އެމްއެންޔޫއިން ދިރާސާކުރުމަށާއި ފޮތް ލިޔުމަށް ޚާއްޞަ ގްރާންޓްތަކެއް ދީފި

ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) އިސްވެ، ޤައުމީ ފެންވަރުގައި އިލްމު ކުރިއަރުވައި ދިރާސާކުރުމުގެ ސަގާފަތް އާލާކުރުމަށްޓަކައި "ޔުނިވަރސިޓީ ރިސާޗް ގްރާންޓްސް (ޔޫއާރުޖީ) 2026" އަދި "ޔުނިވަރސިޓީ ބުކް ރައިޓިންގ ގްރާންޓްސް (ޔޫބީޑަބްލިޔުޖީ) 2026" ގެ ފުރަތަމަ ބުރުގެ އެހީތައް ރަސްމީކޮށް އިޢުލާންކޮށްފިއެވެ.

އެމްއެންޔޫއިން ނެރުނު ނޫސްބަޔާނެއްގައި ބުނެފައިވަނީ، މި ގްރާންޓްތަކަކީ ރާއްޖޭގެ ތަރައްޤީއަށް މުހިންމު ދާއިރާތަކުން އައު މަޢުލޫމާތާއި އިލްމު އުފެއްދުމަށާއި، އދ. ގެ ދެމެހެއްޓެނިވި ތަރައްޤީގެ ލަނޑުދަނޑިތަކާ އެއްގޮތްވާ ގޮތުގެ މަތިން ދިރާސާކުރުމަށް ދެވޭ އެހީތަކެއް ކަމަށެވެ. މީގެ ތެރޭގައި ޞިއްޙީ ދާއިރާ، ތަޢުލީމު، ޖެންޑަރ އިކުއިޓީ، އާޓިފިޝަލް އިންޓެލިޖެންސް (އޭއައި)، ތިމާވެށި، އަދި އިޤްތިޞާދީ ދާއިރާ ހިމެނެއެވެ.

ދިރާސާކުރުމަށް ދޫކުރި ގްރާންޓްތައް (URG 2026):މި ބުރުގައި ޖުމްލަ 12 ދިރާސާ މަޝްރޫޢަކަށް އެހީ ދިނުމަށް ވަނީ ނިންމާފައެވެ. އޭގެ ތެރޭގައި ފާހަގަކޮށްލެވޭ ބައެއް ދިރާސާތަކަކީ:

ރިސޯޓުތަކުގައި މަސައްކަތްކުރާ އަންހެނުންގެ ތަޖުރިބާ: އައިޝަތު ލީޒާ އިސްވެ ހުންނަވައިގެން ކުރިއަށްގެންދާ މި ދިރާސާގައި ރިސޯޓުތަކުގެ ލީޑަރޝިޕް ދާއިރާގައި އަންހެނުންނަށް ހުރި ހުރަސްތަކާއި ތަޖުރިބާތައް ދެނެގަންނާނެއެވެ.

އޭއައި ބޭނުންކޮށްގެން މަތީ ތަޢުލީމު ތަރައްޤީކުރުން: ޑރ. ޢަލީ ފަވާޒް ޝަރީފް އިސްވެ ހުންނަވައިގެން، އާޓިފިޝަލް އިންޓެލިޖެންސް މެދުވެރިކޮށް ކިޔަވައިދިނުމާއި ކެރިއަރު ބިނާކުރުމުގެ މޮޑެލްތަކެއް އެކުލަވައިލާނެއެވެ.

ދުނިޔޭގެ އަގުތަކާ ގުޅޭ ދިރާސާ (WVS-8): ޑރ. އާމިނަތު ރިޔާޒްގެ ބެއްލެވުމުގެ ދަށުން ދިވެހިންގެ އިޖުތިމާޢީ ގަބޫލުކުރުންތަކާއި، އުސޫލުތައް ހުރިގޮތް ބައިނަލްއަޤްވާމީ ފެންވަރުގައި ދިރާސާކުރާނެއެވެ.

ޞިއްޙީ ދާއިރާގެ ދިރާސާތައް: ބަލިމަޑުކަމަށް ފަރުވާކުރުމުގައި ބޭނުންކުރާ އެންޓި މައިކްރޯބިއަލް ރެސިސްޓެންސް އަދި އުމުރުން ދުވަސްވީ މީހުން ބެލެހެއްޓުމުގައި ދިމާވާ ގޮންޖެހުންތަކާ ގުޅޭ ދިރާސާތައް ފާޠިމަތު ޒިމްނާ އަދި ސިޒްނާ މުޙައްމަދު އިސްވެ ކުރިއަށްގެންދަވާނެއެވެ.

މީގެ އިތުރުން، ކޮމިއުނިޓީ ހެލްތު ނާސިންގް، ފާމަސީ ދާއިރާ، ބައިލޯޖިކަލް ޑައިވަރސިޓީ، އަދި ނުކުޅެދުންތެރިކަން ހުންނަ ފަރާތްތަކަށް ޚިދުމަތް ދިނުމާ ގުޅޭ މުހިންމު ދިރާސާތަކެއް ކުރިއަށް ގެންދިއުމަށް ވަނީ ހަމަޖެހިފައެވެ.

ފޮތް ލިޔުމަށް ދޫކުރި ގްރާންޓްތައް (UBWG 2026):ފޮތް ލިޔުމުގެ ދާއިރާއިން މި ބުރުގައި ދެ މަޝްރޫޢަކަށް އެހީ ދީފައިވެއެވެ. އެއީ:

ދިވެހި ކާނާއާ ބެހޭ އަތްމަތީ ފޮތް: އާމިނަތު ޝާނީ އާއި އައިޝަތު ސޮބާހާ ޙުސައިން ލިޔުއްވާ މި ފޮތުގައި ދިވެހި ސަގާފީ ކާނާ ތައްޔާރުކުރާނެ ގޮތާއި އޭގެ ތާރީޚު ހިމެނޭނެއެވެ.

ޕްރައިމަރީ ޓީޗަރުންނަށް ޚާއްޞަ ރިސޯސް ފޮތް: ފާޠިމަތު ނަސީހާ ޢަބްދުލް މުހައިމިން އާއި ޓީމުން ތައްޔާރުކުރާ މި ފޮތަކީ ދެމެހެއްޓެނިވި ތަރައްޤީއަށް ދަރިވަރުން ހޭލުންތެރިކުރުވުމަށް މުދައްރިސުންނަށް އެހީތެރިވެދޭނެ ފޮތެކެވެ.

އެމްއެންޔޫއިން ބުނި ގޮތުގައި، މި މަޝްރޫޢުތަކަކީ ރާއްޖޭގެ އިތުރުން ރާއްޖެއިން ބޭރުގެ ޔުނިވަރސިޓީތަކާއި އިދާރާތަކާ ގުޅިގެން ކުރިއަށްގެންދާ މަސައްކަތްތަކެކެވެ. މީގެ މަޤްޞަދަކީ ދިވެހި މުޖުތަމަޢަށް ބޭނުންވާ މުހިންމު ދާއިރާތަކުން ފަންނީ ގާބިލުކަން އިތުރުކޮށް، ހެކީގެ މައްޗަށް ބިނާވެފައިވާ ސިޔާސަތުތައް އެކުލަވައިލުމަށް ސަރުކާރަށާއި މުއައްސަސާތަކަށް އެހީތެރިވެދިނުމެވެ.

މި ފުރުޞަތުތަކުގެ ސަބަބުން ޔުނިވަރސިޓީގެ ދިރާސާކުރުމުގެ މާޙައުލު ވަރުގަދަވެ، ދިވެހި މުސައްނިފުންގެ އުފެއްދުންތައް އިތުރުވެގެންދާނެ ކަމަށް ޤައުމީ ޔުނިވަރސިޓީން އުންމީދު ކުރެއެވެ.