ތިމާވެއްޓާއި، އިޤްތިޞާދީ އަދި އިޖްތިމާޢީ ދާއިރާތަކުގެ ދިރާސާތަކަށް ގްރާންޓްތައް ތަޢާރަފުކުރަނީ!

ވަޢުުފުޅާއި އެއްގޮތަށް ރިސާޗް ސެންޓަރެއް ހަދައި، ތިމާވެށި ދެމެހެއްޓުމާއި، އިޤްތިޞާދީ ތަރައްޤީ އަދި އިޖްތިމާޢީ ދުޅަހެޔޮކަމުގެ ދާއިރާތަކުގެ ދިރާސާ ތަކަށް ގްރާންޓްތައް ތަޢާރަފުކުރުމުގެ މަސައްކަތް ކުރިއަށްދާ ކަމަށް ރައީސުލްޖުމްހޫރިއްޔާ ޑރ މުހައްމަދު މުޢިއްޒު ވިދާޅުވެއްޖެއެވެ.

“ތެވެލި މަހާސިންތާ 2024” އިފްތިތާޙް ކުރުމަށް މިއަދު ބޭއްވުނު ރަސްމިއްޔާތުގައި ވާހަކަ ދައްކަވަމުން ރައީސް ވިދާޅުވީ، ދިރާސާކުރުމަކީ ސިޔާސަތުތައް އެކުލަވާލުމުގައި ވަރަށް މުހިންމު ކަމެއް ކަމަށެވެ.

އެއީ ހެކީގެ މައްޗަށް ބިނާކޮށް އެކަށީގެންވާ އާންމު ސިޔާސަތުތަކެއް އެކުލަވާލުމަށް އަސާސެއް ގާއިމުކޮށްދޭ ކަމެއް. މިކަމުން ނިންމުންތައް ނިންމާ ފަރާތްތަކަށް މަގުދައްކައިދިނުމުގެ އިތުރުން، މާލީ އިންވެސްޓްމަންޓްތައް އިތުރުކޮށް، ސައިންސާއި ޓެކްނޮލޮޖީގެ ކުރިއެރުމަށް މަގުފަހިކޮށްދީ، އައު އަދި މުހިންމު ގޮތެއްގައި ހެކީގެ މައްޗަށް ބިނާކޮށްފައިވާ ހައްލުތައް ގައުމީ އަދި ދުނިޔޭގެ ގޮންޖެހުންތަކަށް ހޯދައިދޭ.

ރައީސުލްޖުމްހޫރުއްޔާ ޑރ މުހައްމަދު މުޢިއްޒު

މިއާއެކު ރައީސް ވިދާޅުވީ، ގިނަ ދާއިރާތަކުގެ ދިރާސާތަކަކީ އައު ކަންތައްތައް އުފެއްދުމާއި މުޖުތަމަޢުގެ ގޮންޖެހުންތަކަށް ހައްލު ހޯދުމުގައި ގައުމީ ތަރައްގީގައި މުހިންމު ދައުރެއް އަދާކުރާ ކަމެއް ކަމަށެވެ. އަދި ރާއްޖެ ފަދަ ކުޑަ ޖަޒީރާ ގައުމަކަށް، ގައުމުގެ މުސްތަގުބަލާ މެދު އޮތް ތަސައްވުރާ ގުޅޭގޮތަށް ދިރާސާ ނިޒާމުތައް ކުރިއެރުވުމަކީ ވަރަށް މުހިންމު ކަމެއް ކަމަށެވެ.

ރައީސް އިތުރަށް ވިދާޅުވީ، ޤައުމުގެ ކުރިއެރުމުގައި ދިރާސާތަކުގެ މުހިންމު ދައުރު ފާހަގަކޮށް، ފާއިތުވި ނޮވެމްބަރު މަހު އެމަނިކުފާނު މަޤާމާ ހަވާލުވެވަޑައުގެންނެވި ފުރަތަމަ ދުވަހު، ޢިލްމުވެރިންނާއި ތަޢުލީމީ މާހިރުންނަށް އެބޭފުޅުންގެ ތަޖުރިބާ ބޭނުންކުރުމަށް އިލްތިމާސްކުރެއްވި ކަމަށެވެ. ސަރުކާރުން ޢިލްމުވެރިންނަށް މަރުޙަބާ ކިޔައި އެހީތެރިވެދެއްވާނެ ކަމަށް އެމަނިކުފާނު ވަނީ ވަޢުދުވެ ވަޑައިގެންފައެވެ.

މި މަޤްޞަދު ހާސިލުކުރުމަށްޓަކައި، އަޅުގަނޑުމެން ދިރާސާތަކުގެ މައްޗަށް ބިނާކުރެވިފައިވާ މުސްތަޤްބަލެއްގެ މައިގަނޑު ބިންގަލެއްގެ ގޮތުގައި ނޭޝަނަލް ރިސަރޗް ކައުންސިލެއް ޤާއިމުކުރަމުން މިދަނީ. މި މަސައްކަތާއެކު، އަޅުގަނޑުމެންގެ އިސްލާޙީ އެޖެންޑާއާ އެއްގޮތަށް، ޚާއްޞަކޮށް ތިމާވެށި ދެމެހެއްޓުމާއި، އިޤްތިޞާދީ ތަރައްޤީ އަދި އިޖްތިމާޢީ ދުޅަހެޔޮކަމުގެ ދާއިރާތަކުގައި ދިރާސާ ގްރާންޓްތައް ތަޢާރަފުކުރުމަކީ، ބިނާކުރުވަނިވި ޢިލްމީ މުޖުތަމަޢުއެއް ބިނާ ކުރުމަށް ވެފައިވާ ވަޢުދުގެ ހެއްކެއް

ރައީސުލްޖުމްހޫރިއްޔާ ޑރ މުހައްމަދު މުޢިއްޒު

މީގެ އިތުރުން، ރައީސް މުޢިއްޒު ވިދާޅުވީ، ދިރާސާކުރާ ފަރާތްތަކާއި ސިޔާސަތު އެކުލަވާލާ ފަރާތްތަކާ ދެމެދު އޮންނަ ގުޅުން ބަދަހިކުރުމަށް އާ ނިޒާމުތަކެއް ތަޢާރަފުކުރަމުންދާ ކަމަށާ އެކަމުގެ ސަބަބުން، ސިޔާސަތުތައް އެކުލަވާލުމުގެ މަރުޙަލާގައި ދިރާސާތަކުގެ ނަތީޖާތައް ހިމެނޭކަން ކަށަވަރުކުރެވި، ދިވެހިރާއްޖޭގައި ދިރާސާތަކުގެ މައްޗަށް ބިނާކޮށް ނިންމުންތައް ނިންމުމުގެ ސަގާފަތެއް އުފެދި، އެކަން އިތުރަށް ފުޅާވަމުންދާނެ ކަމަށެވެ.

މިއާއެކު، ދިރާސާތައް ކުރިއަރައި ދިއުމަށްޓަކައި، އެކަމަށް އެހީތެރިކަން ފޯރުކޮށްދޭން ޖެހޭކަން ފާހަގަކުރައްވައި ރައީސް ވަނީ، ދިރާސާތަކަށާއި ތަރައްޤީއަށް ކުރެވޭ އިންވެސްޓްމަންޓްތައް އިތުރުކުރުމަށާއި، ތަޢުލީމީ މަރުކަޒުތައް ވަރުގަދަކުރުމަށް އާ މަޝްރޫޢުތަކެއް ފެށުމަށާއި، އަދި ޤައުމީ ތަރައްޤީގެ އިސްކަންދޭ ދާއިރާތަކާ ގުޅޭގޮތުން ދިރާސާކުރާ ފަރާތްތަކަށް އިތުރު ފުރުޞަތުތައް ހޯދައިދިނުމަށް ނިންމަވާފައިވާ ކަމަށެވެ.

އަދި ތަރައްޤީގެ އިސްކަންދޭ ކަންތައްތައް ކަނޑައެޅިގެންދާނީ ރައްޔިތުންގެ ބޭނުންތަކާއި، އެންމެހާ ފަރާތްތަކުގެ ޢިލްމާއި ހުނަރުގެ މައްޗަށް ބިނާކޮށް ކަމަށްވެސް ވިދާޅުވެފައިވެއެވެ.