ސްކޭމްކުރުމަށް އެންމެފަހުން ފްލޭޝް ކޯލް ބޭނުންކުރަނީ. ސަމާލުވޭ!
ލިޔުންތެރިޔާ
އަބްދުﷲ ހުސައިން
ގޮތްނޭނގޭ ފަރާތްތަކުން އެކި މީހުންގެ އަތުން އޮޅުވާލައިގެން ފައިސާ ހޯދުމުގައި ފްލޭޝް ކޯލްގެ ބޭނުންކުރަމުންދާތީވެ، އެކަމަށް ސަމާލުވުމަށް ފުލުހުން އިލްތިމާސްކޮށްފިއެވެ
ފްލޭޝް ކޯލަކީ ފައިސާގެ މުއާމަލާތްކުރާއިރު ވެރިފައިކުރުމަށް ފޯނަށް ފޮނުވާ އޯޓީޕީ ކޯޑުގެ ބަދަލުގައި ފޯނަށް ފޮނުވާ އޮތަންޓިކޭޝަން ކޯޑު ހިމެނޭ ކޯލެކެވެ. ފްލެޝް ކޯލަކީ އޯޓީޕީ އޮތަންޓިކޭޝަންގެ ބަދަލުގައި ބޭނުންކުރާ އިތުރު އޮތަންޓިކޭޝަން މެތަޑެކެވެ. މި ޓެކްނޮލޮޖީ އުފެއްދި ފަރާތުން ބުނާގޮތުގައި މިއީ އޯޓީޕީއަށްވުރެ ހުރިހާ ގޮތަކުން ވެސް ރަނގަޅު އޮތަންޓިކޭޝަން މެތަޑެކެވެ.
މިކަމާ ގުޅޭގޮތުން ފުލުހުން ބުނީ ޓެކްނޮލޮޖީއަށް އައި ބަދަލާއެކު އެތައް ކުންފުންޏަކުން އޯޓީޕީގެ ބަދަލުގައި ފްލޭޝް ކޯލްސް ބޭނުންކުރަން ފަށާފައިވާއިރު، ސްކޭމަރުން ސްކޭމްކުރަން ގެންގުޅެމުން އައި އުކުޅުތައް ބަދަލުކޮށްފައިވާކަމަށެވެ. އެގޮތުން އެކިއެކި އުކުޅުތައް ބޭނުންކޮށްގެން މަކަރާއި ހީލަތުން ފްލޭޝް ކޯލްގެ ނަންބަރު ސްކޭމަރުން ހޯދައި އެކައުންޓުތައް ހިސޯރުކުރަން ވަނީ ފަށާފައިވާކަމަށް ފުލުހުން ފާހަގަކުރެއެވެ.
ފުލުހުން އެމީހެއްގެ ފޯނަށް ލިބޭ ކޯޑެއް، ގުޅާފައި އޮތް ނަންބަރެއް އަދި މިސްކޯލެއް ލިބިފައި އޮތްނަމަ އެ ނަންބަރެއް ވެސް އެހެން ފަރާތަކާ ހިއްސާނުކުރަން އެދޭކަމަށެވެ.
އޯޓީޕީ ކޯޑު ބޭނުންކޮށްގެން އެކި ފަރާތްތަކުގެ އެކައުންޓު ހެކްކުރަމުންދާ މައްސަލަތަކާ ގުޅިގެން ރައްޔިތުން ހޭލުންތެރިކޮށް، އޯޓީޕީ ކޯޑު އެއްވެސް ފަރާތަކާ ހިއްސާ ނުކުރުމަށް މުއައްސަސާތަކާއި ދައުލަތުގެ އެކި އިދާރާތަކާއި އަމިއްލަ ވިޔަފާރި ކުންފުނިތަކުން ކުރި މަސައްކަތުގެ ނަތީޖާއެއްގެ ގޮތުން މިފަދަ ކަންކަމަށް ރައްޔިތުން ހޭލުންތެރިވެ، އެފަަދަ މައްސަލަތައް ރިޕޯޓުކުރާ އަދަދު ވަނީ އިންތިހާއަށް މަދުވެފައިވާކަމަށް ފުލުހުން ބުނެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
