ބްރިޖް އަދި ހައިވޭގައި މިދިޔަ ހަފްތާ 45 އެކްސިޑެންޓް ހިނގި: ފުލުހުން

މިދިޔަ ހަފްތާގެ ތެރޭގައި ސިނަމާލެ ބްރިޖް އަދި ހައިވޭގައި 45 އެކްސިޑެންޓް ހިނގާފައިވާކަމަށް ފުލުހުން ބުނެފިއެވެ.

ފުލުހުން މިއަދު އާއްމުކުރި ތަފާސްހިސާބުތަކަށް ބަލާއިރު، މިދިޔަ ހަފްތާގައި 45 އެކްސިޑެންޓް ހިނގިއިރު 3 މީހަކަށް ވަނީ އަނިޔާތައް ލިބިފައެވެ. މީގެ ތެރެއިން 2 މީހަކަށް ވަނީ ސީރިއަސް އަނިޔާތަކެއް ލިބިފައެވެ. އަދި 42 މީހަކަށް ވަނީ ކުދިކުދި އަނިޔާތައް ލިބިފައެވެ.

މި އެކްސިޑެންޓްތަކުގައި 37 ވެހިކަލްއަށް ވަނީ  ގެއްލުންތައް ލިބިފައެވެ. ތަފާސްހިސާބަށް ބަލާއިރު، އެކްސިޑެންޓްތައް ގިނައިން ހިނގާފައިވަނީ ދުވާލުގަޑީގައެވެ. އެގޮތުން ދުވާލު 33 އެކްސިޑެންޓް ހިނގިއިރު، ރޭގަނޑު ހިނގާފައިވަނީ 12 އެކްސިޑެންޓެވެ.

ފުލުހުން އާއްމުކުރި ތަފާސްހިސާބުތަކަށް ބަލާއިރު އެކްސިޑެންޓްތައް ގިނައިން ހިނގާފައިވަނީ ސައިކަލާ ކާރާ ޖެހިގެންނެވެ. އެއީ 11 އެކްސިދެންޓެވެ. އެއަށްފަހު ދެން އެންމެގިނައިން އެކްސިޑެންޓް ހިނގީ ސައިކަލާ ސައިކަލް ޖެހިގެންނެވެ.

މާލެ ސަރަހައްދުގައި ހިނގާ އެކްސިޑެންޓްތައް މަދުކުރުމަށް ފުލުހުން ދަނީ ހާއްސަ މަސައްކަތްތަކެއް ކުރަމުންނެވެ. އެގޮތުން މާލެ އަދި ހުޅުމާލޭގެ އެކި ސަރަހައްދުތަކުގައި ފުލުހުން ގެންދަނީ ރޯޑްޝޯތައް ބާއްވަމުންނެވެ.