އިއްޔެ ކުރިއަށްގެންދިޔަ ފަދަ، "ޢީދު އުފާ" ހަރަކާތެއް މީގެކުރިން ދުށީމުތަ؟

ފިތުރު ޢީދުގެ އުފާ ފާހަގަކުރުމުގެ ގޮތުން ދައުލަތުގެ މުއައްސަސާތައް ގުޅިގެން އިއްޔެ ހަވީރު ސަލްޓަންޕާކް ސަރަހައްދުގައި ކުރިއަށްގެންދިޔަ "ޢީދު އުފާ" ހަރަކާތާ ގުޅޭގޮތުން ބައެއް މީހުން ކައިރީ އަހާލުމުން ހުރިހާ އެންމެން އިއްތިފާގުވީ މިފަދަ ހަރަކާތެއް އަދި މިހާތަނަށް ބާއްވާފައި ނުވާކަމަށެވެ. ސަރުކާރުގެ ނަގާކިޔާ ބޮޑެތި މުއައްސަސާތަކާ އެންމެ ބޮޑެތި ކުންފުނިތަކުން ވަނީ "ޢީދު އުފާ" ހަރަކާތް އިންތިޒާމުކޮށް ކުރިއަށްގެންެދިއުމުގައި ވަރަށްބޮޑެތި މަސައްކަތްތަކެއް ކޮށްފައެވެ. މި ހަރަކާތަކީ ކުޑަކުދިން ޝައުގުވެރިވާ ހަރަކާތަކަށް ހެދުމަށް ހާއްސަގޮތެއްގައި އެމްއެންޑީއެފާއި ފުލުހުންގެ އިތުރުން ސަރުކާރު ހިއްސާވާ ކުންފުނިތަކުން ވަނީ ވަރަށްބޮޑެތި މަސައްކަތްތަކެއް ކޮށްފައެވެ.

"ޢީދު އުފާ" ހަރަކާތް ކުރިއަށްގެންގޮސްފައިވަނީ، ސަލްޓަން ޕާކުން ފެށިގެން ޝަހީދުންގެ ބިނާ ސަރަހައްދާއި ޖުމްހޫރީ މައިދާން ސަރަހައްދުވެސް ހިމެނޭހެން ވީހާވެސް ގިނަ ރައްޔިތުންނަށް ބައިވެވެރިވެވޭ ގޮތަށެވެ. މި ހަރަކާތުގައި ދިވެހި ސަޤާފަތާއި، ކުޑަކުދިންގެ މެދުގައި މަޤްބޫލުކަން ލިބިފައިވާ ކެރެކްޓާތައް ވަނީ ދައްކާލާފައެވެ.

މި ހަރަކާތުގައި ކުޑަކުދިންގެ އެންމެބޮޑު މަޤްބޫލުކަމެއް ލިބިގެންގޮސްފައިވަނީ އެމްއެންޑިއެފް އަދި ފުލުހުންގެ މުއައްސަސާތަކުން ކުޑަކުދިން ބައިވެރިވެވޭގޮތަށް ގެންދިޔަ ހަރަކާތްތަކެވެ. މީގެ ތެރޭގައި އެމްއެންޑީއެފާއި ފުލުހުންގެ އުޅަނދުތަކަށް ކުޑަކުދިން އަރައި ފޮޓޯނެގޭގޮތަށް ގެންދިޔަ ހަރަކާތްތަކާއި، ކުދިންނަށް ބައިވެރިވެވޭގޮތަށް ކުރިއަށްގެންދިޔަ އެމްއެންޑީއެފްގެ ހަރަކާތްތައް ފާހަގަކޮށްލެވެއެވެ.

މީގެ އިތުރުން މިއަދުގެ "ޢީދު އުފާ" ހަރަކާތުގައި އެންމެބޮޑަށް ފާހަގަކޮށްލެވުނު އެއްކަމަކީ ޤައުމުގެ ވަލިއްޔުލް އަމްރު ޑރ.މުހައްމަދު މުއިއްޒުގެ ދެ ކަނބަލުންވެސް ހަރަކާތުގައި ބައިވެރިވެ ވަޑައިގެންނެވުމަށް އެތަނަށް ޒިޔާރަތްކުރުމެވެ. މީގެ އިތުރުން ރައީސުލްޖުމްހޫރިއްޔާގެ ނައިބުގެ ދެކަނބަލުންގެ އިތުރުން ދައުލަތުގެ ވަޒީރުންވެސް ވަނީ، ރައްޔިތުންނާއެކު "ޢީދު އުފާ" ހަރަކާތް ނިމެންދެން ހަރަކާތްތެރިވެ ވަޑައިގެންފައެވެ. ރައީސް ޑޜ.މުއިއްޒު ވަނީ ހަރަކާތަށް ޒިޔާރަތްކުރި އާއިލާތަކުގެ ކުދިންނާ ސަލާންކޮށް ކުދިންނާއެކު ފޮޓޯ ނަގައި ކުޅިވަރުތަކުގައިވެސް ބައިވެރިވެ ވަޑައިގެންފައެވެ.

މީގެކުރިން ޤައުމުގެ ވެރިންނާއި ދައުލަތުގެ ވަޒީރުން ރައްޔިތުންނާއެކު މިފަދަ ގޮތަކަށް ޢީދު ހަރަކާތުގައި އުޅުއްވިކަމެއް އަޅުގަނޑަކަށް އެނގިފައެއްނެތް. ރައީސް ޑރ.މުއިއްޒުވެސް މިއަދު "ޢީދު އުފާ" ހަރަކާތް ނިމެންދެން ކުޑަކުދިންނާއެކު ފޮޓޯނައި އުޅުއްވި. މިގޮތަށް ޤައުމުގެ ރައީސްއާއެކު މިހާ އޯޕަންކޮށް އުޅުމުގެ ފުރުސަތެއް އަދި ނުލިބޭ"

އާއިލާއާއެކު ޢީދު އުފާ ހަރަކާތަށް ގޮސް އުޅުނު ނަޒީރާ ކިޔާ މީހަކު ބުންޏެވެ

ފިތުރު ޢީދުގެ އުފާ ފާހަގަކުރުމުގެ ގޮތުން "ޢީދު އުފާ" ހަރަކާތް ކުރިއަށްގެންގޮސްފައިވަނީ ހަވީރު 16:00 އިން އިރުއޮއްސި 18:00 އާ ހަމަޔަށެވެ. މި ހަރަކާތުގައި ބައިވެރިވުމަށް ގިނަ އަދަދެއްގެ އާއިލާތަކަކުން ޒިޔާރަތްކުރިއިރު، ހަރަކާތް އިންތިޒާމުކުރުމުގައި ބައިވެރިވި ސަރުކާރުގެ މުއައްސަސާތަކުން ވަނީ އެތަނަށް ޒިޔާރަތްކުރި ކުޑަކުދިންނަށް ޢީދު ހަދިޔާ ބަހާފައެވެ.

ސަރުކާރުން ވަނީ މިފަހަރުގެ ފިތުރު ޢީދުގެ ހަރަކާތްތައް ކުލަގަދަ ގޮތެއްގައި ކުރިއަށްގެންދިމަށް ނިންމާފައެވެ. މިގޮތުން ޢީދު ފާހަގަކުރުމުގެ ގޮތުން ރޭ ވަނީ ހުޅުމާލޭ ސެންޓްރަލް ޕާކްގައި ހަވާއެރުވުމާއި ޑްރޯން ޝޯއެއްވެސް ކުރިއަށް ގެންގޮސްފައެވެ.