އިއްޔެ އެކަނިވެސް ތައުލީމީ ދާއިރާއަށް 500 މިލިއަނަށްވުރެ ގިނަ ރުފިޔާ

އިއްޔެ އެކަނިވެސް ތައުލީމީ ދައިރާގެ ކުރިއެރުމަށް 500 މިލިއަނަށްވުރެ ގިނަ ރުފިޔާ ހަރަދުކުރުމަށް ނިންމައި ކަމާ ގުޅޭ އެއްބަސްވުންތަކުގައި ސޮއިކޮށްފިއެވެ.

ތައުލީމީ ދައިރާ ކުރިއެރުވުމަށް ސަރުކާރުން ކުރަމުންގެންދާ މަސައްކަތްތަކުގެ ތެރެއިން ސަރުކާރުން އިއްޔެ ވަނީ ސްކޫލް އިމާރާތްތައް، ހޯލްތައް، ލެބޯޓަރީތައް، މަރާމާތުކުރުމުގެ މަސައްކަތްތައް ކުރުމަށް އަމިއްލަ ކުންފުނިތަކާއެކު އެއްބަސްވުންތައް ގާއިމްކޮށް މަސައްކަތްތައް ހަވާލުކޮށްފައެވެ.

އެގޮތުން "ކޫލް ސްކޫލް" އެއަރ-ކޮންޑިޝަނިންގ ގެ 26 މަޝްރޫއުއަށް 397.25 މިލިއަން ރުފިޔާ ޚަރަދުކުރުމަށް ސަރުކާރުން ވަނީ ނިންމާފައެވެ. ސަރުކާރުގެ މި ނިންމުމާއެކު ރާއްޖޭގެ ހުރިހާ ސްކޫލެއް އޭސީކުރެވިގެންދާނެއެވެ. ކްލާސްރޫމްތައް ހޫނު ގަދަވުމުގެ މައްސަލައަކީ ދަރިވަރުންގެ ފަރާތުން ހުށަހެޅޭ ވަރަށްބޮޑު ޝަކުވާއެކެވެ. ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވަނީ ދަރިވަރުންގެ އެ ކަންބޮޑުވުން ހައްލުކޮށްދެއްވާނޭކަމުގެ ޔަގީންކަން ދެއްވާފައެވެ. މީގެ ކުރިން ބައެއް ސްކޫލްތަކުގެ ކްލާސްރޫމްތައް ހޫނު ގަދަވުން ފަދަ މައްސަލަތައް ދިމާވާތީވެ، ކްލާސްރޫމްތައް އޭސީކުރުމުގެ ކަންކަން ކުރިއަށް ގެންގޮސްފައި ހުރީ ބެލެނިވެރިން އަދި ހެޔޮއެދޭ ފަރާތްތަކުގެ އެހީތެރިކަމާއެކުގައެވެ.

އިއްޔެ އަމިއްލަ ކުންފުނިތަކާ ހަވާލުކުރެވުނު މަޝްރޫޢުތަކުގެ ތެރެއިން މަތީ ތަޢުލީމު، އަދި ވަޒީފާގެ ފުރުސަތުތައް އިތުރުކުރުމަށް، ހޮވާލެވިފައިވާ އަތޮޅުތަކުގައި ދަރިވަރުން ތިބޭނެ ތަންތަނާއެކު ޔުނިވަރސިޓީ ކެމްޕަސްތައް ގާއިމްކުރުމަށް ކުންފުނިތަކާ ވަނީ ހަވާލުކޮށްފައެވެ. އެގޮތުން އެފަދަ 5 މަޝްރޫޢުއެއް ހިންގުމަށް ނިންމާފައިވާއިރު އޭގެ ޖުމްލަ އަގު 114.52 މިލިއަން ރުފިޔާއަށް އަރައެވެ. ހަމަ އެއާއިއެކު، ޒުވާނުން ބާރުވެރިކުރުވުން، މަޢުލޫމާތު އަދި ފަންނުވެރިކަމުގެ ދާއިރާއިން ޒުވާނުންގެ ބައިވެރިވުމާއި ހުނަރުތަކަށް ހަތަރު ސިޓީގައި "ތާޑް ސްޕޭސަސް" ހިމެނޭ މަޝްރޫޢުއަކަށް 40.00 މިލިއަން ރުފިޔާ ވަނީ ކަނޑައަޅާފައެވެ.

ފިނޭންސް މިނިސްޓްރީން ބުނީ ތައުލީމީ ދާއިރާގެ ކުރިއެރުމަށް އިއްޔެ އެކަނި ހަވާލުކުރި މަޝްރުޢުތަކުގެ ޖުމްލަ އަދަދު 31 ހަށް އަރާނޭކަމަށެވެ.