ގަސް އިންދުމާ، ގަސްތައް ބެލެހެއްޓުމަށް، ކޮންމެ ރަށެއްގައި ވެސް ސްޓެލްކޯއިން 'ގްރީން އޭޖެންޓެއް'ގެ ބަހައްޓަނީ

ގަސް އިންދުމަށްފަހު އެ ގަސްތައް ބެލެހެއްޓުމަށްޓަކާ ކޮންމެ ރަށެއްގައި ވެސް 'ގްރީން އޭޖެންޓެއް'ގެ ގޮތުގައި އެކުންފުނީގެ މުވައްޒަފަކު ބަހައްޓަން ނިންމަވާފައިވާ ކަމަށް ސްޓެލްކޯއިން ބުނެފިއެވެ.

ދުނިޔޭގެ ތިމާވެށީގެ ދުވަސް ފާހަގަކުރުމަށާ، ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ރިޔާސީ ވަޢުދު ފުއްދެވުމަށް ސަރުކާރާއި، ސަރުކާރު ކުންފުނި ތަކުން ގުޅިގެން އިއްޔެ ވަނީ 5 މިލިއަން ގަސް އިންދުމުގެ ޕްރޮގްރާމެއް ފަށާފައެވެ.

މި ޕްރޮގްރާމްގެ ދަށުން ސްޓެލްކޯއިން 5 ލައްކަ ގަސް އިންދުމަށް ވަނީ އެއްބަސްވެފައެވެ.

އެގޮތުން އެ މަސައްކަތް ފެށުމަށް ސްޓެލްކޯއިން އިއްޔެ ކ. ތުލުސްދޫގައި ކުރިޔަށް ގެންދިޔަ ހަރަކާތުގައި ބައިވެރިވެވަޑައިގެން ވާހަކަ ދައްކަވަމުން ފަހުމީ ވުދާޅުވީ، ސްޓެލްކޯގެ މަސައްކަތަކީ ތިމާވެއްޓާއި ވަރަށް ބޮޑަށް ގުޅިފައިވާ މަސައްކަތެއް ކަމަށެވެ. އަދި އެ ކުންފުނީގެ ސަބަބުން ތިމާވެއްޓަށް އެއްވެސް ނޭދެވޭ އަސަރެއް ކުރާކަށް ބޭނުން ނުވާކަމަށާއި، ގަސް އިންދުމުގެ ޕްރޮގްރާމްގައި އިސްނަގައިގެން ސްޓެލްކޯއިން މަސައްކަތް ކުރަމުން ދަނީ އެހެންވެ ކަމަށެވެ.

"ރައީސުލްޖުމްހޫރިއްޔާގެ ވަޢުދުފުޅާއި އެއްގޮތަށް އިރާދަކުރެއްވިއްޔާ އަޅުގަނޑުމެން ފަސް ލައްކަ ގަސް އިންދުމުގެ ޕްރޮގްރާމެއް މިއަދު ފެށިގެން މިދަނީ. މިއަދު ފެށިގެން މިދަނީ، މިކަމުގެ ފެށުން. އިރާދަކުރެއްވިއްޔާ އަޅުގަނޑުމެން މިގަސް އިންދާ ތަފްޞީލާއި، ގަސް އިންދާރަށްތަކާއި، އަދި ގަސް އިންދާ ތަންތަނުގެ ތަފާސް ހިސާބު އަޅުގަނޑުމެން މިނިސްޓްރީއާ އަދި ސަރުކާރުގެ ކަމާއި ބެހޭ އިދާރާތަކަށް ފޯރުކޮށްދެމުންދާނަން."

ސްޓެލްކޯގެ މެނޭޖިންގ ޑައިރެކްޓަރ ހުސައިން ފަހުމީ

ފަހުމީ ވިދާޅުވީ، މިހާރު އިންދާ ގަސްތަކުގެ ފައިދާ ބޮޑުވަމުން އަންނަ ތުއްތު ކުދިންނަށް ކުރާނެ ކަމަށާއެއީ، މުސްތަގުބަލަށްޓަކައި ކުރެވޭ އިންވެސްޓްމެންޓެއް ކަމަށެވެ.

އަދި އިއްޔެ ފެށި މި ޙަރަކާތުގެ ފުރަތަމަ ފިޔަވަހީގައި ކ. ތުލުސްދޫގައި އިންދި 6000 ގަހާއެކު، ސްޓެލްކޯއިން ޚިދުމަތްދޭ 33 ރަށެއްގައި ޖުމްލަ 27،000، ގަސް އިންދޭނެ ކަމަށާ އޭގެ ތެރޭގައި ހިމެނެނީ ދިވެހި ރުކާއި، އޮފި އެލޭ، ކިނބި އަދި ދިއްގާގެ އިތުރުން ހިރުނދު ގަސް ހިމެނޭކަން ފަހުމީ ފާހަގަކުރެއްވުއެވެ.

ގަސް އިންދުމުގެ ޙަރަކާތް ކުރިއަށް ގެންދިއުމަށްޓަކައި ކޮންމެ ރަށެއްގައިވެސް ގްރީން އޭޖެންޓެއް ކަނޑައެޅުމަށް ނިންމާފައިވާ ކަމަށް އެ ކުންފުނިން ވަނީ ބުނެފައެވެ. މިގޮތުން ކަނޑައަޅާ ގްރީން އޭޖެންޓުންގެ ޒިންމާއަކަށް ވަނީ މި ޙަރަކާތުގެ ތެރެއިން ކުރިއަށްގެންދާ ގަސްއިންދުމުގެ މަސައްކަތް ވިލަރެސްކުރުމާއި، ޙަރަކާތުގެ ތެރެއިން އިންދާ ގަސްތައް ބެލެހެއްޓުން ކަމަށްވެސް ސްޓެލްކޯއިން ބުނެއެވެ.

އެމްޑި ފަހުމީ ވަނީ އެކަމަށްޓަކައި ސްޓެލްކޯގެ މުވަށްޒަފުންނަށް ޝުކުރު އަދާކުރައްވާފައެވެ.

މީގެ އިތުރުން ހަކަތަ އުފެއްދުމަށް ސްޓެލްކޯއިން ކުރާ މަސައްކަތުގެ ތެރެއިން އުފެދޭ ކާބަން ފުޓްޕްރިންޓް ކުޑަކޮށް، ކާބަން އޮފްސެޓް ކުރުމުގެ އަމާޒުގައި ފެށި މި ޙަރަކާތުގައި ހިޔާލިބޭ ބޮޑެތި ގަސްގަހުގެ އިތުރުން ތަރުކާރީއާއި މޭވާ އަދި ހޭޅިފަށް ރައްކާތެރިކުރާ ފަދަ ގަސް އިންދުމަށް ސްޓެލްކޯއިން ނިންމާފައިވާކަންވެސް ފާހަގަކޮށްލަންޖެހެއެވެ.