އަޒަރުބައިޖާން އެއާލައިންސްގެ ސީދާ ދަތުރުތައް ރާއްޖެއަށް

ރާއްޖެއަށް އަޒަރުބައިޖާން އެއާލައިންސްގެ ސީދާ ދަތުރުތައް ފެށުމަށް ތައްޔާރުވެއްޖެއެވެ.

މިއަންނަ ނޮވެންބަރު މަހުގެ 8 ވަނަ ދުވަހު އަޒަރުބައިޖާން އެއާލައިންސްއިން ރާއްޖެއަށް ސީދާ ދަތުރުތައް ފެށުމަށް ނިންމައިފައިވާއިރު، މި ދަތުރުތައް ކުރިއަށް ގެންދާނީ ހަފްތާއަކު ދެ ފަހަރު، ހުކުރު އަދި އާދީއްތަ ދުވަހުއެވެ.

އެ އެއާލައިންގެ ތާރީޚުގައި މުހިންމު ބަދަލެއްގެ ގޮތުގައި ފާހަގަކުރެވޭ މި ދަތުރުތަކާ ގުޅޭގޮތުން އެ ކުންފުނިން ހާމަކުރި ގޮތުގައި، ރާއްޖެ ފަދަ މަންޒިލަކަށް ދަތުރުތައް ފެށުމަކީ އުފާވެރި ކަމެކެވެ. އަދި މީގެ ސަބަބުން ދަތުރުވެރިންނަށް އަގުހެޔޮކޮށް ރާއްޖެއަށް ޒިޔާރަތްކުރުމުގެ ފުރުސަތު ލިބިގެންދާނެއެވެ.

މި ސީދާ ދަތުރުތަކުގެ ސަބަބުން ދަތުރުގެ މުއްދަތު ކުރުވެ، ޓްރާންސިޓް ވަގުތުތަކާ ގުޅިފައިވާ ދަތިތައް ނައްތާލެވޭނެކަމަށް އެ އެއާލައިނުން ފާހަގަކޮށްފައިވެއެވެ.

އަދި މިހާރުވެސް އެ އެއާލައިންގެ ރަސްމީ ވެބްސައިޓާއި، މޯބައިލް އެޕްލިކޭޝަން އަދި އަޒަލް ޓިކެޓް އޮފީސްތަކުން ޓިކެޓް ގަތުމުގެ އިންތިޒާމު ހަމަޖެހިފައިވާ ކަމަށް އަޒަރުބައިޖާން އެއާލައިންސްއިން މަޢުލޫމާތު ދީފައިވެއެވެ.