މެލޭޝިޔާގައި ކިޔަވާ ދިވެހި ދަރިވަރުންނަށް 'ލީން ސްޓާޓަޕް ލެބް' ޕްރޮގްރާމް ބާއްވައިފި

ރާއްޖޭގެ ސްޓާޓަޕް އިކޯސިސްޓަމް ބިނާކުރުމަށް މަސައްކަތްކުރާ 'ސްޕާކް ހަބް' އިން އިސްނަގައިގެން، މެލޭޝިޔާގައި ކިޔަވާ ދިވެހި ދަރިވަރުންނަށް އަމާޒުކޮށްގެން ބޭއްވި 'ލީން ސްޓާޓަޕް ލެބް - މެލޭޝިޔާ އެޑިޝަން' ކާމިޔާބުކަމާއެކު ނިންމާލައިފިއެވެ.

މި މަހުގެ 23 އިން 26 އަށް މެލޭޝިޔާގެ އޭޝިއާ ޕެސިފިކް ޔުނިވަރސިޓީ (އޭޕީޔޫ) ގައި ކުރިއަށްދިޔަ މި ޕްރޮގްރާމަކީ، އެ ޔުނިވަރސިޓީ އާއި އޭޕީޔޫގެ މޯލްޑިވްސް ސްޓޫޑެންޓްސް އެސޯސިއޭޝަނާ ގުޅިގެން ހިންގި ޕްރޮގްރާމެކެވެ. 48 ގަޑިއިރަށް ދެމިގެންދިޔަ މި ޕްރޮގްރާމްގައި މެލޭޝިޔާގެ މުހިންމު ހަތަރު ޔުނިވަރސިޓީއަކުން ޖުމްލަ 30 ދަރިވަރުން ބައިވެރިވިއެވެ. އޭގެ ތެރޭގައި 28 ދިވެހި ދަރިވަރުންނާއި ބައިނަލްއަގުވާމީ 2 ދަރިވަރުން ހިމެނެއެވެ.

މި ޕްރޮގްރާމުގައި ބައިވެރިވެފައިވަނީ އޭޝިއާ ޕެސިފިކް ޔުނިވަރސިޓީ، ސަންވޭ ޔުނިވަރސިޓީ، ޓޭލާސް ޔުނިވަރސިޓީ އަދި މޮނާޝް ޔުނިވަރސިޓީ މެލޭޝިޔާގެ ދަރިވަރުންނެވެ.

'ލީން ސްޓާޓަޕް ލެބް' އަކީ ދުނިޔޭގެ 'ލީން ސްޓާޓަޕް މެޝިން' އޮނިގަނޑަށް ބިނާކޮށް ސްޕާކް ހަބުން ތަރައްގީކޮށްފައިވާ އުފެއްދުމެކެވެ. މި ޕްރޮގްރާމްގެ މައިގަނޑު މަގްސަދަކީ ވިޔަފާރިއެއް ފެށުމުގެ ކުރިން، ދިމާވާ މައްސަލަތަކާއި ކަސްޓަމަރުންގެ ބޭނުންތައް ދެނެގަނެ، އެކަންކަން އަމަލީ ގޮތުން ތަޖުރިބާކޮށް ކަށަވަރުކުރުމެވެ.

ސްޕާކް ހަބްގެ ކޯ-ފައުންޑަރ އަދި ސީއީއޯ ހުސައިން ޖިނާން ވިދާޅުވީ، މިއީ ރާއްޖެއިން ބޭރުގައި މި ޕްރޮގްރާމް ބޭއްވި ދެވަނަ ފަހަރު ކަމަށާއި، އަމާޒަކީ ރާއްޖޭގައި އުފައްދާ މިފަދަ ޕްރޮގްރާމްތައް ބައިނަލްއަގުވާމީ ފެންވަރުގައި ކުރިއަށް ގެންދިއުން ކަމަށެވެ.

މި ވޯކްޝޮޕްގެ ލީޑް ފެސިލިޓޭޓަރެއްގެ ގޮތުގައި މަސައްކަތް ކުރެއްވީ ތަޖުރިބާކާރު ޓްރެއިނަރު ދާނިޝް އާތިފެވެ.

މީގެ އިތުރުން، 'އަކުރު ޓައިޕް' ގެ ކާމިޔާބީގެ ވާހަކަ ހިއްސާކުރައްވަމުން އަބްދުالله ޝަފީއު (އަބޯ) ކޭސް ސްޓަޑީ ސެޝަނެއް ނަގައިދެއްވިއިރު، އޭއައި ޓޫލްސް ބޭނުންކޮށްގެން އުފެއްދުންތައް ތައްޔާރުކުރާނެ ގޮތުގެ ސެޝަނެއް ޝާފިއު ހުސައިން ކުރިއަށް ގެންދެވިއެވެ.

މެންޓަރުންގެ ގޮތުގައި އަހުމަދު ރިޝްވާން (ރިޝީ)، މަހްފޫޒް އަލީ (މޯ މޯޝަން)، އަދި ފެމިލީ ރޫމް ކޭއެލްގެ އަފްރާހުގެ އިތުރުން ސްޕާކް ހަބްގެ ޕާޓްނަރުން ކަމަށްވާ ޔާމީން އަދި އައިޝާ އަދުނާން ބައިވެރިވެ، ދަރިވަރުންނަށް މައުލޫމާތު ދިނެވެ.

އޭޕީޔޫގެ މޯލްޑިވްސް ސްޓޫޑެންޓްސް އެސޯސިއޭޝަނުގެ ރައީސް ޒީދާން ޒައީމް ފާހަގަކުރެއްވި ގޮތުގައި، މިއީ، ދަރިވަރުންގެ މުސްތަގުބަލަށް ބޭނުންތެރި ހުނަރުތަކެއް ދަސްކޮށްދިން، ދިރިއުޅުމަށް ބަދަލުތަކެއް ގެނުވި ވަރަށް މުހިންމު ފުރުސަތެކެވެ.

2018 ވަނަ އަހަރުން ފެށިގެން ރާއްޖޭގައި ސްޓާޓަޕް އިކޯސިސްޓަމް ބިނާކުރުމަށް މަސައްކަތްކުރާ ސްޕާކް ހަބުން ބުނީ، ކުރިއަށް އޮތް ތަނުގައިވެސް ދިވެހި ދަރިވަރުން ދިރިއުޅޭ އެކި ގައުމުތަކުގައި މިފަދަ ޕްރޮގްރާމްތައް ހިންގުމަށް މަސައްކަތް ކުރަމުންދާނެ ކަމަށެވެ.