އުމުރުން ދުވަސްވީ މީހުންގެ އަތުން ފޭރުން އިތުރުވެއްޖެކަމަށް ފުލުހުން ބުނެފި
ލިޔުންތެރިޔާ
އަބްދުﷲ ހުސައިން
އުމުރުން ދުވަސްވީ މީހުންގެ އަތުން ފޭރުމުގެ މައްސަލަ އިތުރުވެފައިވާކަމަށް މޯލްޑިވްސް ޕޮލިސް ސާވިސްއިން ބުނެފިއެވެ.
މޯލްޑިވްސް ޕޮލިސް ސާވިސްއިން ބުނީ، އުމުރުން ދުވަސްވީ މީހުންނަށް އަމާޒުކޮށްގެން ހިންގޭ މަކަރާއި ހީލަތުގެ އަމަލުތައް އިތުރުވަމުންދާކަން ފުލުހުންނަށް ފާހަގަކުރެވިފައިވާކަމަށެވެ. މިގޮތުން އުމުރުން ދުވަސްވީ މީހުންގެ އަތުން ފޭރުމުގެ މައްސަލަތަށް ހުށަހަޅާ އަދަދު އިތުރުވަމުންދާކަމަށް ފުލުހުން ބުންޏެވެ.
މިކަންތައް ކުރަނީ ކިހިނެތް:
ފުލުހުން ބުނީ އުމުރުން ދުވަސްވީ މީހުންގެ އަތުން ފޭރޭކަން ފާހަގަކުރެވިފައިވަނީ، އެފަދަ މީހަކާ ދިމާވުމުން، ދަންނަ މީހެއްގެ ގޮތުގައި ތައާރަފުވެ، ދުވަސްވީ މީހުންގެ އިތުބާރު ހޯދުމަށްފަހު އެކި ތަންތަނަށް ގެންގޮސްގެންކަމަށެވެ.
މިފަދަ އަމަލުތަކާއި މިފަދަ ކުށްތަކަށް އަރާގަންނަ ފަރާތްތަކާމެދު ސަމާލުވުމަށް، އާންމު ރައްޔިތުންނަށް، ހާއްސަކޮށް އުމުރުން ދުވަސްވީ މީހުންނަށާއި އެ މީހުންގެ އާއިލާތަކަށް، ފުލުހުން ވަނީ އިލްތިމާސްކޮށްފައެވެ.
މިފަދަ ކަމެއް ދިމާވެއްޖެ ނަމަ ނުވަތަ އެފަދަ ކަމަކަށް ތުހުމަތު ކުރެވިއްޖެނަމަ ދިވެހި ފުލުހުންގެ ޚިދުމަތުގެ ހޮޓްލައިން ނަންބަރު 3322111 އަށް ނުވަތަ އިމަޖެންސީ ނަންބަރު 119 އަށް ގުޅުއްވައި ރިޕޯޓްކުރުމަށް އެދޭކަމަށްވެސް ފުލުހުން ބުނެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
