ކުރިއަށް އޮތް ތަނުގައި ހިލޭ ބަންޑާރަ ގޯތި ދޭން ދަތިވާނެ؛ މަޖިލީހުން ހައްލެއް ހޯދުން މުހިންމު: މުއްޠަލިބު

ދާއިމީ ގޮތެއްގައި ހިލޭ ބަންޑާރަ ގޯތި ދޫކުރުމަކީ ދަތި ކަމެއް ކަމުގައި ގެދޮރުވެރިކަމާ ޢިމާރާތް ކުރުމާ ބެހޭ ވަޒީރު ޑރ. ޢަބްދުالله މުއްޠަލިބު ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި، ތުލުސްދޫ ދާއިރާގެ ޕީއެންސީ މެމްބަރު އިބްރާހިމް ނަސީމް ވަނީ ބަންޑާރަގޯތި ހިލޭ ބެހުމާއި ގުޅޭގޮތުން ވަޒީރާ ސުވާލު ކުރައްވާފައެވެ.

އެގޮތުން، މެންބަރު ނަސީމް ވަނީ، ބަންޑާރަ ގޯތި ހިލޭ ބެހުމަކީ ރާއްޖެ ފިޔަވައި ދުނިޔޭގެ އެއްވެސް ތާކު ކުރާ ކަމެެއް ނޫން ކަމަށާ، އޭގެ ސަބަބުން ބޯހިޔާވަހިކަމަށް ދާއިމީ ހައްލެއް ނުލިބޭކަން ފާހަގަކުރައްވައި އޭގެ ބަދަލުގައި، ދިގު މުއްދަތުން ފައިސާ ދޫކުރާ ގޮތަށް ހައުސިން ޔުނިޓުތަކުން ފްލެޓު ދޭ ގޮތަށް އޫސޫލު ބަދަލުކުރަންޖެހޭ ކަމަށް ވިދާޅުވެފައެވެ. އަދި އެފަދަ ވިސްނުމެއް ސަރުކާރުގެ އޮތްތޯ ސުވާލުކުރެއްވިއެވެ.

އެ ސުވާލަށް ޖަވާބު ދެއްވަމުން މުއްޠަލިބު ވިދާޅުވީ ބަންޑާރަ ގޯތި ދޫކުރުމަކީ ރާއްޖޭގެ އާދަކާދަ އާއި ތާރީހާ ގުޅިފައިވާ ރާއްޖެއަށް ހާއްސަ ސިފައެއް ކަމަށެވެ.

"އެހެންވީމާ މިފަދަ ކަލްޗަރަލީ ވެސް ހިސްޓޮރިކަލީ ވެސް ރާއްޖެއަށް މުހިންމު ކަމެއްގެ ގޮތުގައި ފާހަގަކުރެވިފައި އޮތް ކަމެއް ބަދަލު ކުރުމަކީ އެ ސިޔާސަތު ބަދަލު ކުރުމަކީ އަޅުގަނޑަށް އެކަނި ލިބިގެންވާ ބާރެއް ނޫން. އެހެންވީމާ ބަންޑާރަ ގޯތި (މައްސަލަ) ތިބޭފުޅުން ގާނޫނެއް ގެނެސްގެން މަޖިލީހުން އެކަމަށް ހައްލެއް ހޯދައި ދިނުމަކީ އަޅުގަނޑު އެދޭ ކަމެއް. އެހެންނަމަވެސް ކުރިއަށްދާއިރުގައި ދާއިމީ ގޮތެއްގައި ކުރިއަށް ދިއުމަކީ ދަތިކަމަކަށް ވެދާނެ. އެހެންވީމާ އެކަމަށް ހައްލެއް ހޯދުމަށް މަޖިލިސް ތެރެއިން، ގާނޫނެއްގެ ތެރެއިން އެ ހައްލު ހޯދައިދިނުމަކީ ވަރަށް މުހިންމު ކަމެއް ކަމަށް އަޅުގަނޑު ދެކެން،"

ވަޒީރު އަބްދުالله މުއްޠަލިބު

މިދިޔަ ސަރުކާރުގެ ހައުސިންގ މިނިސްޓަރ މުހައްމަދު އަސްލަމްވެސް މަޖިލީހުގެ ޖަލްސާއެއްގައި ވާހަކަދައްކަވަމުން ވަނީ، ހިލޭ ބަންޑާރަ ގޯތި ދޫކުރުމަކީ ރަނގަޅު އުސޫލެއްކަމަށް  ޤަބޫލުފުޅު ނުކުރައްވާކަމަށް ވިދާޅުވެފައެވެ.

އެހެން ނަމަވެސް ބަންޑާރަ ގޯތި ދޫކުރުމުގެ އުސޫލަކީ ބޯދާ ޒަމާނުއްސުރެ ރާއްޖޭގައި އޮންނަ އުސޫލެއް ކަމަށާއި، އެންމެ މީހެއްގެ ވިސްނުމަށް އެ އުސޫލު ބަދަލުކުރެވޭނެކަމަށް ދެކިވަޑައިނުގަންނަވާކަމަށް އަސްލަމް ވިދާޅުވި އެވެ.

އޭގެ އިތުރުން މިނިސްޓަރު ވިދާޅުވީ ގޯތި ދޫކުރުމާއި ގުޅޭގޮތުން މިހާރަށްވުރެ ފުޅާކޮށް މަޝްވަރާކުރެވި، އެންމެންނަށް ގަބޫލުކުރެވޭ ކަމަކަށް ވެގެން ނޫނީ އެ އުސޫލު ބަދަލު ނުކުރެވޭނެކަމަށްވެސް އޭނާ ވިދާޅުވިއެވެ.

"އަޅުގަނޑު ތަކުރާރުކޮށް ދަންނަވާނަން، މީ އަޅުގަނޑުމެން ވިސްނާފަކުރަން، އެއީ ސަސްޓެއިނަބަލް ގޮތުގައި ކުރެވޭނެކަމެއް ކަމަކަށް އަޅުގަނޑަކަށް ނުފެނޭ ދުރުމުސްތަގުބަލަށް ބަލާއިރު، އެހެންވީމަ އަބަދަކު އެހެން ބަންޑާރައިން ގޯއްޗެއް ނުވެސް ދެވޭނެ، ކިހެނެއްތޯ އަޅުގަނޑުމެން އެކަން ބަދަލުކުރާނީ؟ އެއީ ދައްކަން ޖެހޭ ވާހަކައެއްކަމަށް މިއަދުވެސް އަޅުގަނޑު ޤަބޫލުކުރަނީ" އަސްލަމް ވިދާޅުވިއެވެ.