އެމްޑަބްލިއުއެސްސީއަށް ލިބެންޖެހޭ 847 މިލިއަނަށްވުރެ ގިނަ ރުފިޔާ އެބައޮތް: އޮޑިޓް

ޤައުމީ ފެންކުންފުނި، މޯލްޑިވްސް ވޯޓާ އެންޑް ސްވްރޭޖް ކޮމްޕެނީ (އެމްޑަބްލިޔުއެސްސީ) އަށް ލިބެންޖެހޭ 847 މިލިއަނަށްވުރެ ގިނަ ރުފިޔާ ނުލިބި އެބައޮތްކަމަށް ފެންކުންފުނީގެ މާލީބަޔާނުން ދައްކައިފިއެވެ.

އޮޑިޓަރ ޖެނެރަލްގެ އޮފީހުން ނެރެފައިވާ ފެން ކުންފުނީގެ 2024 ވަނަ އަހަރުގެ މާލީބަޔާނަށް ބަލާއިރު، އެކުންފުނިން ކުރި ވިޔަފާރިން މިދިޔަ އަހަރުގެ ނިޔަލަށް 847.7 މިލިއަން ރުފިޔާ ލިބެންޖެހެއެވެ. މިއީ 2023 ވަނަ އަހަރުގެ މާލީބަޔާނުން ދައްކާ އަދަާ އަޅާބަލާއިރު 231.1 މިލިއަން ރުފިޔާގެ އިތުރުވުމެކެވެ. 2023 ވަނަ އަހަރު ނިމުނުއިރު ފެން ކުންފުންޏަށް 616.1 މިލިއަން ރުފިޔާ ލިބެންޖެހެއެވެ.

މާލީ ބަޔާނަށް ބަލާއިރު ފެންކުންފުންޏަށް ލިބެންޖެހޭ މައިގަނޑު އަދަދު ލިބެންޖެހެނީ އެކުންފުންޏާ ގުޅުންހުރި ފަރާތްތަކުންނެވެ. އެގޮތުން ސަރުކާރުގެ އެކި އިދާރާތަކުން ފެންކުންފުންޏަށް 770.1 މިލިއަން ރުފިޔާ ލިބެންޖެހެއެވެ.

އެމްޑަބްލިއުއެސްސީއަށް ލިބެންޖެހޭ ފައިސާއާ އަޅާބަލާއިރު، އެކި ފަރާތްތަކަށް އެކުންފުނިން ދައްކަންޖެހޭ ފައިސާގެ އަދަދު ނިސްބަތުން ދަށެވެ. އެގޮތުން ފެންކުންފުނިން އެހެން ފަރާތްތަކަށް ދައްކަންޖެހޭ ފައިސާގެ ގޮތުގައި އުޅެނީ 46.2 މިލިއަން ރުފިޔާއެވެ. މީގެ ތެރެއިން އެފްއެސްއެމަށް 18.7 މިލިއަން ރުފިޔާ ދައްކަންޖެހޭއިރު، ސްޓެލްކޯއަށް 17.4 މިލިއަން ރުފިޔާ އަދި އެޗްޑީސީއަށް 8.1 މިލިއަން ރުފިޔާ ދޭންޖެހެއެވެ.

އެމްޑަބްލިއުއެސްސީއަށް މިދިޔަ އަހަރު އާމްދަނީގެ ގޮތުގައި ވަނީ 1.6 ބިލިއަން ރުފިޔާ ލިބިފައެވެ. އެންމެގިނައިން އާމްދަނީ ލިބިފައިވަނީ ޔުޓިލިޓީ ހިދުމަތްތަކުން ލިބުނު އެއްބިލިއަން ރުފިޔާ އާއި، އިމާރާތްކުރުމުގެ ބައިން ލިބުނު 347 މިލިއަން ރުފިޔާގެ އިތުރުން ފެނާ އައިސް ވިއްކައިގެން ލިބުނު 236 މިލިއަން ރުފިޔާއެވެ. ފެން ކުންފުންޏަށް މިދިޔަ އަހަރު ސާފްފައިދާގެ ގޮތުގައި ލިބިފައިވަނީ 226 މިލިއަން ރުފިޔާއެވެ. އެކުންފުންޏަށް 2023 ވަނަ އަހަރު ސާފްފައިދާގެ ގޮތުގައި ލިބިފައިވަނީ 2187 މިލިއަން ރުފިޔާއެވެ.

އެމްޑަބްލިއުއެސްސީއަކީ ދިވެހި ސަރުކާރުގެ 80 އިންސައްތަ އަދި ޖަޕާނުގެ ހިޓާޗީ ކުންފުނީގެ 20 އިންސައްތަ ހިއްސާވާ ދިވެހިންގެ ޤައުމީ ފެންކުންފުންޏެވެ.