ޒިޔާދާގެ ފިރިމީހާގެ މައްޗަށް އެއްވެސް ދައުވާއެއް ސާބިތުނުވެ މިނިވަންވެއްޖެ

2015 ވަަނަ އަހަރުގެ ތެރޭގައި ފިރިމީހާގެ ފަރާތުން ލިބުނު ޖިންސީ އަދި ޖިސްމާނީ އަނިޔާތަކަށް ފަރުވާ ހޯދމުންދަނިކޮށް ނިޔާވި ގދ.ތިނަދޫ ޒިޔާދާ ނައީމްގެ ފިރިމީހާ، އެ ރަށު ޖަވާހިރުމާގޭ ހުޅަނގުބައި އިބްރާހީމް ޝާހުގެ މައްޗަށް، ޒިޔާދާގެ މަރާއި ގުޅިގެން އުފުލި އެއްވެސް ދައުވާއެއް ސާބިތުނުވާކަމަށް ކްރިމިނަލް ކޯޓުން ނިންމައިފިއެވެ.

ކްރިމިނަލް ކޯޓުގެ ގާޒީ އިބްރާހިމް އަލީ ބެއްލެވި މި މައްސަލައިގެ ހުކުމް މިއަދު އިއްވި އިރު، ދައުލަތުން ޝާހުގެ މައްޗަށް އުފުލި ހަތަރު ދައުވާވެސް ސާބިތުނުވާކަމަށް ވަނީ ހުކުމް ކޮށްފައެވެ.

އެއީ ޖިންސީ ކުށުގެ ގާނޫނުގެ 20 ވަނަ މާއްދާގެ ދަށުން ފިރިމީހާ އަނބިމީހާ ރޭޕް ކުރުމުގެ ދައުވާއާއި، ގާނޫނުލް އުގޫބާތުގެ 111 ވަނަ މާއްދާގެ (ހ) ގެ ދަށުން މީހަކު މަރުވެދިއުމުގައި ފަރުވާކުޑަ އަމަލެއް ކުރުމުގެ ދައުވާއާއި، ގާނޫނުލް އުގޫބާތުގެ 112 ވަނަ މާއްދާގެ (ހ)ގެ ދަށުން މީހަކު މަރުވެ ދިއުމުގައި އުހުމާލުގެ އަމަލެއް ކުރުމުގެ ދައުވާގެ އިތުރުން، ދިވެހިރާއްޖޭގައި އޮރިޔާންކާޑު ގެންގުޅުނު ކަމުގެ ދައުވާއެވެ.

މި މައްސަލައިގެ އަޑުއެހުންތައް ގެންދެވުނީ މިފަދަ އެހެން މައްސަލަތައްވެސް ގެންދެވޭ އުސޫލުން، ސިއްރުންނެވެ.

ޒިޔާދާގެ މައްސަލާގައި ތަހުގީގަށް ލިބިފައިވާ މައުލޫމާތުތަކަށް ބަލާއިރު ޒިޔާދާއާ މެދު ޝާހު ގަދަކަމުން ޖިންސީ އަދި ޖިސްމާނީ އަނިޔާ ކުރިކަން އެނގިފައިވާ ކަމަށް ފުލުހުން ވަނީ ބުނެފައެވެ.ޝާހު ޒިޔާދާއަށް އެގޮތަށް އަނިޔާކޮށްފައިވަނީ އެ ދެމަފިރިން އެކުގައި ދިރިއުޅެމުން ދަނިކޮށެވެ.

ނަމަވެސް ވަކި ހިސާބަކުން ޒިޔާދާ ވަނީ ޝާހުގެ ގެއިން ނިކުމެގެން ވަކިން އުޅެން ފަށާފައެވެ.

ޒިޔާދާގެ ޕޯސްޓްމޯޓެމް ޕްރިލިމިނަރީ ރިޕޯޓުން ދައްކާ ގޮތުގައި ޒިޔާދާގެ ހަށިގަނޑުގެ އެކި ގުނަވަންތަކަށް އަނިޔާތަކެއް ވަނީ ލިބިފައެވެ. އެގޮތުން އޭނާގެ ކަނާއަތުގެ މުލައްދަޑިއާއި ވައަތުގެ މުލައްދަޑީގައިވެސް އަނިޔާލިބިފައި ހުރިކަމުގެ ނިޝާންތަކެއް ހުރިކަަމަށާއި ބޮލުގެ އަރިމަތިން ފަަހަތަށްވާގޮތަށް ވެސް އަނިޔާގެ ނިޝާނެއް ހުރި ކަމަށް އެ ރިޕޯޓްގައި ބުނެފައިވެއެވެ.