ދައުލަތަށް ލިބެންޖެހޭ 13 ބިލިއަން ރުފިޔާ ނުހޯދާ ހުރި، އެ ފައިސާ ހޯދުމުގެ މަސައްކަތް ފަށައިފިން: ރައީސް ޑރ.މުޢިއްޒު

އެކި ގޮތްގޮތުން ދައުލަތަށް ލިބެންޖެހޭ 13 ބިލިއަން ރުފިޔާ ނުހޯދާ ހުރިކަމަށާއި، އެ ފައިސާ ހޯދުމުގެ މަސައްކަތް މި ސަރުކާރުން ފަށާފައިވާކަމަށް ރައީސުލްޖުމްހުރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

ރޭގައި ބޭއްވި މިނިވަން ދުވަހުގެ ރަސްމީ ޖަލްސާގައި ވާހަކަފުޅު ދައްކަވަމުން ރައީސް ޑރ.މުޢިއްޒު ވިދާޅުވީ، ދައުލަތަށް ލިބެންޖެހޭ އެތައް ބިލިޔަން ރުފިޔާއެއް ނުހޯދައި ފާއިތުވި ސަރުކާރުތަކުން ދޫކޮށްލާފައިވާކަމަށެވެ.

މިހާތަނަށް ދައުލަތަށް ނުލިބި 13 ބިލިއަން ރުފިޔާ ހުރިކަން ފާހަގަކުރައްވާ ރައީސް ޑރ.މުޢިއްޒު ވަނީ މީގެ ތަފްސީލު ހިއްސާ ކުރައްވާފައެވެ. މިގޮތުން، މި ސަރުކާރު ވެރިކަމާއި ހަވާލުވިއިރު، ބިމުގެ ކުލީގެ ގޮތުގައި ދައުލަތަށް ލިބެންޖެހޭ 513 މިލިޔަން ޑޮލަރާއި،  ޓީޖީއެސްޓީގެ ގޮތުގައި ދައްކަން ޖެހޭ 102 މިލިޔަން ޑޮލަރާއި، ޖީއެސްޓީގެ ގޮތުގައި ލިބެން ޖެހޭ 3.3 ބިލިޔަން ރުފިޔާގެ އިތުރުން ކޯރޕަރޭޓް އިންކަމް ޓެކްސްގެ ގޮތުގައި 1 ބިލިޔަން ރުފިޔާ ނުހޯދާ ހުރި ކަމަށެވެ.

ރައީސް ޑރ.މުޢިއްޒު ވިދާޅުވީ، މި ފައިސާ އެކަނި ހޯދިޔަސް ރާއްޖޭގެ ދަރަނީގެ މައްސަލަ ޙައްލުވާނެ ކަމަށާއި، މިފައިސާ ހޯދާނެ ކަމަށެވެ. އެކަމަށްޓަކައި ކުރަމުންދާ މަސައްކަތުގެ ތެރެއިން ސިޓީ ފޮނުވުމުން ވަރަށް ގިނަ ފަރާތްތަކުން ފައިސާ ދައްކަން ފަށާފައިވާ ކަމަށާއި، ނިމިދިޔަ ހަފްތާ ތެރޭގައިވެސް މީގެ ތެރެއިން އެއްބައި ފައިސާ ދައްކާފައިވާ ކަމަށް އެމަނިކުފާނު ވިދާޅުވިއެވެ.

"މި ފައިސާ އެކަނި ހޯދިޔަސް އަޅުގަނޑުމެންގެ ދަރަނީގެ މައްސަލަ ޙައްލުވީ. އެ މަސައްކަތް ކުރާނަން. އިރާދަކުރެއްވިއްޔާ އެފައިސާ ހޯދާނަން. މިހާރު މަސައްކަތް ފަށައިފިން. ވަރަށް ގިނަ ފަރާތްތަކުން ފައިސާ ދައްކަންވެސް ފަށައިފި. ސިޓީ ފޮނުވާލީމަ ފައިސާ ދައްކަން ފަށައިފި. ކަމަކާ އުޅުނީމަ ދެއްތޯ ފައިސާ ދޭނީ ވެސް. ފައިސާ ހޯދަން އުޅުނީމަ. ސިޓީ ފޮނުވީމަ މިހާރުވެސް، މިދިޔަ ހަފްތާ ތެރޭގައިވެސް މީގެ ތެރެއިން އެއްބައި ފައިސާ ދައްކައިފި."

ރައީސް ޑރ.މުޢިއްޒު ވިދާޅުވިއެވެ.

ރައީސް ޑރ.މުޢިއްޒު ވިދާޅުވީ، މިފައިސާ ހޯދުމަށް ކޯޓަށް ދާންޖެހޭނަމަ އެކަން ވެސް ކުރައްވާނެ ކަމަށާއި، އެހެންނަމަވެސް، އެހާ ހިސާބަށް ނުގޮސްވެސް މި އަދަދުގެ ދެބައިކުޅަ އެއްބައި ހޯދޭނެކަމުގެ ޔަޤީންކަން އެބައޮތްކަމަށެވެ.

މީގެ އިތުރުންވެސް ރައީސް ޑރ.މުޢިއްޒު ވިދާޅުވީ، އެމްއެމްޕީއާރުސީއާއި އެހެނިހެން ވައްކަންތަކުން ދައުލަތަށް ލިބެން ޖެހޭ ފައިސާ ވެސް ހޯދާނެ ކަމަށާއި، އެކަން ކުރުމަށް ބިރު ނުގަންނާނެ ކަމަށެވެ.

"ގައިމު އަޅުގަނޑެއް ނޯންނާނެ އެކަމުގައި އެންމެ ލޯލާރިއެއްވެސް އެއިން އެއްވެސް ބޭފުޅެއްގެ އަތުން އެއްވެސް ކަމެއްގައި ދުވަހަކުވެސް ހޯދާފައި. އެހެންވީމަ އަޅުގަނޑު ބިރުގަންނަން ޖެހޭ ކަމެއް ނެތެއްނޫންތޯ."

ރައީސް ޑރ.މުޢިއްޒު ވިދާޅުވިއެވެ.

ދައުލަތަށް ލިބެންޖެހޭ ފައިސާ ހޯދުމަށްޓަކައި އެސެޓް ރިކަވަރީ ގާނޫނެއް ތައާރަފް ކުރާނެ ކަމަށާއި، ކޮރަޕްޝަން ނައްތާލުމަކީ ރާއްޖޭގެ އިޤްތިޞާދު ހަރުދަނާކޮށް، ހެޔޮ ވެރިކަމުގެ ނިޒާމެއް ރާއްޖޭގައި ޤާއިމުކުރުމަށްޓަކާ މުހިންމުކަމެއްކަމަށްވެސް ރައީސް ޑރ.މުޢިއްޒު ވަނީ ވިދާޅުވެފައެވެ.