މިއަދުން ފެށިގެން 4 ފުރޮޅުލީ އުޅަނދުފަހު އެތެރެކުރެވޭނީ ހާއްސަ ހުއްދައެއް ނަގައިގެން

މިއަދުން ފެށިގެން 4 ފުރޮޅުލީ އުޅަނދުފަހު އެތެރެކުރަން ބޭނުންނަމަ ހާއްސަ ހުއްދައެއް ނަގަންޖެހޭނެކަމަށް ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން ބުނެފި އެވެ.

މި މަހުގެ 7 ވަނަ ދުވަހު އެ ވުޒާރާއިން ނެރުނު ބަޔާނެއްގައި ބުނެފައިވާ ގޮތުގައި، ދެ ފުރޮޅުލީ އެއްގަމު އުޅަނދުފަހަރު ފިޔަވައި އެހެން ހުރިހާ އުޅަނދެއް މިއަދުން ފެށިގެން ރާއްޖެއަށް ދެން އެތެރެކުރެވޭނީ އެއްގަމު އުޅަނދުފަހަރު ރާއްޖެއަށް އެތެރެކުރުމުގެ ހާއްސަ ހުއްދައެއް ނެގުމަށްފަހުގައި ކަމަށެވެ.

މި ގެނެވުނު ބަދަލުގެ ސަބަބުން 4 ފުރޮޅުލީ އުޅަނދެއް ގެނައުމުގެ ހުއްދައަށް އެދި ހުށަހަޅާއިރު، ގަރާޖެއްގައި އެ އުޅަނދު ބޭއްވުމާމެދު ގަރާޖުގެ ވެރިފަރާތުގެ އިއުތިރާސެއް ނެތްކަމުގެ ލިޔުމާއި، ގަރާޖުގެ ވެރިފަރާތުގެ އައިޑީކާޑުގެ ކޮޕީއަކާއި، އެ އުޅަނދު ބައްވާ ގަރާޖަކީ ރަޖިސްޓްރީކޮށްފައިވާ ގަރާޖެއްކަން އެނގޭނޭ ލިޔުމެއް ހުށަހަޅަންޖެހެއެވެ. މި ގެނެވުނު ބަދަލާއިއެކު އުޅަނދުތައް ބާއްވާނެ ޖާގައިތުރުވެގެން ދާނެކަމަށް އެ ވުޒާރާއިން ބުނެއެވެ.

މިއަދުން ފެށިގެން އުޅަނދެއް ރަޖިސްޓްރީކޮށްދޭނީ، މިނިސްޓްރީން ރަޖިސްޓަރީ ކުރެވޭނެ ކަމަށް ކަނޑައަޅާފައިވާ އުމުރަށްފެތޭ އުޅަނދެއްކަން އަންގައިދޭ ލިޔެކިޔުންތަށް ހުށަހެޅުމުންނެވެ.

މި ހުއްދަ ނަގަން ބޭނުންވާ ފަރާތްތަކުން، "eportal.mta.gov.mv" މެދުވެރިކޮށް ލިޔެކިޔުންތައް މިހާރު ހުށައެޅޭނެކަމަށް އެ ވުޒާރާއިން ވަނީ ބުނެފަ އެވެ.