މިފަހަރުވެސް މެސީއާއެކު އާޖެންޓީނާ ސަލާމަތްކޮށްދިނީ މާޓިނޭޒް

އެމެރިކާގައި މިހާރު ކުރުއަށްދާ ކޮޕާ އެމެރިކާ ފުޓްބޯޅަ މުބާރާތުގެ ކުއާޓާ ފައިނަލް ފުރަތަމަ މެޗުގައި އެންމެ ފަހުގެ ޗެންޕިއަން އާޖެންޓީނާއި އެކުއެޑޯ ވާދަކުރި މެޗުގެ ފުރިހަމަ ވަގުތު ހަމަވިއިރު، 1-1 ގެ ނަތީޖާއަކުން ދެޓީމު އެއްވަރުވެ ނަތީޖާ ނެރުމައްޓަކައި ޖެހި ޕެނަލްޓީގައި 2-4 ގެ ނަތީޖާ އަކުން މޮޅުވެ އާޖެންޓީނާ މުބާރާތުގެ ސެމީ ފައިނަލުން ޖާގަ ހޯދައިފިއެވެ.

އާޖެންޓީނާ މުބާރާތުގެ ކުއާޓާ ފައިނަލުން ޖާގަ ހޯދީ ގުރޫޕް ސްޓޭޖުގައި ކުޅުނު ތިން މެޗުން ވެސް މޮޅުވެ ގުރޫޕް އޭގެ އެއްވަނަ ޓީމުގެ ގޮތުގައެވެ. އަދި އެކުއެޑޯ ކުއާޓާ ފައިނަލުން ޖާގަ ހޯދީ ގުރޫޕް ސްޓޭޖުގައި ކުޅުނު ތިން މެޗުގެ ތެރެއިން އެއްމެޗުން ބަލިވެ، އެއްމެޗުން މޮޅުވެ އަނެއް މެޗު އެއްވަރުކޮށް ލިބުނު ހަތަރު ޕޮއިންޓާއެކު ގުރޫޕް ބީގެ ދެވަނަ ޓީމުގެ ގޮތުގައެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަމަ ލަނޑުޖަގައި ކުރިހޯދީ އާޖެންޓީނާ އިންނެވެ. މިލަނޑު ފުރަތަމަ ހާފުގެ 35 ވަނަ މިނެޓުގައި ކާމިޔާބުކޮށްދިނީ ޑިފެންޑަރު ލިސާންޑްރޯ މާޓިނޭޒް އެވެ. މިއީ އެޓީމަށް ލިބުނު ކޯނަރެއްގައި އެލެކްސިސް މާކް އެލިސްޓާ ގޯލު ކުރިމައްޗަށް ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

މީގެ އިތުރުން ވެސް މިހާފުގައި ދެޓީމުންވެސް ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް ފުރަތަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބުނުކުރެވި 1-0 ގެ ނަތީޖާއަކުން އާޖެންޓީނާ ކުރީގައި އޮވެގެންނެވެ.

މެޗުގެ ދެވަނަ ހާފުގައި އެކުއެޑޯއިން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮއްފައެވެ. ނަތީޖާއަކަށް ވެގެންދިޔައީ ދެވަނަ ހާފުގެ 60 ވަނަ މިނެޓުގައި އެޓީމަށް ވަނީ ޕެނަލްޓީއެއް ލިބިފައެވެ. މިއީ އާޖެންޓީނާގެ ޕެނަލްޓީ އޭރިއާ ތެރެއިން އެޓީމުގެ މިޑްފީލްޑަރު ރޮޑްރިގޯ ޑި ޕޯލްގެ އަތުގައި ބޯޅަ ޖެހުމުގެ ސަބަބުން ރެފްރީ އެޓީމަށް ދިން ޕެނަލްޓީއެކެވެ.

ނަމަވެސް އެޓީމުގެ ކެޕްޓަން އެނާ ވެލެންސިއާއަށް ކުރިއަށް ފޮނުވަލި ބޯޅަ އަމާޒުވީ ގޯލުގެ އަރިމަތީ ދަނޑިއަށެވެ. އަދި މެޗުގައި އެކުއެޑޯ އިން ކުރަމުންދިޔަ މަސައްކަތް ކާމިޔާބުވީ ދެވަނަ ހާފުގެ އިތުރު ވަގުތުގެ ފުރަތަމަ މިނެޓުގައެވެ. މިލަނޑު އެޓީމަށް ކާމިޔާބުކޮށްދިނީ ދެވަނަ ހާފުގައި ބަދަލު ކުޅުންތެރުއެއްގެ ގޮތުގައި ކުޅެން ނިކުތް މިޑްފީލްޑަރު ކެވިން ރޮޑްރިގޭޒެވެ.

މިލަނޑާއެކު މެޗުގެ ކުޅުން ނިމިގެންދިޔައީ 1-1 ގެ ނަތީޖައަކުން ދެޓީމު އެއްވަރުވެފައި އޮވެގެންނެވެ. މިއާއެކު މެޗުގެ ނަތީޖާ ނެރުމަށްޓަޖައި ޖެހި ޕެނަލްޓީގައި އާޖެންޓީނާގެ ފުރަތަމަ ޕެނަލްޓީ ކެޕްޓަން ލިއޮނަލް މެސީ ކުރިއަށް ފޮނުވާލުމުން އަމާޒުވީ ގޯލުގެ ހުރަސް ދަނޑިއަށެވެ. ނަމަވެސް އެކުއެޑޯގެ ފުރަތަމަ ދެ ޕެނަލްޓީ އާޖެންޓީނާގެ ކީޕަރު އެމިލިއާނޯ މާޓިނޭޒް ދިފާއު ކުރުމުގެ އިތުރުން އެޓީމުގެ އަލްވަރޭޒް، އެލިސްޓާ، މޮންރެއަލް އޮޓަމެންޑީ ކާމިޔާބުކުރި ޕެނަލްޓީ އާއެކު 4-2 ގެ ނަތީޖާއަކުން އެޓީމު ވަނީ މެޗު ކާމިޔާބުކޮށްފައެވެ.

ސެމީފައިނަލްގައި އާޖެންޓީނާއަށް ބައްދަލުކުރަން ޖެހޭނީ މާދަމާ ހެނދުނު ވެނެޒުއޭލާއާއި ކެނެޑާގެ މެދުގައި ކުޅުމަށް ހަމަޖެހިފައިވާ ކުއާޓާ ފައިނަލްގެ ދެވަނަ މެޗުން މޮޅުވާ ޓީމަކާއި ދެކޮޅަށެވެ. އަދި މިމެޗުން ބަލިވުމާއެކު އެކުއެޑޯއިންވަނީ އެ ޓީމުގެ ކޯޗު ފީލިކްސް ސަންޗޭޒް މަގާމުން ވަކިކޮށްފައެވެ.

ބާކީ ތިން އަހަރު އޮއްވާ ފީލިކްސް މަގާމުން ވަކިކުރުމަށް ފަހު އެކުއެޑޯގެ ފުޓްބޯލް ފެޑެރޭޝަނުންވަނީ އޭނާއާއި އޭނާގެ ކޯޗިން ސްޓާފުން އެޓީމަށް ކޮށްދިން ހިދުމަތަށް ޝުކުރު އަދާކޮށްފައެވެ.