އީރާނުގެ އަސްކަރިއްޔާ ބަލި ނުކުރެވުމުން، ހަމަލާތައް އިގްތިސާދީ ކާރުހާނާތަކަށް އަމާޒުކުރަނީ

އެމެރިކާ އާއި އިސްރާއީލުން އީރާނުގެ އަސްކަރިއްޔާ ބަލިނުކުރެވުމުން އެންމެފަހުން އެޤައުމުގެ އިޤްތިސާދީ ކާރުހާނާތަކަށް ހަމަލާތައްދޭން ފަށާފައިވާކަމަށް ބައިނަލްއަޤްވާމީ މީޑިއާތަކުން ރިޕޯޓްކޮށްފިއެވެ.

އެންމެފަހުން އިއްޔެ ނޫސްވެރިންނާ ވާހަކަދައްކަވަމުން އެމެރިކާގެ ރައީސް ޑޮނާލްޑް ޓްރަމްޕް ވިދާޅުވެފައިވަނީ، މިހާރު ވިސްނުމަކީ ކޮންމެގޮތެއް ހަދާފައިނަމަވެސް އީރާން ފުނޑުފުނޑުކޮށްލުން ކަމަށެވެ. ޓްރަމްޕް ވިދާޅުވީ މިހާރު އަމާޒަކީ އީރާނުގެ ބްރިޖްތަކަށާއި އިންޖީނުގެތަކަށް ހަމަލާދިނުން ކަމަށެވެ. މިއީ ކުރަން ބޭނުން ނުވި ކަމަކަށް ނުވިނަމަވެސް، ކުރިއަށްއޮތް ތަނުގައި މިއަށްވުރެވެސް ނުރައްކާތެރި ކަންކަން ކުރާނޭކަމުގެ އިޝާރާތެއް ޓްރަމްޕް ވަނީ ދެއްވާފައެވެ.

ޓްރަމްޕްގެ މިފަދަ އިންޒާރަކާއެކު އީރާނަށް ހަމަލާދިނުމުގެ އުސޫލަށް ބަދަލެއް ގެނެސްފައިމިވަނީ، ހަމަލާތައް ހުއްޓާލުމަށް އެޤައުމާއެކު ވާހަކަތައް ބޭއްވުމުގެ މާނައެއް ނެތްކަމަށް އީރާނުން ބުނެފައިވަނިކޮށް ކަމަށެވެ. އީރާނުން ބުނެފައިވަނީ ތަޖުރިބާއަށް ބަލައި އެމެރިކާ އާ ވާހަކަދެއްކުމަކީ ބޭނުމެއްނެތް ކަމެއްކަމަށެވެ.

އީރާނަށް ނިސްބަތްވާ މީޑިއާތަކުން ރިޕޯޓްކުރާ ގޮތުގައި އެމެރިކާ އަދި އިސްރާއީލުންދޭ ހަމަލާތައް މިހާރު އަމާޒުކޮށްފައިވަނީ އެޤައުމުގެ ޕެޓްރޯކެމިކަލް ސިނާއަތަށެވެ. މީގެ ސަބަބުން އެ ގައުމުގެ އިގްތިސާދަށާއި މުޅި ސަރަހައްދަށް ވެސް މިކަމުގެ ނޭދެވޭ އަސަރުތައް ފެތުރިގެންދާނޭކަމަށް އީރާނުންވެސް ވަނީ ބުނެފައެވެ. ބައިނަލްއަޤްވާމީ ޤާނޫނުތަކުގައިވާ ގޮތުން، އާންމު ރައްޔިތުން ބޭނުންކުރާ އަސާސީ ވަސީލަތްތަކަށާއި އުމްރާނީ ބިނާތަކަށް ހަމަލާދިނުމަކީ ހަނގުރާމައިގެ ޖަރީމާއެކެވެ.

އެމެރިކާގެ ރައީސް ޓްރަމްޕް ވަނީ އެޤައުމާއެކު ވާހަކަތައް ބޭއްވުމަށް މިއަދުގެ ނިޔަލަށް އީރާނުން އެއްބަސް ނުވެއްޖެނަމަ، އީރާނުގެ އިންޖީނުގޭތަކާއި ހަކަތަ އުފައްދާ ތަންތަނަށް ހަމަލާދޭނޭކަމަށް ބުނެފައެވެ. އެއާއެކު އީރާނުން ވަނީ އެތަންތަން ހުސްކުރުމުގެ މަސައްކަތްވެސް ފަށާފައެވެ. އެގޮތުން ޓްރަމްޕް ދެއްވި މުހުލަތުގެ ކުރިން މަހްޝަހްރު ޕެޓްރޯކެމިކަލް ޒޯނުގައި ހުރި ސިނާއީ މަރުކަޒުތައް ހުސްކުރުމުގެ މަސައްކަތް މިހާރުވެސް ކުރަމުންދާކަމަށް އީރާނުގެ މީޑިއާތަކުން ވަނީ ރިޕޯޓްކޮށްފައެވެ.

އީރާނުގައި އުފައްދާ ޕެޓްރޯކެމިކަލްގެ ގާތްގަނޑަކަށް 28 އިންސައްތަ ހިއްސާކުރަނީ މަހްޝަހްރުންނެވެ. އަދި އަސަލޫޔޭއިން 48 އިންސައްތައަށްވުރެ ގިނަ އުފެއްދުންތައް ހިއްސާކުރެއެވެ. މި ދެ މަރުކަޒު އެއްކޮށްލުމުން، އެ ގައުމުގެ ޖުމްލަ ޕެޓްރޯކެމިކަލް އުފެއްދުންތަކުގެ ހަތަރު ބައިކުޅަ ތިންބަޔަށް އަރައެވެ.

އީރާނަށް ބޭރު ފައިސާ ވަންނަ އެންމެ ބޮޑު ދާއިރާއަކީ ސާފުނުކުރާ ތެލަށްފަހު ޕެޓްރޯކެމިކަލް ސިނާއަތެވެ. އެ ގައުމަކީ އަހަރަކު ގާތްގަނޑަކަށް 95 މިލިއަން ޓަނުގެ ތަކެތި އުފެއްދުމުގެ ގާބިލުކަން ހުރި ގައުމެއް ނަމަވެސް، ކަރަންޓާއި ގޭސް ލިބުމުގައި ހުރި ދަތިތަކުގެ ސަބަބުން މިހާރު އުފެއްދެނީ 75 މިލިއަން ޓަނާ ގާތްކުރާ މިންވަރެކެވެ. މީގެ ތެރެއިން ދެބައިކުޅަ އެއްބައި، ނުވަތަ އަހަރަކު ގާތްގަނޑަކަށް 13 ބިލިއަން ޑޮލަރުގެ އުފެއްދުންތައް ބޭރު ގައުމުތަކަށް އެކްސްޕޯޓް ކުރެއެވެ.

އެހެންކަމުން، މި ވަސީލަތްތައް ބަންދުކުރަން ޖެހުމަކީ ހަމައެކަނި ވަގުތީ ގޮތުން މަސައްކަތްތަކަށް އައި މަޑުޖެހުމެއް ނޫނެވެ. މިއީ އީރާނަށް ބޭރު ފައިސާ ލިބޭ އެންމެ މުހިންމު އެއް މަގަށް ކުރިމަތިވި ސީދާ ނުރައްކަލެކެވެ. ގެއްލުން ލިބުނު ތަންތަން މެދު ރާސްތާއެއްގައި މަރާމާތު ނުކުރެވިއްޖެ ނަމަ، މެދުއިރުމަތީގައި ދެވަނައަށް އެންމެ ގިނައިން ޕެޓްރޯކެމިކަލް އުފައްދާ މި ގައުމަށް އެ ތަކެތީގެ ތަދުމަޑުކަމަކާ ވެސް ކުރިމަތިލާން ޖެހިދާނޭކަމަށް ތަޖުރިބާކާރުން ދަނީ ބުނަމުންނެވެ.

ފާއިތުވި ދިހަވަރަކަށް އަހަރު ތެރޭގައި އީރާނުން ވަނީ ޕެޓްރޯކެމިކަލް ސިނާއަތް ކުރިއެރުވުމަށް ގާތްގަނޑަކަށް 70 ބިލިއަން ޑޮލަރު އިންވެސްޓްކޮށްފައެވެ. ބޮޑެތި ގެއްލުންތަކެއް ލިބިއްޖެ ނަމަ، މި ތަންތަން އަލުން ބިނާކުރުމަކީ މާލީ ގޮތުންނާއި ފަންނީ ގޮތުން ކުރިމަތިވާނެ ބޮޑު ގޮންޖެހުމެކެވެ. އީރާނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކާއި، ބައިނަލްއަގުވާމީ މާލީ އެހީތެރިކަން ލިބުމުގައި ހުރި ހުރަސްތަކުގެ ސަބަބުން، އަވަސް މުއްދަތެއްގައި މި ތަންތަން މަރާމާތު ކުރުމުގެ ގާބިލުކަން އެ ގައުމުގައި ހުރެދާނެ ކަމަކަށް ނުބެލެވެއެވެ. ބޭރުގެ ފައިނޭންސް ލިބުނު ކަމުގައި ވިޔަސް، އުފެއްދުންތެރިކަން ކުރިން ހުރި މިންވަރަށް ގެނައުމަށް އެތައް އަހަރެއް، ނުވަތަ ދިހަ އަހަރަށްވުރެ ގިނަ ދުވަސް ނަގާފާނޭކަމަށް ދިރާސާކުރާ ފަރާތްތަކުން ބުނެއެވެ.