މިއަހަރު ޢުމްރާއަށް މީހުން ގެންދިއުމަށް ޕްރޮޕޯޒަލް ހުށަހެޅުމަށް ހުޅުވާލައިފި

ދިވެހިރާއްޖެއިން ޢުމްރާއަށް މީހުން ގެންދިއުމަށް ޝައުޤުވެރިވާ ފަރާތްތަކަށް ޕްރޮޕޯޒަލް ހުށަހެޅުމުގެ ފުރުސަތު އިސްލާމިކު މިނިސްޓްރީން ހުޅުވާލައިފިއެވެ.

އެމިނިސްޓްރީން ބުނެފައިވަނީ ދިވެހިރާއްޖެއިން މީހުން ޢުމްރާއަށް ގެންދިއުމާ ބެހޭގޮތުން 24 ޖަނަވަރީ 2019 ގައި ގެޒެޓް ކޮށްފައިވާ "ދިވެހިރާއްޖެއިން ޢުމްރާއަށް މީހުން ގެންދިއުމާބެހޭ އުސޫލު" ގައިވާ ގޮތުގެ މަތީން އެކަމަށް އެދި ޕްރޮޕޯޒަލް ހުށަހެޅޭނީ، އެ އުސޫލުގެ 5 ވަނަ މާއްދާގައި ބުނެދީފައިވާ ޝަރުޠު ފުރިހަމަވާ ކުންފުނިތަކަށް ކަމަށެވެ.

އުސޫލުގައިވާގޮތުން އުމްރާއަށް މީހުން ގެންދެވޭނީ 100 އިންސައްތަ ދިވެހިންގެ ހިއްސާ އޮންނަ ކުންފުނިތަކަށެވެ. ހުއްދައަށް އެދޭއިރު ކުންފުނީގެ މަޢުލޫމާތާއި، ޢުމްރާއަށް މީހުން ގެންދިއުމަށް އެދޭ އަދަދާއި، ޢުމްރާއަށްމީހުން ގެންދިއުމުގައި އެކުންފުންޏަކުން ޢަމަލުކުރާނެގޮތުގެ މުހިންމު ނުކުތާތައް އެކުލެވޭ ޕްރޮޕޯޒަލެއް އިސްލާމިކް މިނިސްޓްރީއަށް ހުށަހަޅަންޖެހޭނެކަމަށް އެ އުސޫލުގައި ބުނެފައިވެއެވެ.

އަދި ޕްރޮޕޯޒަލްފޮތް މިމަހުގެ 27ވަނަ ދުވަހުން ފެށިގެން 30ވަނަ ދުވަހާ ހަމައަށް އަށް ސަރުކާރު ބަންދުނޫން ކޮންމެ ދުވަހަކު 8:00 އިން 12:00 އަށް އެމިނިސްޓްރީގެ ކައުންޓަރުން ގަންނަން ލިބެން ހުންނާނެެކަމަށާއި، އެ ފޮތުގެ އަގަކީ ފަސްހާސް ރުފިޔާކަމަށް އެމިނިސްޓްރީން ވަނީ ބުނެފައެވެ

އަދި މަޢުލޫމާތު ދިނުމަށް ބާއްވާ ޕްރީ-ބިޑް މީޓިންގ މިމަހުގެ 31 ވަނަދުވަހުގެ 13:00 ގައި އިސްލާމި މިނިސްޓްރީގެ ޖަލްސާ ކުރާ މާލަމުގައި ކަމަށްވެސް އެމިނިސްޓްރީ ބުނެފައިވެއެވެ. ޕޯޒަލްތައް ބަލައިގަތުމަށް ހަމަޖެހިފައިވަނީ 05 ފެބްރުއަރީ 2019 ވާ އަންގާރަ ދުވަހު ހެނދުނު 10:00 ޖަހާއިރު ކަމަށްވެސް އެމިނިސްޓްރީއިން ބުނެފައިވެއެވެ.