ޕީއެންސީގެ ކެންޑިޑޭޓުންނާއެކު ރައީސް މައްޗަންގޮޅި މެދުގައި ދޮރުން ދޮރަށް

ޕީއެންސީގެ ކެންޑިޑޭޓުންނާއެކު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު, މައްޗަންގޮޅި މެދު ދާއިރާގައި ދޮރުން ދޮރަށް ހިންގަވައި ތާއީދު އިތުރު ކުރެއްވުމަށް މަސައްކަތް ކުރައްވައިފި އެވެ.

ރައީސްގެ އަރިހުގައި މާލެ ސިޓީގެ މޭޔަރުކަމަށާއި މާލޭ ސިޓީގެ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ރައީސްގެ މަގާމަށާއި މައްޗަންގޮޅި މެދު ދާއިރާގެ ކައުންސިލުގެ މެންބަރުކަމަށާއި އަންހެނުންގެ ތަރައްގީއަށް މަސައްކަަތްކުރާ ކޮމިޓީގެ މެންބަރު ކަމަށް ވާދަކުރާ ކެންޑިޑޭޓުން ބައިވެރިވި އެވެ.

ރައީސް ވަނީ މައްޗަންގޮޅި މެދު ދާއިރާގެ ބައެއް ގޭގެއަށް ޒިޔާރަތް ކުރައްވާފަ އެވެ. އަދި އެ ގޭގޭގެ މީހުންނާއި ބައްދަލު ކުރައްވާ ސަލާމް ކުރެއްވި އެވެ. ކަންބޮޑުވުންތައް ވެސް އެއްސެވި އެވެ.

މީގެ އިތުރުން މަގުމަތީން ބައްދަލުވީ ރައްޔިތުންނާއި ސަލާމް ކުރައްވާ އެމަނިކުފާނަށް މަރުހަބާ ދެންނެވުމަށް ޖަމާވި އާންމުންނާއި ވެސް ސަލާމް ކުރައްވާ އެ މީހުންނާއިއެކު ވަގުތުކޮޅެއް ހޭދަކުރެއްވި އެވެ.

ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމެޓީތަކުގެ އިންތިހާބު އޮތީ އަންނަ އޭޕްރީލް މަހުގެ ހަތަރުވަނަ ދުވަހު އެވެ.

މި ފަހަރުގެ އިންތިހާބަށް އެންމެ ގިނަ ކެންޑިޑޭޓުން ނެރެނީ ޕީއެންސީންނެވެ. މިއީ އިންތިހާބަކަށް އެއް ޕާޓީއަކުން އެންމެ ގިނަ ކެންޑިޑޭޓުން ނެރޭ ފަހަރެވެ.