ޖެނުއަރީމަހުގެ ތެރޭގައި ސްރީލަންކާގައި ދިވެހި ޕާސްޕޯޓް ހަދައިދޭން ފަށާނަން: އިހުސާން
ލިޔުންތެރިޔާ
އަބްދުﷲ ހުސައިން
އަންނަ ޖެނުއަރީމަހުގެ ތެރޭގައި އަވައްޓެރި ސްރީނަލްކާގައި ޕާސްޕޯޓް ހެދުމުގެ ހިދުމަތް ފަށާނޭކަމަށް ދާހިލީ ވަޒީރު އަލީ އިހުސާން ވިދާޅުވެއްޖެއެވެ.
އިސްކަންދަރު ކޮށީގައި ބޭއްވި ނޫސްވެރިންގެ ބައްދަލުވުމުގައި ވަޒީރު އިހްސާން ވިދާޅުވީ، ސަރުކާރުގެ އަމާޒަކީ ރައްޔިތުންނާއި ގާތުން އަސާސީ ހިދުމަތްތައް ދިނުންކަމަށާއި، އެގޮތުން ދިވެހި ޕާސްޕޯޓް ހަދައިދިނުމުގެ ހިދުމަތް ދެން އެންމެ އަވަހަށް ފެށިގެންދާނީ ސްރީލަންކާގައި ކަމަށެވެ. އެގޮތުން އަންނަ ޖެނުއަރީމަހުގެ ތެރޭގައި ސްރީލަންކާގައި ޕާސްޕޯޓް ހަދައިދިނުމުގެ ހިދުމަތް ފެށިގެންދާއިރު، މިހާރުވެސް އައިޑީކާޑު ހަދައިދިނުމުގެ ހިދުމަތް ކުރިއަށްދާކަމަށް ވަޒީރު ވިދާޅުވިއެވެ.
ސްރީލަންކާއަށްފަހު އަންނަ އަހަރުގެ ތެރޭގައި އިންޑިއާ އަދި އިނގިރޭސިވިލާތުގައި ޕާސްޕޯޓް ހެދުމުގެ ހިދުމަތް ފަށާނޭކަން ވަޒީރު ފާހަގަކުރެއްވިއެވެ.
ސަރުކާރުން ދަނީ ދިވެހިން އެންމެގިނައިން ދިރިއުޅެމުންދާ ޤައުމުތަކުގައި ޕާސްޕޯޓް ހަދައިދިނުމުގެ ހިދުމަތް ތައާރަފްކުރަމުންނެވެ. އެގޮތުން މެލޭޝިއާގައި ދިވެހި ޕާސްޕޯޓް ހަދައިދިނުމުގެ ހިދުމަތް މިއަހަރުގެ އޭޕްރިލްމަހު ވަނީ ފަށާފައެވެ. މެލެޝިއާއަކީ އެކި ބޭނުންތަކުގައި ދިވެހިން ވަރަށްގިނައިން ދިރިއުޅެމުން އަންނަ ޤައުމެކެވެ. މިއީ ރާއްޖެ ފިޔަވައި މި ހިދުމަތް އެންމެ ފުރަތަމަ ފެށި ބޭރު ޤައުމުކަން ފާހަގަކޮށްލެވެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
