މަސްވެރިންގެ ދުވަހުގެ މުނާސަބަތުގައި، މަސްވެރިކަމާ ބެހޭ ވުޒާރާއިން ކެއްކުމުގެ މުބާރާތެއް ބާއްވަނީ

މިއަހަރުގެ މަސްވެރިންގެ ދުވަހގެ މުނާސަބަތުގައި މަސްވެރިކަމާ ބެހޭ ވުޒާރާ އާއި ޗެފްސް ގިލްޑް އޮފް މޯލްޑިވްސް (ސީޖީއެމް) ގުޅިގެން ކެއްކުމުގެ މުބާރާތެއް ބޭއްވުމަށް ނިންމައިފިއެވެ.

މަސްވެރިކަމާ ބެހޭ ވުޒާރާއިން ބުނީ 44 ވަނަ މަސްވެރިންގެ ދުވަހުގެ މުނާސަބަތުގައި ބޭއްވުމަށް ހަމަޖެހިފައިވާ ކެއްކުމުގެ މި މުބާރާތް ބޭއްވުމަށް ތާވަލްކޮށްފައިވަނީ، ޑިސެމްބަރުމަހުގެ 7 ވާ ހޮނިހިރުދުވަހު މާލޭގައި ކަމަށެވެ. "ރަހަވަރު" ނަމުގައި ބޭއްވުމަށް ހަމަޖެހިފައިވާ މި މުބާރާތް ކުރިއަށްދާނީ އެދުވަހުގެ ހަވީރު 4 ކުން 6 ކަށް ޤައުމީ ޔުނިވަރސިޓީގެ ހޮސްޕިޓާލިޓީ ފެކަލްޓީގައެވެ.

މި މުބާރާތް ކުރިއަށްދާގޮތަށް ބަލާއިރު، ދޮޅުގަޑިއިރުގެ ތެރޭގައި މުށިމަހާއި ފާނަ ހިމެނޭ ދެ ބާވަތެއްގެ ކެއުމެއް ތައްޔާރުކުރުމަށް ބޭނުންވާ މަސް މިނިސްޓްރީން ފޯރުކޮށްދޭނެއެވެ. މިއީ މަސްވެރިންގެ ދުވަހާ ގުޅިގެން ބާއްވާ ހަރަކާތްތަކުގެ ތެރޭގައި ކެއްކުމުގެ މުބާރާތެއް ބާއްވާ ފުރަތަމަ ފަހަރެވެ. މިފަދަ މުބާރާތެއް ބޭއްވުމުގެ މައިގަނޑު މަގްސަދަކީ ރާއްޖޭގެ ކާބޯތަކެތީގެ ރައްކާތެރިކަމަށް މަސްވެރިކަން ހިއްސާކުރާ މިންވަރު ފާހަގަކުރުމާއި ކެއިންބުއިމުގެ އާދަކާދަތަކަށް އަންނަމުންދާ ބަދަލުތަކުގެ ސަބަބުން، ތަފާތު އައު ބާވަތްތަކުގެ މަހުގެ އުފެއްދުންތައް އުފައްދާ ބޭނުންކުރުމުގެ މުހިއްމުކަން އަންގައިދިނުންކަމަށް މަސްވެރިކަމާ ބެހޭ ވުޒާރާއިން ބުނެއެވެ.

މުބާރާތުގެ ވަނަތަކަށް ކަނޑައެޅިފައިވާ އިނާމު:

1 ވަނަ – 10،000 ރުފިޔާ

2 ވަނަ – 7،000 ރުފިޔާ

3 ވަނަ – 5،000 ރުފިޔާ

މި މުބާރާތުގައި ބައިވެރިވުމުގެ ސުންގަޑިއަކީ އަންނަ އަންގާރަދުވަހުގެ 18:00 އާ ހަމަޔަށެވެ.

މިފަހަރުގެ މަސްވެރިންގެ ދުވަހުގެ މުނާސަބަތުގައި ކުރިއަށްގެންދިއުމަށް ނިންމާފައިވާ އިތުރު ހަރަކާތްތަކުގެ ތެރޭގައި ޑިސެމްބަރުމަހުގެ 6 ވަނަ ދުވަހު ކުރިއަށްގެންދިއުމަށް ހަމަޖެހިފައިވާ މަސްރޭހާއި، ޑިސެމްބަރުމަހުގެ 12 ވަނަ ދުވަހު ދަރުބާރުގޭގައި ކުރިއަށްގެންދާ މަސްވެރިންގެ ފޯރަމާއި، ޑިސެމްބަރު 14 ވަނަ ދުވަހު ދަރުބާރުގޭގައި ކުރިއަށްގެންދިއުމަށް ހަމަޖެހިފައިވާ އާޓް އެގްޒިބިޝަނުގެ އިތުރުން، 13 ވަނަ ދުވަހު ސެންޓްރަލްޕާކްގައި ކުރިއަށްގެންދާ ކުޑަކުދިންގެ ހަވީރު ފާހަގަކޮށްލެވެއެވެ.

މަސްވެރިންގެ ދުވަހުގެ މުނާސަބަތުގައި ބާއްވާ ހައްސަ ޖަލްސާ އޮންނާނީ ޑިސެމްބަރު 13 ވަނަ ދުވަހުގެ ރޭ ދަރުބާރުގޭގައެވެ.