މިދިޔަ ސަރުކާރުގައި ނެގި 100 މިލިއަން ޑޮލަރުގެ ލޯނެއް ދައްކައި ހަލާސްކޮށްފި

ނިމިގެންދިޔަ އެމްޑީޕީ ސަރުކާރުގައި ނެގި 100 މިލިއަން ޑޮލަރުގެ ލޯނެއް ދައްކައި ހަލާސްކޮށްފައިވާކަމަށް މާލީ ވުޒާރާއިން ބުނެފިއެވެ.

އެމްޑީޕީގެ ވެރިކަމުގައި މި ލޯނު ނަގާފައިވަނީ، 2022 ވަނަ އަހަރު އެމެރިކާގެ ކާގިލް ފައިނޭންޝަލް ސަރވިސް އިންޓަނޭޝަނަލްއިންނެވެ. ލޯނު ނަގާފައިވަނީ ބަޖެޓް ސަޕޯޓަށްކަމަށް މާލީ ވުޒާރާއިން ބުނެއެވެ. މާލީ ވުޒާރާއިްނ ބުނީ އެ ލޯނު ނަގާފައިވަނީ، 7.15 އިންޓަރަސްޓް ރޭޓްގައި 3 އަހަރުދުވަހުގެ ތެރޭގައި އަގުއަދާކުރާގޮތަށް ކަމަށެވެ. ލޯނު ދައްކާ ނިންމާފައިވަނީ އިންޓަރެސްޓާއެކުގައެވެ.

ލޯނު އަދާކޮށް ނިމުނުއިރު 100 މިލިއަން ޑޮލަރުގެ އިތުރުން 26 މިލިއަން ޑޮލަރު ވަނީ އިންޓަރސްޓްގެ ގޮތުގައި ދައްކާފައެވެ. ކާގިލް ފައިނޭންޝަލް ސަރވިސް އިންޓަނޭޝަނަލް އާއެކު މުއާމަލާތްކޮށްފައިވާ އެ ލޯނަށް ދައްކަންޖެހުނު ހުރިހާ ފައިސާއެއް ދައްކައި ނިންމާފައިވާކަން މާލީ ވުޒާރާގެ އޮފިޝަލަކު ވަނީ ވޮއިސްއަށް ކަށަވަރުކޮށްދީފައެވެ.

ސަރުކާރުން 126 މިލިއަން ޑޮލަރުގެ ލޯނެއް ދައްކައި ނިންމާފައިވަނީ، ބޭރުގެ ފަރާތްތަކަށް ލޯނުގެ ގޮތުގައި ދަންކަންޖެހޭ ފައިސާ ދެއްކުމުގެ ޤާބިލުކަން ސަރުކާރުގެ ނެތްކަމަށް އިދިކޮޅު ފަރާތްތަކުން ބުނަމުންދަނިކޮށެވެ. އަދި ބޭރުގެ މާލީ ބައެއް އިދާރާތަކުންވެސް ވަނީ ލޯނުތައް އަދާކުރުމުގައި ރާއްޖެއަށް ގޮންޖެހުންތައް ހުރިކަން ފާހަގަކޮށްފައެވެ.

ނިމިގެންދިޔަ ސަރުކާރުގައި ގެންގުޅުނު މާލީ ދޯހަޅީކަމުގެ ސަބަބުން އިގްތިސާދަށް ގޮންޖެހުންތައް ހުރިނަމަވެސް ކުރިމަތިވާ ކަންކަމަށް މި ސަރުކާރުން ކެރިގެން ކުރިމަތިލާނޭކަމަށް އިޤްތިސާދީ ވުޒާރާއިން ވަނީ މީގެކުރިން ބުނެފައެވެ. ރާއްޖެއަށް ދިމާވެފައިވާ ބޭރުގެ ފައިސާ ލިބުމުގެ ދަތިކަން ހައްލުކުރުމަށް މަރުކަޒީ ބޭންކާ ސަރުކާރު ގުޅިގެން ފިޔަވަޅުތަކެއް އެޅުމަށް ނިންމައި ބައެއް ކަންކަން މިހާރު ގެންދަނީ ތަންފީޒުކުރަމުންނެވެ. މިގޮތުން އެންމެ ފާހަގަކޮށްލެވެނީ ޓޫރިޒަމުން ރާއްޖެއަށް ވަންނަ ބޭރުފައިސާ ހޯދުމުގައި އަޅާފައިވާ ފިޔަވަޅެވެ.