ބިދޭސީ މަސައްކަތްތެރީން ގެނައުމުގައި ވަޒީރުން ގަވައިދާ ޚިލާފުވާކަމަށް ބުނެ ހަދަނީ ދޮގު: އަބްދުލް ޣަނީ

ދިވެހިރާއްޖެއަށް ބޭރުގެ މަސައްކަތްތެރީން ގެނައުމުގައި ވަޒީރުން ގަވާއިދާ ޚިލާފުވާކަމަށްބުނެ ހަދަނީ ދޮގު ކަމުގައި ކުރެންދޫ ދާއިރާގެ މެމްބަރު ޢަބްދުލް ޣަނީ ޢަބްދުލް ޙަކީމް ވިދާޅުވެއްޖެއެވެ.

އަބްދުލް ޣަނީ މިހެން ވިދާޅުވީ މިއަދު ބޭއްވި ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރުގެ ތިންވަނަ ޖަލްސާގައި، ތުޅާދޫ ދާއިރާގެ މެމްބަރު ހިސާން ހުސައިން، ދައުލަތުގެ ހުރިހާ މުއައްސަސާތަކުން ނުވަތަ ދައުލަތުގެ ތިން ބާރުން، ހެދިފައިވާ ޤާނޫނުތަކާ އެއްގޮތަށް މަސައްކަތް ކުރުމަށް ގޮވާލާއި ހުށަހެޅުނު ކުއްލި މައްސަލައަށް ބަހުސް ކުރައްވަމުންނެވެ.

ހިސާން ހުށަހެޅުއްވި ކުއްލި މައްސަލާގައި ބުނީ، ވަޒީފާއާއި ބެހޭ ގާނޫނުގެ 65 ވަނަ މާއްދާގެ (ހ) ގައި ބިދޭސީން ވަޒީފާ އަދާކުރުމަށް ދިވެހިރާއްޖެއަށް ގެނައުމަށް ކޯޓާ ދޫކުރުމާއި، ދިވެހިރާއްޖޭގައި ބިދޭސީން ވަޒީފާ އަދާކުރުމަށް ހުއްދަ ދިނުމާއި ވަޒީފާ އަދާކުރާ މުއްދަތަށް ރާއްޖޭގައި ހުރުމުގެ ހުއްދަ ނުވަތަ ވާކް ޕާމިޓް ދިނުމުގެ އިހުތިޔާރު ގާނޫނުގެ ދަށުން ހޯމް މިނިސްޓްރީއަށް އޮތް ނަމަވެސް އެކަމާއި ގުޅިގެން ގަވައިދު ހަދައި ހިންގުން ހަޔާރ އެޑިއުކޭޝަނަށް ދޭ ގޮތަށް ނިންމާފައިވާކަމަށެވެ.

ހިސާން ވިދާޅުވީ ރާއްޖެއަށް އެއް ގައުމަކުން އެންމެ ގިނަ މަސައްކަތްތެރިން ގެނެވޭނެ އަދަދަނީ 100،000 ކަމަށް ގާނޫނުގައި ބުނާކަމަށެވެ. އެހެން ނަމަވެސް ވަޒީފާއާއި ބެހޭ ގާނޫނުގެ 65 ވަނަ މާއްދާގެ (ހ) އާއި ހިލާފަށް ޑިސެމްބަރު 17، 2023 ގައި ރާއްޖެއަށް އަން ސްކިލްޑް ލޭބަރުންގެ ގޮތުގައި ބަންގްލަދޭޝްގެ މީހުން ގެނެވޭނެކަމަށް ހޯމް މިނިސްޓަރު އިހުސާން އިއުލާނުކޮށްފައިވާކަމަށެވެ.

އަދި މިވަގުތު 139،220 ބަންގްލަދޭޝްގެ މަސައްކަތްތެރިން އެބަތިބިކަމަށާ މިއީ ރަސްމީ އަދަދަށްވާއިރު އެއަށް ވުރެ ގިނައިން ރާއްޖޭގައި އެ ގައުމުގެ މަސައްކަތްތެރިންގެ ފުރުސަތު އޮތުމުން ގާނޫނާ ޚިލާފްވާ ކަމަށް ހިސާން ވިދާޅުވި އެވެ.

އެ މައްސަލަ އަށް ބަހުސް ކުރައްވަމުން، ދާދިފަހުން އެމްޑީޕީ ދޫކުރައްވައި ސަރުކާރު ހިންގާ ޕީއެންސީ އާއި ގުޅިވަޑައިގެންނެވި އަބްދުލް ޣަނީ ވިދާޅުވީ، މިވަގުތު ރާއްޖޭގައި މަސައްކަތް ކުރާ ބަންގްލަދޭޝްގެ މީހުންގެ އަދަދަކީ ނުވަދިހަ އެއް ހާސް ކަމަށެވެ.

"ހުށައެޅިފައިވާ މައްސަލައަށް ބަލާއިރު 65ވަނަ މާއްދާގެ (ހ) ގައި ބުނަނީ ސަތޭކަ ހާސް ކަމަށް. އެހެންނަމަވެސް މި ވަގުތު ބަންގްލަދޭޝްގެ ރާއްޖޭގައި ތިބި މީހުންގެ އަދަދަކީ ނުވަދިހަ އެއް ހާސް. ސަތޭކަ ތިރީސް ހާސް ކަމަށް އެބުނަނީ އެކްޓިވްކޮށް ރާއްޖޭން ބޭރަށް ގޮސްފައިވާ މީހުންނާއި، އޮފިޝަލީ ތިބީ ނުވަދިހަ އެއްހާސް ކަމަށް މިހާރު ތަފާސްހިސާބުން ދައްކަނީ." އަބްދުލް ޣަނީ ވިދާޅުވިއެވެ.

މިއާއެކު އަބްދުލް ޣަނީ ވިދާޅުވީ ގާނޫނު އަސާސީގެ 96 ވަނަ މާއްދާއާއި 97 ވަނަ މާއްދާގައި ޤާނޫނީ ގޮތުން ބިދޭސީންގެ ކަންކަން ބެލެހެއްޓުމުގެ މެންޑޭޓް ދެ މިނިސްޓްރީއަކަށް ނުދެވޭނެ ވާހަކަ ނެތް ކަމަށެވެ.

"އޭގައި އެއްގޮތަކަށްވެސް ޤާނޫނުގައި ނުބުނޭ ދެ މިނިސްޓްރީއަކުންނެއް މެންޑޭޓް ނުބެލެހެއްޓޭނެ ކަމަކަށް. އެހެންވީމާ ޤާނޫނާ ޚިލާފަށް އޮތް ކަމެއްކަމަށް ވިދާޅުވަމުން ދިއުމަކީ އެއީ ހަމަ ސީދާ ހެދޭ ދޮގެއް ކަމަށް އަޅުގަނޑަށް ޤަބޫލު ކުރެވެނީ."

ޢަބްދުލް ޣަނީ ޢަބްދުލް ޙަކީމް

މީގެ އިތުރުންވެސް ބައެއް ހާލަތްތަކުގައި ވަޤުތީގޮތުން އެއް މިނިސްޓްރީއަކު ދެއެއް، ނުވަތަ ތިން މިނިސްޓްރީ ވެސް ހިންގަންޖެހޭ ހާލަތްތަކުގެ ތެރޭގައި، މިނިސްޓަރަކު އާލާސްކަންފުޅާ ވަޑައިގަތުން، ނުވަތަ ރާއްޖޭން ބޭރަށް ވަޑައިގަތުންވެސް ހިމެނޭކަމަށް އަބްދުލް ޣަނީ ވިދާޅުވިއެވެ. އަދި އެއީ ވެސް ޤާނޫނާއި ޤަވާޢިދާ ޚިލަާފު ވާކަމެއްކަމަށް ބަލައިނުގަނެވޭކަމަށްވެސް ވިދާޅުވިއެވެ.