އަލްހާނުގެ ކުންފުނިން މީހުންނަށް ބަދަލުދިނުމުން ދައުވާ ކުރިޔަށް ނުގެންދަން ނިންމައިފި

ކުރީގެ މަޖިލިސް މެންބަރު އަލްހާނު ފަހުމީގެ ކިންގްސް ކެޕިޓަލް ހޯލްޑިންގްސް ޕްރައިވެޓް ލިމިޓެޑުން ގިނަ ބައެއްގެ އަތުން ފައިސާ އަތުލައި ހިންގި ސްކީމާއި ގުޅިގެން ގެއްލުނު ލިބުނު ފަރާތްތަކަށް ބަދަލުދިނުމުން, އެ މައްސަލައިގެ ދައުވާ ކުރިޔަށް ނުގެންދިޔުމަށް ޕްރޮސެކިއުޓާ ޖެނެރަލް (ޕީޖީ) އޮފީހުން ނިންމައިފިއެވެ.

މި މައްސަލައަކީ އެކި މީހުންގެ އަތުން ފައިސާނަގައި، އެ ފައިސާއަށް ފައިދާ އިތުރުކޮށްގެން ބަދަލުދިނުމުގެ ނަމުގައި މެންބަރު އަލްހާން އަދި އޭނާގެ ކޮއްކޮ ޝަޒްބާން ފަހުމީ އާއި ޝަހުބާން ފައުމީ ގުޅިގެން ހިންގި ކުންފުނިން އިންވެސްޓްމެންޓް ސްކީމެއް ތަޢާރަފްކޮށް، އޭގެން ލިބުނު ފައިސާ ލޯންޑާކުރިކަމަށް ބުނާ މައްސަލައެކެވެ.

މި މައްސަލައިގައި ގެއްލުންވެގެން ބަދަލު ހޯދުމަށް 13 ފަރާތަކުން މައްސަލަ ހުށަހެޅިއިރު، އެ ފަރާތްތަކަށް ބަދަލުދީ ޚަލާސްކޮށްފައިވާ ކަމަށް ޕީޖީ އޮފީހުން މިއަދު ވަނީ ބުނެފައެވެ. އަދި އެކަމާއި ގުޅިގެން ފުލުހުން މެދުވެރިކޮށް މައުލޫމާތު ސާފުކުރިއިރު އެ ފަރާތްތަކަށް ބަދަލުދެވިފައިވާކަން ކަށަވަރުކުރެވިފައިވާ ކަމަށާއި، އެ މައްސަލަ އިތުރަށް ކުރިޔަށް ގެންދަން ބޭނުންނުވާ ކަމަށް އެ ފަރާތްތަކުން ބުނެފައިވާ ކަމަށް ވެސް ޕީޖީން މިއަދު ވަނީ ބުނެފައެވެ.

އެހެންކަމުން އެ މައްސަލައިގައި ގެއްލުން ލިބުނު މީހުންގެ ތެރެއިން ޖިނާއީ ޢަދުލުގެ ނިޒާމުގެ ތެރެއިން ބަދަލު ނަގައިދޭން އެދުނު އެންމެންނަށް، ލިބެންޖެހޭ ފައިސާ އަނބުރާ ލިބިފައިވާތީ އާއި އެ މައްސަލަ އިތުރަށް ކުރިއަށްގެންދަން ބޭނުންނުވާކަމަށް އެ ފަރާތްތަކުން ބުނެފައިވުމުން، އެ މައްސަލައިގައި ކޯޓަށް ހުށަހެޅި ޓެކުމުގެ ކުށުގެ 13 ދަޢުވާ އިތުރަށް ކުރިޔަށް ގެންދިޔުމުގެ މަސްލަހަތު ނުފެންނަ ކަމަށް އެ އޮފީހުން ބުންޏެވެ.

އެހެން ނަމަވެސް އެ މައްސަލައިގައި ބަދަލު ލިބެންޖެހޭ އިތުރު ފަރާތްތަކުގެ މައްސަލަ ފުލުހުން ތަހުގީގުކުރަމުންދާ ކަމަށާއި، އެ ތަހުގީގުތައް ނިމި ޕީޖީއަށް ހުށަހެޅުމުން އެ މައްސަލަތަކުގެ ދައުވާތައް ކުރިޔަށް ގެންދާނެ ކަމަށް ވެސް ޕީޖީން ބުންޏެވެ.

"އެހެންކަމުން، މި މައްސަލާގައި ބަދަލުލިބެންޖެހޭ މީހުންގެ ތެރެއިން ފައިސާ އަނބުރާ ނުލިބިވާ މީހުންނަށް ޖިނާއީ ޢަދުލުގެ ނިޒާމުގެ ތެރެއިން ބަދަލު ހޯދައިދިނުމުގެ މަސައްކަތް ކެނޑިނޭޅި އެބަ ކުރިއަށްގެންދަމެވެ،" ޕީޖީން ބުންޏެވެ.

އަލްހާނުގެ ތިން ބެއިންގެ މައްޗަށް މި ދައުވާތައް އުފުލީ 2021 އަދި 2022 ވަނަ އަހަރުގެ ތެރޭގައި ކިންގްސް ކެޕިޓަލް ހޯލްޑިންގްސް ޕްރައިވެޓް ލިމިޓެޑުން އާންމުންނަށް ހުޅުވާލައިގެން ކުރިޔަށްގެންދިޔަ އިންވެސްޓްމެންޓް ސްކީމުގެ ތެރެއިން އެކި މީހުން އިންވެސްޓްކުރި ފައިސާއަށް ވާ ބަދަލު، އެ މީހުންނަށް ދީފައިނުވުމުންނެވެ.

އެގޮތުން އެ މައްސަލައިގައި އަލްހާން އޭރު ބުނި ގޮތުގައި އެ ފައިސާ ނުދެވުނީ، އޭނާގެ ކިންގްސް ކެޕިޓަލް ހޯލްޑިންގްސް ޕްރައިވެޓް ލިމިޓެޑުން ހިންގި މުއާމަލާތްތަކަކީ ޤާނޫނާއި ޚިލާފު މުއާމަލާތްތަކެއް ކަމުގައި އެމްއެމްއޭއިން ބުނެ، އޭނާގެ ކުންފުނީގެ ބޭންކް އެކައުންޓްތައް މަރުކަޒީ ބޭންކުން ފްރީޒްކުރުމުންނެވެ.

އެގޮތުން އޭރު ވެސް އެ ސްކީމަށް އެކި މީހުން 98 މިލިއަނަށް ވުރެ ގިނަ ދިވެހި ރުފިޔާ އިންވެސްޓްކޮށްފައިވާ ކަމަށް ޕީޖީން މީގެ ކުރިން ބުނެފައިވެއެވެ.