ޔޫއޭއީގެ ފުރަތަމަ ރެޒިޑެންޓް ސަފީރާއި ޝާހިދު ބައްދަލުކުރައްވައިިފި

ޔޫ.އޭ.އީ ސަރުކާރުން ރާއްޖެއަށް ކަނޑައެޅުއްވި އައު ސަފީރު، ޑރ. ސަޢީދު މުޙައްމަދު ޢަލީ އަލްޝަމްސީ، މިނިސްޓަރ އޮފް ފޮރިން އެފެއާޒް، ޢަބްދުﷲ ޝާހިދު އާ ބައްދަލުކުރައްވައިފިއެވެ.

މިނިސްޓްރީ އޮފް ފޮރިން އެފެއާޒްގައި މިއަދު މެންދުރުފަހު ބޭއްވެވި ބައްދަލުކުރެއްވުމުގައި، އެމަނިކުފާނުގެ ސަފީރުކަމުގެ ފަތްކޮޅު ރައީސުލްޖުމްހޫރިއްޔާ އަށް އެރުއްވުމުގެ މުނާސަބަތުގައި މިނިސްޓަރ ޝާހިދު ތަހުނިޔާ ދެންނެވިއެވެ. އަދި، އެމަނިކުފާނަކީ ދިވެހިރާއްޖޭގައި އަލަށް ޤާއިމްކުރާ ޔޫ.އޭ.އީ އެމްބަސީގެ ފުރަތަމަ ސަފީރުކަން ފާހަގަކުރައްވާ މަރުޙަބާ ދެންނެވިއެވެ.

މި ބައްދަލުކުރެއްވުމުގައި ދިވެހިރާއްޖެއާއި ޔޫ.އޭ.އީ.ގެ ދެމެދު އޮންނަ ގާތް ގުޅުން އިތުރަށް ބަދަހިކުރެވޭނެ ގޮތްތަކާ ގުޅޭގޮތުން މިނިސްޓަރ ޝާހިދު އާއި ސަފީރު އަލް ޝަމްސީ ވަނީ މަޝްވަރާކުރައްވާފައެވެ. އަދި އެކި ދާއިރާތަކުން ދެޤައުމުގެ ދެމެދުގައި އޮންނަ އެއްބާރުލުން އިތުރަށް ފުޅާކުރުމާއި ގުޅޭގޮތުން މަޝްވަރާކުރައްވާފައިވެއެވެ.

ޔޫ.އޭ.އީ.ގެ ސަފީރު ދެއްކެވި ވާހަކަފުޅުގައި ދިވެހިރާއްޖެއާއި ޔޫ.އޭ.އީ އާ ދެމެދުގައިވާ ގުޅުން ކުރިމަގުގައިވެސް އިތުރަށް ބަދަހިކުރުމަށް މަސައްކަތްކުރައްވާނެކަމުގެ ޔަގީންކަން ވަނީ ދެއްވާފައިވެއެވެ.