ފީފާ ވޯލްޑް ކަޕުގެ ޕާޓްނަރަކަށް ޓިކްޓޮކް

2026 ވަނަ އަހަރު ބާއްވާ ފީފާ ވޯލްޑް ކަޕްގެ "ޕްރިފަރޑް ޕްލެޓްފޯމް" ނުވަތަ އެންމެ އިސްކަންދޭ ޑިޖިޓަލް ޕްލެޓްފޯމަކަށް ޓިކްޓޮކް ހަމަޖައްސައިފިއެވެ.

މިއީ ފީފާގެ ތާރީޚުގައިވެސް މިފަދަ މަޤާމެއް ކުންފުންޏަކަށް ދިން ފުރަތަމަ ފަހަރެވެ. މީގެ ސަބަބުން ސަޕޯޓަރުންނަށް މުބާރާތުގެ ފޯރި ޑިޖިޓަލްކޮށް ތަޖުރިބާކުރުމަށް އާދަޔާ ޚިލާފް އާ ފުރުޞަތުތަކެއް ހުޅުވިގެންދާނެއެވެ.

މި އެއްބަސްވުމުގެ ދަށުން، އާންމުކޮށް މެޗުތައް ދައްކާ ޓީވީ ޗެނަލްތަކާ އެކު، ޓިކްޓޮކް ވެގެންދާނީ މުބާރާތުގެ ރަސްމީ ވީޑިއޯ ކޮންޓެންޓް ޕާޓްނަރަށެވެ.

މި އެއްބަސްވުމުގެ އަގެއް ފީފާއިން ހާމައެއް ނުކުރެ އެވެ. ނަމަވެސް އެ ޖަމާއަތުން ބުނީ މިއީ ސޯޝަލް މީޑިއާތަކުން ހުށަހެޅި އަގުތަކުގެ ތެރެއިން އެންމެ ރަނގަޅު ހުށަހެޅުމާއެކު ވެފައިވާ އެއްބަސްވުމެއް ކަމަށެވެ.

މިއާއެކު، ވޯލްޑް ކަޕަށް ޚާއްޞަ "ހަބް" އެއް ޓިކްޓޮކް އެޕްލިކޭޝަންގެ ތެރޭގައި ހިމެނިގެންދާނެއެވެ. މީގެ ތެރޭގައި މެޗުތަކުގައި ފެނިގެންދާ ހާއްސަ ފޫޓޭޖްތަކާއި، މެޗުތަކުގެ މަޢުލޫމާތާއި، ޓިކެޓާ ގުޅޭ ތަފުސީލުތައް ހިމެނޭނެއެވެ. އަދި ސަޕޯޓަރުންނަށް ބައިވެރިވެވޭ ގޮތަށް ތަފާތު ފިލްޓަރުތަކާއި، ސްޓިކާތަކާއި، ކުޅިވަރުގެ އެކި ހަރަކާތްތައްވެސް މި ހަބުގައި ހިމެނޭނެއެވެ. ހަމައެހެންމެ މީޑިއާ ޕާޓްނަރުންނަށް މެޗުތަކުގެ ބައެއް މަންޒަރުތަކާއި، ހައިލައިޓްސް އަދި ދަނޑު ބޭރުގެ ޚާއްޞަ މަންޒަރުތައް ސީދާ ޓިކްޓޮކް މެދުވެރިކޮށް ހިއްސާކުރެވޭނެއެވެ. ވޯލްޑްކަޕް މެޗްތައް ޓިކްޓޮކުން ލައިވް ނުކުރި ނަމަވެސް، މުހިންމު ވަގުތުތަކާއި ކުރު ކްލިޕްތައް ޓިކްޓޮކް މެދުވެރިކޮށް ފެނިގެންދާނޭކަމަށް ފީފާއިން ބުނެއެވެ.

މި އެއްބަސްވުމާއިއެކު ކޮންޓެންޓް ކްރިއޭޓަރުންނަށް ވެސް ހާއްސަ ފުރުޞަތުތަކެއް ލިބިގެންދާނޭކަމަށް ފީފާ އަދި ޓިކްޓޮކުން ވަނީ ބުނެފައެވެ. އެގޮތުން ޓިކްޓޮކްގެ ބައިނަލްއަޤްވާމީ ކްރިއޭޓަރ ޕްރޮގްރާމްގެ ދަށުން ހޮވާލެވޭ ފަރާތްތަކަށް، ނޫސްވެރިންގެ ބައްދަލުވުންތަކާއި، ފަރިތަކުރުންތަކުގެ އިތުރުން ފީފާގެ އާކައިވް ފޫޓޭޖްތަކާއި ބެކްސްޓޭޖް ހަރަކާތްތައް ބަލާލުމުގެ ޚާއްޞަ ފުރުޞަތު ލިބޭނެއެވެ. މީގެ ސަބަބުން ސަޕޯޓަރުންނަށް މީގެ ކުރިން ނުފެންނަ ގިނަ މަންޒަރުތަކެއް ފެނިގެންދާނެއެވެ.

މީގެ ކުރިން 2023 ވަނަ އަހަރު އަންހެނުންގެ ވޯލްޑް ކަޕުގެ ޕާޓްނަރެއްގެ ގޮތުގައި ޓިކްޓޮކް ވަނީ ހަރަކާތްތެރިވެފައެވެ. ނަމަވެސް މިއީ ފިރިހެނުންގެ ވޯލްޑް ކަޕެއްގައި މިފަދަ އެއްބަސްވުމެއް ޤާއިމުކުރި ފުރަތަމަ ފަހަރެވެ. މިއީ 2023 ވަނަ އަހަރު ޓިކްޓޮކްގެ ސަބަބުން ލިބުނު ކާމިޔާބީއަށް ބަލައި ދުނިޔޭގެ ކުޅިވަރުގެ ޚަބަރުތަކާއި މަންޒަރުތައް ކުރު ވީޑިއޯގެ ސިފައިގައި ފޯނުތަކާ ހަމައަށް ގެނެސްދިނުމަށް އެޅުނު މުހިންމު ފިޔަވަޅެއްކަމަށް ފީފާއިން ވަނީ ބުނެފައެވެ.

ފީފާއިން ބުނީ އެ ޖަމިއްޔާގެ އަމާޒަކީ ޓިކްޓޮކަކީ މިހާރު ދުނިޔޭގެ އެކި ކަންކޮޅުތަކުގައި، ޚާއްޞަކޮށް ޒުވާނުންގެ މެދުގައި ބޮޑު މަޤުބޫލުކަމެއް ހޯދާފައިވާ ޕްލެޓްފޯމަކަށްވުމުން އެކަމުގެ ބޭނުން ހިފައި، ފުޓްބޯޅައަށް އޮތް ޝައުޤުވެރިކަން އިތުރުކޮށް، ދުނިޔޭގެ އެކި ކަންކޮޅުތަކުގައި މުބާރާތް ބަލާ މީހުންގެ އަދަދު އިތުރުކުރުމެވެ.

މިއަހަރުގެ ވޯލްޑް ކަޕު ބޭއްވުމަށް ހަމަޖެހިފައިވަނީ ޖޫން 11 އިން ޖުލައި 19 އަށް އެމެރިކާ، މެކްސިކޯ އަދި ކެނެޑާގެ 16 ސިޓީއެއްގައެވެ. މި މުބާރާތަކީ މުޅި ދުނިޔޭގެ ފެންވަރުގައި ވެސް ބޭއްވޭ އެންމެ މަގުބޫލު، އެންްމެ ފޯރިގަދަ މުބާރާތެވެ.