެއެވެ.