އިންޑިއާ މެއިޑެއްގެ އަނިޔާ ފަސް އަހަރުގެ ދަރިފުޅަށް, ފަޅާ އެރުމުން ގެއަށް ގެއްލުންދީ ފިލައިފި

އުމުރުން ފަސް އަހަރުގެ ދަރިފުޅު ބަލަން ގެނައި އިންޑިއާ މެއިޑަކު އެ ކުއްޖާއަށް އެކި ގޮތްގޮތުން އަނިޔާކުރަމުން ދަނިކޮށް އެކަން ފަޅާ އެރުމުން ފިލައިފި އެެވެ.

ކުއްޖާގެ މަންމަ ވަނީ އެކަން އާންމުންގެ ސަމާލު ކަމަށް ގެނައުމަށް އެ ވާހަކަތައް ހިއްސާކޮށްފަ އެވެ. އަނިޔާ ލިބުނު ކުއްޖާގެ މަންމަ ބުނީ އޭނާގެ ދަރިފުޅު ބަލަން މެއިޑަކު ގެނައިތާ ދުވަސްކޮޅެއްގެ ފަހުން އެ ދަރިފުޅު އަބަދުހެން އުޅެނީ ބިރުން ކަމަށެވެ. އަދި މެއިޑަށް ނިސްބަތްކޮށް އެއީ "އައްޗި ދައްތަ" އެއް ކަމަށް ބުނަން ފެށި ކަމަށެވެ.

އެކަމާ ގުޅޭގޮތުން އެތައް ފަހަރަކު ސުވާލުކުރުމުން ދަރިފުޅު އަތުގެ އިޝާރާތުން މެއިޑް ކަރުގަ ހިފާ އަނިޔާ ކުރާ ކަމަށް ބުނި ކަމަށެވެ. ފަހުން ކަން ވާގޮތް ބެލިއިރު މެއިޑް މީހާ ރުޅި އަންނަ ކޮންމެ ފަހަރަކު ކުއްޖާގެ ކަރުގައި ހިފާ އަނިޔާ ކުރާކަން އެނގުނު ކަމަށެވެ.

އެކަން ފަޅާއެރުމުން ވަރަށް ރުޅިއައިސްގެން އޭނާއާ ދިމާއަށް އެއްޗެހި ކީ ކަމަށާ އޭގެ ފަހުން އެ އަންހެން މީހާ މުޅި ބަދިގެތެރެއަށް ތެލާއި ރީންދޫ އަޅާ މުޅިތަން ހަޑިކުރުމަށް ފަހު ފިލައިގެން ގޮސްފައިވާ ކަމަށެވެ.

އެ މައްސަލަ ފުލުހަށް ވެސް ހުށައެޅި ކަމަށާ ޖެންޑާ މެދުވެރިކޮށް މައްސަލަ ބަލަން ފުލުހުން އެދުނު ކަމަށެވެ. އަދި އެ އަންހެން މީހާ އަކީ އޭނާގެ ނަން މަތީގައި ރާއްޖެ އައިސްގެން އުޅޭ މީހަކަށް ނުވާތީ އެއީ ގާނޫނީ މައްސަލައެއްކަން ފުލުހުން ފާހަގަ ކުރުމުން އެ މައްސަލަ ދޫކޮށްލި ކަމަށެވެ. އެކަން އެގޮތަށް ކުރެވުނީ އެއީ ކުށެއްކަން ނޭންގި ކަމަށް ވެސް ކުއްޖާގެ މަންމަ ބުންޏެވެ.

އެ މީހާ ބުނީ އެ ވާހަކަތައް ހިއްސާކޮށްލީ ބިދޭސީ މެއިޑް މީހާއާމެދު އެހެން މީހުން ސަމާލުވުމަށެވެ. އެ އަންހެން މީހާގެ ވަނަވަރާއި ފޮޓޯ ވެސް ވަނީ އާންމުކޮށްފަ އެވެ.