ބްރޯޑްކޮމްގެ ރައީސަކަށް މަރިޔަމް ވަހީދާ، ނައިބަކަށް ގައިސް

ބްރޯޑްކާސްޓިންގ ކޮމިޝަންގެ ރައީސްކަމުގެ މަގާމަށް މަރިޔަމް ވަހީދާާއާއި، ނައިބު ރައީސްކަމުގެ މަގާމަށް އަހުމަދު ގައިސް އައްޔަންކޮށްފިއެވެ.

މި މަގާމަށް މި ފަރާތްތައް އައްޔަންކޮށްފައިވަނީ މިއަދު ކުރިއަށްދިޔަ ކޮމިޝަންގެ ޖަލްސާގައެވެ. މި ޖަލްސާއަކީ ކޮމިޝަނަށް އަލަށް އިންތިޚާބުކުރެވުނު މެންބަރުންކަމަށްވާ މަރިޔަމް ވަހީދާ، އަހުމަދު ގައިސް އަދި އަލީ ޔޫސުފާއި އެކު ބޭއްވުނު ފުރަތަމަ ޖަލްސާއެވެ.

ބްރޯޑްކޮމްގެ ރައީސަށް އިންތިޚާބުކުރެވުނު މަރިޔަމް ވަހީދާ އަކީ މީޑިޔާގެ ދާއިރާގައި ގިނަ ދުވަސްތަކެއް ވަންދެން ހަރަކާތްތެރިވެ ވަޑައިގެން، އެ ދާއިރާއިން ގިނަ ފަރާތްތަކަކަށް ކިޔަވައިދިނުމުގައިވެސް ބައިވެރިވެ ވަޑައިގަންނަވާފައިވާ ފަރާތެކެވެ. އޭނާ އަކީ ސްވިޑެންގެ ފަރާތުން ރާއްޖޭގައި ހުންނަ އޮނަރަރީ ކޮންސިއުލަރވެސް މެއެވެ.

ނަމަވެސް ނައިބަކަށް ހޮވުނު ގައިސްއަކީ މީޑިޔާގެ އެއްވެސް ތަޖުރިބާއެއް ލިބިފައިނެތް ފަރާތެއްކަން ފާހަގަކޮށްލެވެއެވެ.

ގައިސްއަކީ އެމްޑީޕީގެ ޓިކެޓެއްގައި ގދ.އަތޮޅު ކައުންސިލްގައި އިންނެވި ބޭފުޅެކެވެ. އަދި ގައިސް ވަނީ މިއަހަރުގެ ރައްޔިތުންގެ މަޖިލީހުގެ އިންތިޚާބުގެ ތިނަދޫ އުތުރު ދާއިރާގެ ޕްރައިމަރީގައި ވާދަކުރައްވާ ނާކާމިޔާބު ވެވަޑައިގެންފައެވެ. މީގެ އިތުރުން އޭނާއަކީ އެފްއެސްއެމްގެ އެމްޑީ އަދި ކުރީގެ މެންބަރު އަހުމަދު ގަސަމްގެ ކޮއްކޮވެސްމެއެވެ.