އިސްލާމްދީނަށް ކުރާ ފުރައްސާރައަކީ އޮޅިގެން ކުރެވުނު ކަމެއް ނޫން، އެމްޑީއެންގެ އިސްފަރާތްތައް ހައްޔަރުކުރޭ: އިސްލާމީ މަރުކަޒް އިމާމް
މޯލްޑިވިއަން ޑިމޮކްރަސީ ނެޓްވޯކްގެ އިސްފަރާތްތައް ހިފާ ހައްޔަރުކުރުމަށް ރާއްޖޭގެ މައި މިސްކިތް މަސްޖިދުއްސުލްޠާން މުޙައްމަދު ތަކުރުފާނުލްއަޢުޡަމުގެ އިމާމް އައްޝައިޚް އިބްރާހީމް ރަޝީދު ޙަސަން ގޮވާލައްވައިފިއެވެ.
އިބްރާހިމް ރަޝީދު މިކަމަށް ގޮވާލައްވާފައިވަނީ މޯލްޑިވިއަން ޑިމޮކްރަސީ ނެޓްވޯކް ޖަމިއްޔާއިން ތައްޔާރު ކުރި ރިޕޯޓެއްގައި ޤުރުއާނަށާއި ކީރިތި ރަސޫލާ (ސ.އ.ވ) އަށް ބަދުބަސް ރައްދުވާ ގޮތަށް ލިޔެފައިވާ މައްސަލަ ބޮޑުވެފައިވަނިކޮށެވެ.
އިބްރާހިމް ރަޝީދު މިކަމަށް ގޮވާލައްވާފައިވަނީ އޭނާ މިރޭ ފޭސްބުކްގައި ލިޔުއްވި ސްޓޭޓަސްއެއްގައެވެ.
އިބްރާހިމް ރަޝީދު ވިދާޅުވިގޮތުގައި އެމްޑީއެމްއަކީ ރާއްޖޭގައި އުފެދުނު ފުރަތަމަ ލާދީނީ ޖަމާއަތްކަމަށާއި، މި ޖަމާއަތުގެ އިސްފަރާތްތައް ހައްޔަރުކުރުމަށް ގޮވާލާކަމަށެވެ.
"އެމީހުން (އެމްޑީއެން) އިސްލާމްދީނަށް ކުރާ ފުރައްސާރަ އަކީ އޮޅިގެން ކުރެވުނު ކަމެއްނޫން. އެއީ ދިވެހި ފަސްގަނޑުން އިސްލާމް ދީން ފޮހެލުމަށްޓަކައި ލާދީނީ ބަޔަކު އަޑީގައި ތިބެގެން ހިންގާ ބޮޑު ޖަރީމާއެއް" އިބްރާހިމް ރަޝީދު ވިދާޅުވެފައިވެއެވެ.
މިހާރުގެ ޕޮލިސް ކޮމިޝަނަރ ބޯޑް މެންބަރުކަން ކުރައްވާފައިވާ މި ޖަމިއްޔާއަކީ އިންސާނީ ހައްޤާއި ޑިމޮކްރަސީ ހިމާޔަތްކުރުމަށް ރާއްޖޭގައި ރަޖިސްޓްރީ ކުރެވި ހިންގަމުން އަންނަ ޖަމިއްޔާއެކެވެ.
މިމައްސަލާގައި ފިޔަވަޅު އެޅުމަށް އިސްލާމިކް މިނިސްޓްރީން ވަނީ ފުލުހަށް މައްސަލަ ހުށަހަޅާފައިކަމަށް އެ މިނިސްޓްރީން މިއަދު ވޮއިސްއަށް ވަނީ މައުލޫމާތު ދެއްވާފައެވެ. ނަމަވެސް މިހާތަނަށް އެމްޑީއެންގެ އިސްފަރާތެއް ފުލުހަށް ހާޒިރުކުރެވިފައި ނުވާކަމަށް ފުލުހުން މައުލޫމާތު ދެއްވައެވެ.
އިބްރާހިމް ރަޝީދަކީ މި ސަރުކާރުން އިސްލާމީ މަރުކަޒުގެ އިމާމް ކަމަށް ކަނޑައަޅުއްވާފައިވާ ބޭފުޅެކެވެ.
އެމްޑީއެންގެ ރިޕޯޓުގައި އިސްލާމީ ހުދޫދު ތަކަކީ އަނިޔާގެ ގޮތުގައި ސިފަކޮށްފައިވާއިރު އިސްރާ އާއި މިޢުރާޖަށް ކީރިތި ރަސޫލާ އަރާވަޑައިގެންނެވުމަކީ "ޚިޔާލީ ވާހަކައެއް"ގެ ގޮތުގައި ވަނީ ސިފަކޮށްފައެވެ. މީގެ އިތުރުން ވެސް ކީރިތި ޤުރުއާނުގެ ސަބަބުން ގެވެށި އަނިޔާ އިތުރުވާ ކަމަށް ދޭހަވާ ގޮތަށް ވެސް އެ ރިޕޯޓުގައި ލިޔެފައިވާކަން ފާހަގަކުރެވެއެވެ.
މިއާއެކު އެމްޑީއެންގެ އިސްވެރިނަށް ގިނަ އަދަދެއްގެ ޢާންމުންނާއި، ދީނީ އިލްމުވެރިން އަދި ސިޔާސީ ފަރާތްތަކުން ފާޑުކިޔުން އަމާޒްވުމާއެކު ފުލުހުން ވަނީ އެމްޑީއެންގެ އިސްވެރިންގެ ފޮޓޯ ޢާންމު ކުރާ މައްސަލަ ބަލަމުން އަންކަމަށް ފުލުހުން ހާމަކުރައްވާފައެވެ. ނަމަވެސް އެމްޑީއެމްގެ ރިޕޯޓުގައި ހިމެނިފައިވާ ނަފުރަތު އުފެދޭ ވާހަކަތައް ފުލުހުންގެ ސަމާލުކަމަށް އައިސްފައިނުވާކަމަށް ފުލުހުން މީޑިއާތަކަށް މައުލޫމާތު ދެމުން ވަނީ ވިދާޅުވެފައެވެ.
ރާއްޖޭގައި ޣައިރު މުސްލިމުންނަށް އަޅުކަން ކުރެވޭ ގޮތަށް ތަންތަން ހަދަން ޖެހޭ ކަމަށް ވަކާލާތުކޮށް ވެސް އެމްޑީއެންގެ ރިޕޯޓުގައި ލިޔެފައިވާއިރު އެކަމާއި ދެކޮޅަށް ބައެއް ދީނީ އިލްމުވެރިން ވެސް ވަނީ ވާހަކަ ދައްކަވާފައެވެ.
އެމްޑީއެންގެ ރިޕޯޓެއްގައި ދީނަށް ފުރައްސާރަކޮށް ލިޔެފައި ވީ ނަމަވެސް ދާދި ފަހުން ރައީސް އޮފީހަށް ކައުންޓާ ޓެރަރިޒަމް ކޮންސަލްޓަންޓެއްގެ ގޮތުގައި އެމްޑީއެންގެ ޗެއާޕާސަން ނޫޝިން ވަހީދު ވަނީ އައްޔަން ކޮށްފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
