އަމާޒުކުރަނީ ރޯދަ މަސް އަންނަންވާއިރަށް ރާއްޖޭގެ ކަރަންޓުގެ މައްސަލަ ހައްލުކުރަން: ރައީސް ޑރ.މުޢިއްޒު

ކުރިއަށް އޮތް ރަމަޟާން މަސް އައުމުގެ ކުރިން ރާއްޖެއަށް ދިމާވެފައިވާ ކަރަންޓުގެ މައްސަލަ އަށް ހައްލެއް ގެނައުމަށް އަމާޒުކުރައްވާކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

ރައީސް ޑރ.މުޢިއްޒު މިފަދައިން ވިދާޅުވީ، އެމަނިކުފާނު މިހާރު ހުވަދުއަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން ގދ.ފިޔޯރީއަށް ވަޑައިގެން ރޭގައި އެރަށުގެ ރައްޔިތުންނާއި ބައްދަލުކުރައްވައި ވާހަކަފުޅު ދައްކަވަމުންނެވެ.

ރައީސް ޑރ.މުޢިއްޒު ވިދާޅުވީ، ރޯދަ މަސް ކައިރިވުމާއިއެކު، ފިޔޯރީއެކޭ އެއްފަދައިން ރާއްޖޭގެ ގިނަ ރަށްތަކަކަށް ދިމާވެފައިވާ ކަރަންޓުގެ މައްސަލައަށް ހައްލެއް ގެނައުމަށް ހާއްސަ އިސްކަމެއްދެއްވާކަމަށެވެ.

"ވަރަށް އިސްކަމެއް އަޅުގަނޑުމެން ދެން، ޚާއްސަކޮށް ރޯދަ މަސް އަންނާތީއާއި އެކީގައި، ކަރަންޓުގެ މައްސަލައަށް ހައްލު ގެނެސްދިނުމަށް. މިއީ މިރަށެކޭ އެއްގޮތަށް ވަރަށް ގިނަ ރަށްތަކުގައި ވަރަށް ބޮޑުވެފައި އޮތް މައްސަލައެއް. ފެނަކައިގެ އިންޖީނު ގެތަކުގެ ޖަނަރޭޓަރުތައް ހަލާކުވުން. ނޫނިއްޔާ ބަދަލުކުރަންޖެހި، އިތުރުކުރަންޖެހި، ސައިޒު ބޮޑު ކުރަން ޖެހިފައި މިހުރީ،"

ރައީސް ޑރ.މުޢިއްޒު ވިދާޅުވިއެވެ.

މި ކަންތައްތައް ރަނގަޅު ކުރުމަށްޓަކައި މިދިޔަ އަހަރު ވަރަށް ބޮޑު ހޭދައެއް ދައުލަތުން ކުރަން ޖެހުނުކަން ފާހަގަކުރައްވާ ރައީސް ޑރ.މުޢިއްޒު ވިދާޅުވީ، އެތަންތަން ނުބަލަހައްޓާ އެތައް ދުވަހެއް ވެފައިވާކަމަށާއި، މިކަން ހައްލު ކުރުމަށްޓަކައި ހާއްސަ މަސައްކަތްތަކެއް ފަށާފައިވާކަމަށެވެ.

މިގޮތުން، މާލީ ވުޒާރާ އާއި ފެނަކަ އާއި އެސްޓީއޯ، އެމްޓީސީސީ ފަދަ ކުންފުނިތައް ގުޅިގެން ރަމަޟާން މަސް އައުމުގެ ކުރިން މި މައްސަލަ ހައްލުކުރުމަށް އަމާޒު ކުރާކަމަށް ރައީސް ޑރ.މުޢިއްޒު ވިދާޅުވިއެވެ.

މިގޮތުން، ކަރަންޓުގެ މައްސަލަ ދިމާވެފައިވާ އެންމެ ރަށެއްވެސް ދޫކޮށްނުލައި، ހުރިހާ ރަށެއްގައި ޖަނަރޭޓަރުތަކުގެ މައްސަލަ ހައްލު ކުރުމަށް ގެންނަން ޖެހޭ ޖެނެރޭޓަރުތައް ގެނެސް، އިންސްޓޯލް ކުރާނެކަމަށް ރައީސް ޑރ.މުޢިއްޒު ވިދާޅުވިއެވެ.

ރައީސް ޑރ.މުޢިއްޒު ވިދާޅުވީ، މިއީ ގޮންޖެހުމެއް ނަމަވެސް، ކުރިއަށް އޮތް 2 މަސްދުވަހުގެ ތެރޭގައި ރާއްޖޭގެ ހުރިހާ ރަށެއްގައި ރަމަޟާން މަހު ރައްޔިތުން ކަންބޮޑުވާން ނުޖެހޭ ފެންވަރަށް ކަރަންޓުގެ މައްސަލައަށް ހައްލު ގެނައުމަށް މަސައްކަތްކުރައްވާނެކަމަށެވެ.