ބާ ކައުންސިލްގައި ކެބިނެޓްގެ ވަޒީރަކު ބައިންދާގޮތަށް ހަދައިގެން އެމްޑީޕީން އޮތީ ރައްޔިތުންނަށް ދޯކާ ދީފައި: އިބްރާހީމް

އެމްޑީޕީ މެޖޯރިޓީ އޮތް 19 ވަނަ މަޖިލީހުން، އިންސާފުގެ ނަމުގައި، ރައީސުލްޖުމްހޫރިއްޔާގެ ބާރު ސީދާ ބާ ކައުންސިލްގެ އެކްސްކޯ އަށް ފޯރާ ގޮތަށް، ރައްޔިތުންނަށް ދޯކާ ދީފައިވާ ކަމަށް މައްޗަންގޮޅި އުތުރު ދާއިރާގެ މެމްބަރު އިބްރާޙީމް މުހައްމަދު (އިއްބެ ޖަނާބު) ވިދާޅުވެއްޖެއެވެ.

އިއްބެ މިފަދައިން ވިދާޅުވީ، ރައްޔިތުންގެ މިއަދުގެ ޖަލްސާގައި، ސަރުކާރުގެ ފަރާތުން ހުޅުމާލޭ އުތުރު ދާއިރާގެ މެންބަރު ހުސައިން ޝަރީފް ހުށަހެޅުއްވި ގާނޫނު ފަންނުގެ ގާނޫނަށް އިސްލާހް ގެނައުމުގެ ބިލަށް ބަހުސް ކުރައްވަމުންނެވެ.

ބާ ކައުންސިލަށް ފުރިހަމަ މިނިވަންކަމާ އެކު ކަންކަން ހިންގުމުގެ ފުރުސަތު ހޯދައިދިނުމަށް، އެ ކައުންސިލުގެ އެގްޒެކެޓިވް ކޮމިޓީން ބަންޑާރަ ނައިބު އުނިކޮށް، އެ ކޮމިޓީގައި ހަމައެކަނި ގާނޫނީ ވަކީލުންގެ ފަރާތުން އިންތިހާބުކުރާ ރައީސަކާއި ނައިބު ރައީސެއްގެ އިތުރުން ފަސް މެމްބަރުން ބައިތިއްބާ ގޮތަށް ގާނޫނު އިސްލާހު ކުރުމަށް އެ ބިލުގައި ވަނީ ހުށަހަޅުއްވާފައެވެ.

އެކަމަށް އަލިއަޅުވާލައްވައި ވާހަކަ ދައްކަވަމުން އިއްބެ ވިދާޅުވީ، 18 ވަނަ މަޖިލީހަށް ގާނޫނީ ފަންނުގެ ގާނޫނު އެންމެ ފުރަތަމަ ހުށަހެޅުނީ، ބާރ ކައުންސިލްގެ އެގްޒެކެޓިވް ކޮމިޓީގައި ބަންޑާރަނައިބު އިންނަވާ ގޮތަކަށް ނޫން ކަމަށެވެ.

އެހެން ނަމަވެސް އެމްޑީޕީ މެޖޯރިޓީ އޮތް 19 ވަނަ މަޖިލީހުން އެކަން ބަދަލުކޮށް ރައީސުލްޖުމްހޫރިއްޔާގެ ބާރު ސީދާ ބާ ކައުންސިލަށް ފޯރާ ގޮތަށް އެތަނުގައި ބަންޑާރަ ނާއިބު އިންނަގޮތަށް ނިންމެވި ކަމަަށް އޭނާ ވުދާޅުވިއެވެ. އަދި އެފަދައިން ކަން ކޮށްގެން، އެމްޑީޕީން ރައްޔިތުންނަށް “ދޯކާ” ދީފައިވާ ކަމަށްވެސް އޭނާ ވިދާޅުވިއެވެ.

ކުރީގެ ރައީސް މައުމޫނުގެ ދައުރުގައި، މަޖިލީހުގައި، ރައީސުލްޖުމްހޫރިއްޔާ އައްޔަނުކުރައްވާ މެންބަރުން ތިއްބެވީމާ، އޭރު މަޖިލީހުގައި ތިއްބެވި އެމްޑީޕީ މެންބަރުން، އެ މެންބަރުންނަށް މުޚާތަބު ކުރައްވަމުން ގެންދެވީ ވަލު ދޮރޯށިން ވަދެފައި ތިބި ބައެއްގެ ގޮތުގައި. ވަލު ދޮރޯށިން ވަދެ ރައީސުލްޖުމްހޫރިއްޔާގެ އަތްޕުޅު ބާނުއްވައިގެން މަޖިލިސް ކޮންޓްރޯލް ކޮށް، އިންސާފާއި ހަމައާއި ގެއްލުވާ ވާހަކަ.

މެންބަރު އިބްރާޙީމް މުޙައްމަދު

“މިވާހަކަ ދެއްކުމަށްފަހު ދެން އަޅުގަނޑުމެންނަށް ފެނިގެން ދިޔައީ، 19 ވަނަ މަޖިލީހަށް ކެހިވެރި އެޖެންޑާ 19ގެ ނަމުގައި އެމްޑީޕީން ބޭނުންވާ ގޮަތަށް މި މަޖިލީހަށް ބިލު ގެނައިތަން. އެއީ ރައީސުލްޖުމްހޫރިއްޔާގެ ބާރު، ސީދާ ސީދާ، ބާ ކައުންސިލްގެ އެކްސްކޯއަށް ފޯރާގޮތަށް، ބަންޑާރަ ނާއިބު، އާދެ ކެބިނެޓްގެ ވަޒީރަކު އިންނަވާ ގޮތަށް އެމްޑީޕީން މިކަން ކޮށްފައި އޮތީ. އިންސާފުގެ ނަމުގައި، ރަމްޒީ ތިލަފަތެއް ހައްދަވައިގެން، ގާނޫނު ހެދުމުގެ ނަމުގައި މަކަރު ހަދައި، ރައްޔިތުންނަށް ހަމަ ދޯކާ ދީފައި މިއޮތީ” މެންބަރު އިއްބެ ވިފާޅުވިއެވެ.

ކަންމިހެން ހުރި ނަމަވެސް، އަދުގެ ސަރުކާރުން ފެންނަނީ އެއާއި ތަފާތު މަންޒަރެއް ކަމަށާ، މިއަދު ފެންނަމުންދަނީ އަތުގައި އޮތް ބާރު ދޫކޮށްލައްވައި، އިޚްލާސްތެރި ކަމާއެކު ޖޭއެސްސީ އިސްލާހުކުރުމަށް ރައީސުލްޖުމްހޫރިއްޔާ ފުރުސަތުދެއްވާ ތަން ކަމަށް އިއްބެ ވިދާޅުވިއެވެ.