ޣައްޒާގެ ގެދޮރު ގެއްލިފައިވާ ކުދިންނަށް "ލިޓްލް ވިންގްސް" މޯބައިލް ސިނަމާ ޚިދުމަތް ފަށައިފި

އިސްތިއުމާރީ އިސްރާއީލުގެ ޢުދުވާނުގައި ސުންނާފަތިވެފައިވާ ޣައްޒާގައި ކުޑަކުދިންނަށް ފަންނުވެރިކަމާއި ކުޅިވަރުގެ ޒަރީޢާއިން ނަފްސާނީ ހިތްހަމަޖެހުން ގެނެސްދިނުމަށް ޚާއްޞަ މޯބައިލް ސިނަމާގެ ޚިދުމަތެއް ފަށައިފިއެވެ.

މި ޚިދުމަތް ކުރިއަށް ގެންދަނީ "މަޝްހަރާވީ ފަންޑް ފޮރ ފިލްމްސް އެންޑް ފިލްމްމޭކާސް" އިން "ލިޓްލް ވިންގްސް" ގެ ނަމުގައި ހިންގާ މަޝްރޫޢެއްގެ ތެރެއިންނެވެ. ހަނގުރާމައިގެ ސަބަބުން ގެދޮރު ގެއްލި ވަގުތީ ފޭލިގެތަކުގައި ދިރިއުޅެމުންދާ ކުދިންނަށް އަމާޒުކޮށްގެން ކާޓޫނު ފިލްމު އެޅުވުމާއި މޫނުގައި ކުލަ ޖެއްސުމާއި ސަގާފީ ކުޅިވަރުތައް ހިމެނޭ ގޮތަށް ތަފާތު ހަރަކާތްތައް ދަނީ ހިންގަމުންނެވެ.

މި ހަރަކާތް ރާވައި ހިންގާ ފަރާތްތަކުން ބުނީ ޒަޔަނިސްޓުން ހިންގާ ލާއިންސާނީ ހަނގުރާމައިގެ ބިރުވެރިކަމުގެ ތެރޭގައި ތިބި ކުދިންގެ ހިތްތަކަށް ކުޑަ ވަގުތުކޮޅަކަށް ނަމަވެސް ލުޔެއް ހޯދައިދިނުމަކީ މި މަސައްކަތުގެ އެންމެ ބޮޑު ބޭނުން ކަމަށެވެ.

އެ ފަރާތްތަކުން ބުނި ގޮތުގައި ނަފްސާނީ ގޮތުންނާއި އިޖުތިމާޢީ ގޮތުން އެ ކުދިންނަށް ބޭނުންވާ އަޅާލުން ފޯރުކޮށްދީ ގެއްލިފައިވާ އުއްމީދު އާލާކޮށްދިނުމަކީ ވެސް މި މަޝްރޫޢުގެ ލަނޑުދަނޑިއެކެވެ.

ކުޅިވަރާއި ފަންނުވެރިކަން މެދުވެރިކޮށް އެ ކުދިންގެ ޝުޢޫރުތައް މިނިވަންކަމާ އެކު ފާޅުކުރެވޭނެ ރައްކާތެރި މާހައުލެއް ބިނާކުރުމާއި ޚިޔާލީ ވިސްނުން ތަރައްޤީކުރުމަށް މަގުފަހިކޮށްދިނުމަކީ ވެސް މި ޕްރޮޖެކްޓުގެ ތެރެއިން ކުރަމުންދާ މުހިންމު މަސައްކަތެއް ކަމަށް އެ ފަރާތްތަކުން ފާހަގަކޮށްފައިވެއެވެ.

ޣައްޒާގައި ކަރަންޓުގެ ޚިދުމަތް މެދުކެނޑިފައިވުން ފަދަ ދަތި ހާލަތްތައް ކުރިމަތިވެފައި ވީ ނަމަވެސް 2026 ވަނަ އަހަރު ނިމުމުގެ ކުރިން ބައި މިލިއަނަށް ވުރެ ގިނަ ކުޑަކުދިންނަށް މި ޚިދުމަތް ވާސިލުކޮށްދިނުމަކީ "ލިޓްލް ވިންގްސް" މަޝްރޫޢުގެ އަމާޒެވެ.