ހެލްމެޓް އަޅަން ނުޖެހޭ ސަރަަހައްދުތަކުގައި ހެލްމެޓް އަޅާ ފަރާތްތަކަށް ފާރަވެރިވަނީ!

ހެލްމެޓް އަޅަން ނުޖެހޭ ސަރަަހައްދުތަކުގައި ހެލްމެޓް އަޅާ މީހުންނަށް ފާރަވެރިވެ، ތުހުމަތުކުރެވޭ މީހުން ހުއްޓުވައި ބަލާ ފާސްކުރަމުންދާނެ ކަމަށް ފުލުހުންގެ ޚިދުމަތުން ބުނެފިއެވެ.

ފުލުހުންގެ ހިދުމަތުން ނެރުނު ނޫސްބަޔާނެއްގަައި ވަނީ ހެލްމެޓް އެޅުން ގާނޫނުތަކުން ލާޒިމްކޮށްފައިނުވާ ސަރަހައްދުތަކުގައި، ކާކުކަން ވަންހަނާކޮށް ކުށްކުށަށް އަރައިގަތުމުގެ ނިޔަތުގައި ހެލްމެޓް އަޅައިގެން ބައެއް މީހުން އުޅޭކަން ފާހަގަކޮށްފައެވެ. އަދި މިފަދަ މީހުން، ހިދުމަތް ދޭ ތަންތަނަށާއި ވިޔަފާރި ތަންތަނަށް ވަދެހަދަމުންދާކަން ފުލުހުންގެ މުއައްސަސާއިން ފާހަގަކޮށްފައި ވެއެވެ.

ޓްރެފިކް ގަވާއިދަށް ރިއާޔަތްކޮށް، ފުލުހުން ބުނީ އުޅަނދު ދުއްވަން އިންނަ މީހާއާއި އުޅަނދުގެ ފަހަތުގައި އިންނަ މީހާ ހެލްމެޓް އެޅުން ލާޒިމްކޮށްފައިވަނީ 30 ކިލޯމީޓަރަށްވުރެ ބާރަަށް އެއްގަމު އުޅަނދު ދުއްވަން ހުއްދަ ސަރަހައްދުތަކުގައި ކަމަށެވެ. އެގޮތުން، އެ ސަރަހައްދުތަކުގައި އުޅަނދު ދުއްވޭ ބާރުމިން އަންގައިދޭ ބޯޑެއް ހަރުކޮށްފައި ހުންނާނެކަންވެސް ފުލުހުން ވަނީ ފާހަގަކޮށްފައެވެ.

އެހެންކަމުން، ހެލްމެޓް އެޅުން ލާޒިމްކުރާ ސަރަހައްދުތައް ފިޔަވައި އެހެނިހެން ސަރަހައްދުތަކުގައި ހެލްމެޓް އަޅައިގެން އެއްގަމު އުޅަނދު ދުއްވާ މީހުންގެ ތެރެއިން  ތުހުމަތުކުރެވޭ މީހުން ހުއްޓުވައި ބަލާ ފާސްކުރަމުންދާނެ ކަމަށް ފުލުހުން ބުނެފައި ވެއެވެ. މިއީ އެންމެހައި ރައްޔިތުންގެ ސަލާމަތާއި ރައްކާތެރިކަން ކަށަވަރުކޮށް އަމާން ވެއްޓެއް ގާއިމުކުރުމުގެ ގޮތުން އަޅާ ފިޔަވަޅެއް ކަމަށް ފުލުހުން ބުނެފައި ވެއެވެ.